قازاقستاننىڭ بۇرىنعى پرەزيدەنتى نۇرسۇلتان نازارباەۆتىڭ ۇلكەن قىزى داريعانىڭ ۇلى، كاسىپكەر ءنۇرالى اليەۆ «ترانستەلەكوم» كومپانياسى ديرەكتورلار كەڭەسىنىڭ توراعاسى وكىلەتىن توقتاتتى. اليەۆ كومپانيانىڭ ساتىلۋىنا بايلانىستى اكتسيونەرلەر قۇرامىنان شىققانىن مالىمدەگەن. وعان كومپانيا اكتسيالارىنىڭ 75 پايىزى تيەسىلى بولعان.

«بۇل – مەن ءۇشىن دە، كەرەمەت دامۋ جولىنان وتكەن كومپانيا ءۇشىن دە ماڭىزدى كەزەڭ»، – دەپ جازجى اليەۆ Instagram-داعى پاراقشاسىندا. نازارباەۆتىڭ جيەنى 2013-جىلى "ترانستەلەكوم" كومپانياسىنىڭ پرەزيدەنتى قىزمەتىنە كىرىسكەندە 28 جاستا ەدى.

"[ول كەزدە] كومپانيا تەمىرجول سەكتورىنا قىزمەت كورسەتەتىن جەرگىلىكتى شاعىن بايلانىس وپەراتورى بولدى. الدىمىزدا ۇلكەن مىندەتتەر تۇردى: "ترانستەلەكومدى" قازىرگى زامانعى، جوعارى تەحنولوگيالىق كومپانياعا اينالدىرۋ، يننوۆاتسيالار ەنگىزىپ، جاڭا باعىتتاردى دامىتۋ. كوماندانىڭ كۇشى مەن كليەنتتەردىڭ قولداۋى ارقاسىندا ءبىز بارىنە قول جەتكىزدىك", – دەدى اليەۆ.

2014-جىلى جەلتوقساندا اليەۆ "ترانستەلەكومنان" كەتىپ، استانا قالاسى اكىمىنىڭ ورىنباسارى قىزمەتىنە تاعايىندالعان. 2016-جىلى تامىزدا ول "ترانستەلەكومعا" ديرەكتورلار كەڭەسىنىڭ مۇشەسى بولىپ ورالعان.

2016-جىلى "ترانستەلەكوم" كومپانياسى اكتسيالارىنىڭ 49 پايىزىن مارلەن مۇقانوۆ ەسىمدى الدەبىر ازامات 8,9 ميلليارد تەڭگەگە ساتىپ الىپ، "ترانستەلەكوم" ديرەكتورلار كەڭەسىنىڭ مۇشەسى اتانعان. سول كەزدە "ترانستەلەكومنىڭ" قالعان – 51 پايىز اكتسياسى "قازاقستان تەمىر جولى" ۇلتتىق كومپانياسىنىڭ يەلىگىندە ەدى.

مۇقانوۆ 2016-جىلى كومپانيا اكتسيونەرى اتانعاننان باستاپ "ترانستەلەكومنىڭ" تابىسىنان پايدا كورگەن. 2016-جىلى ماۋسىمدا كەلىپ، بەس ايدان سوڭ 618,8 ملن تەڭگە ديۆيدەند العان، ەكىنشى اكتسيونەر – قتج 644,1 ملن تەڭگە العان. 2017 جىلى "ترانستەلەكوم" تابىسىنان مارلەن مۇقانوۆقا 1,1 ملرد تەڭگە، قتج-عا 1,2 ملرد تەڭگە ديۆيدەند تولەنگەن.

ءنۇرالىنىڭ "سەنىمدى ادامى" دەپ سيپاتتالاتىن 41 جاستاعى مارلەن مۇقانوۆتىڭ "ترانستەلەكومداعى" ىقپالى ارتا بەرگەن. 2020-جىلى "ترانستەلەكومنىڭ" تاعى 26 پايىز اكتسياسىن 9,4 ملرد تەڭگەدەن اسا اقشاعا ساتىپ العان. جىل اياعىندا مۇقانوۆتىڭ يەلىگىندەگى اكتسيا ۇلەسى 75 پايىزعا جەتكەن. 2021-جىلى تامىزدا مۇقانوۆتىڭ "ترانستەلەكومداعى" 75 پايىز اكتسياسى Unit Telecom كومپانياسىنا وتكەن.

اليەۆ جازباسىندا "ترانستەلەكوم" 10 جىل ىشىندە قازاقستاندى تسيفرلاندىرۋ جونىندەگى ستراتەگيانى دامىتۋعا جانە ىسكە اسىرۋعا ەلەۋلى ۇلەس قوستى، كوپ ناتيجەگە قول جەتكىزدى" دەپ، ولاردى ءتىزىپ شىقتى.

"ترانستەلەكوم" – قازاقستانداعى ماڭىزى زور ستراتەگيالىق كومپانيا. ونىڭ مەنشىگىندە كوپتەگەن كابەل جەلىسى، ينجەنەرلىك جەلى مەن نىساندار بار. كومپانيانىڭ كوپ بولىگى جەكە قولعا وتكەلى قىزمەت اياسى دا كەڭەيىپ، مەملەكەتتەن تەندەردى كوپ الاتىن بولدى. كومپانيا "تسيفرلىق قازاقستان" باعدارلاماسىمەن اۋىلدارعا ينتەرنەت تارتتى، "استاناحاب" تەحنوپاركىمەن بىرلەسىپ زەرتحانا اشتى. "ترانستەلەكومنىڭ" بۇكىل تەمىرجول جەلىسىن 4G بايلانىسىمەن قامتىعانى، الماتى مەتروسىنا ءWى-ءFى ورناتقانى تۋرالى دا اقپاراتتار جاريالانعان.

بۇعان دەيىن تسيفرلىق دامۋ ءمينيسترى بولعان باعدات مۋسين اۋىلدارعا ينتەرنەت تارتۋ جۇمىسىن سىنعا الىپ، "ترانستەلەكوم" كومپانياسىن "نە ءوزى ىستەمەيدى، نە باسقالاردىڭ ىستەۋىنە مۇمكىندىك بەرمەيدى" دەپ مونوپوليستەر قاتارىنا جاتقىزعان. مۋسين ۇكىمەت وتىرىسىندا جاساعان بايانداماسىندا كومپانيانىڭ جەكە مەنشىككە ساتىلعان اكتسيالارىنا تەكسەرىس جۇرگىزۋدى دە ۇسىنعان. 2020 جىلى "ترانستەلەكوم" اكىمشىلىگى مونوپولياعا قارسى زاڭ تالاپتارىن "ساقتاپ وتىرمىز" مالىمدەگەن.

40 جاستاعى ءنۇرالى اليەۆ – قازاقستانداعى ەڭ باي 75 بيزنەسمەننىڭ قاتارىنا كىرەدى. "Forbes قازاقستان" جۋرنالى بىلتىر ونىڭ بايلىعىن 220 ميلليون دوللار دەپ باعالاعان، ونىڭ ءتۇرلى سالادا بيزنەسى بار. ول 27 جاسىندا، قازاقستاندى ناعاشى اتاسى بيلەپ تۇرعان كەزدە، ەلدەگى ەڭ جاس مۋلتيميلليونەر اتانعان.

Abai.kz