14 اقپانعا قاراعان ءتۇنى استانا ۆوكزالىندا جۇك كونتەينەرى جارىلدى. وسىعان بايلانىستى پوليتسيا قىلمىستىق ءىس قوزعادى.

توتەنشە جاعداي تۇنگى ساعات 00:25-تە "استانا" ستانتسياسىنداعى ىرىكتەۋ الاڭىنىڭ 12-جولاعىندا بولدى.

"استاناعا پويىز ارقىلى جەتكىزىلگەن جۇك كونتەينەرى جارىلعان. ءبىر ادام قولىنان جەڭىل جاراقات الدى، الايدا اۋرۋحاناعا جاتقىزۋدى قاجەت ەتپەدى", – دەلىنگەن تجم حابارلاماسىندا.

پوليتسەيلەر جولاۋشىلار مەن جاقىن ماڭداعى تۇرعىندارعا قاۋىپ تونبەگەنىن حابارلادى.

"كولىكتەگى پوليتسيا دەپارتامەنتى بۇل وقيعا بويىنشا "تەمىر جول كولىگىن پايدالانۋ نەمەسە قوزعالىس قاۋىپسىزدىگى ەرەجەلەرىن بۇزۋ" بابى بويىنشا قىلمىستىق ءىس قوزعادى. وقيعا ورنىنا دەرەۋ دەپارتامەنت باسشىلىعى جەتكەن. ارنايى جەدەل توپ قۇرىلدى، ولار وقيعانىڭ بارلىق ءمان-جايىن انىقتاۋعا كىرىسىپ كەتتى", – دەلىنگەن حابارلامادا.

قتج جارىلعان كونتەينەردىڭ جەكە كومپانياعا تيەسىلى ەكەنىن حابارلادى. الدىن الا مالىمەت بويىنشا ىشىندە ەلەكتر جابدىقتارى – ترانسفورماتورلار مەن گەنەراتورلار بولعان.

Abai.kz