مەملەكەت باسشىسىنىڭ تاپسىرماسى بويىنشا شىعىس قازاقستان وبلىسىنداعى بۇقتىرما سۋ قويماسى ارقىلى وتەتىن ەلدەگى ەڭ ۇزىن كوپىر ىسكە قوسىلدى. جوبا وڭىردەگى كولىك بايلانىسىنىڭ كوپجىلدىق ماسەلەسىن شەشۋگە باعىتتالعان.

«جۇرت جىلدار بويى جازدا – پاروممەن، قىستا – مۇزدىڭ ۇستىمەن جۇرەتىن. بۇل وتە ىڭعايسىز ءارى قاۋىپتى بولعانى تۇسىنىكتى. ەندى ماسەلە ءبىرجولا شەشىمىن تاپتى»،- دەدى قر پرەزيدەنتى قاسىم-جومارت توقاەۆ.

بۇگىنگى تاڭدا كۇرشىمدەگى كوپىر شىعىس قازاقستان وبلىسىنىڭ كۇرشىم، ۇلكەن نارىن، مارقاكول، كاتونقاراعاي، تارباعاتاي جانە زايسان اۋداندارىن وسكەمەن قالاسىمەن بايلانىستىرا وتىرىپ، كولىك قۇرالدارىنىڭ جىل بويى قاۋىپسىز قوزعالىسىن قامتاماسىز ەتەدى.

سۋرەت: gov.kz سايتىنان الىندى.

العاشقى ءتورت ايدا كوپىر ارقىلى 170 مىڭعا جۋىق اۆتوموبيل وتكەن. ياعني، كۇن سايىن 1,5 مىڭعا جۋىق كولىك كوپىردى پايدالانادى. بۇعان دەيىن ايماق تۇرعىندارى 500 شاقىرىمعا دەيىن اينالما جول جۇرۋگە ءماجبۇر بولعانىن ايتا كەتكەن ءجون. بۇل جول ءجۇرۋ ۋاقىتى مەن كولىك شىعىنىن ەداۋىر ارتتىردى.

كوپىردىڭ قۇرىلىسىن شىعىس قازاقستان وبلىسىنداعى وتاندىق كومپانيا جۇزەگە اسىردى. بۇل ءوڭىردى جاڭا جۇمىس ورىندارىمەن قامتاماسىز ەتە وتىرىپ، جەرگىلىكتى رەسۋرستاردى، مامانداردى تارتۋعا مۇمكىندىك بەردى.جوبا وزىق ينجەنەرلىك تەحنولوگيالاردى قولدانۋ ارقىلى جانە بارلىق ساپا ستاندارتتارىنا سايكەس جۇزەگە اسىرىلدى.

سۋرەت: gov.kz سايتىنان الىندى.

كوپىردىڭ جالپى ۇزىندىعى - 1316 مەتردى, ەنى - 12,2 مەتردى قۇرايدى. ءبىر جاعىندا جاياۋ جۇرگىنشىلەر جولاعى سالىنعان. قىسقى كەزەڭدە كونسترۋكتسيانى قورعاۋ ءۇشىن تىرەكتەردىڭ ارقايسىسىندا ارنايى مۇزكەسكىشتەر ورناتىلعان.
سونىمەن قاتار سۋ بەتىنەن كوپىرگە دەيىنگى قاشىقتىق 18 مەتردى قۇرايدى. بۇل ناۆيگاتسيا كەزەڭىندە كەمەلەردىڭ كوپىردىڭ استىنان كەدەرگىسىز وتۋىنە مۇمكىندىك بەرەدى.
قاۋىپسىزدىكتى قامتاماسىز ەتۋ ءۇشىن بۇقتىرما سۋ قويماسى ارقىلى وتەتىن جاڭا كوپىردە 102 بەينەباقىلاۋ كامەراسى ورناتىلعان، ونىڭ 62-ءسى كوپىردىڭ جوعارعى بولىگىندە، 40-ى كوپىر استى ايماعىندا ورنالاسقان. كامەرالار ونلاين رەجيمدە جۇمىس ىستەيدى، بۇل كوپىردىڭ جاعدايىن ۇنەمى باقىلاۋدى قامتاماسىز ەتەدى.
ءوڭىر تۇرعىندارى كوپىر سۋ قويماسىنىڭ ەكى جاعىنداعى ەلدى مەكەندەر اراسىنداعى كولىك قاتىناسى ماسەلەسىن شەشكەنىن ايتادى. اتالعان كوپىر ازاماتتاردىڭ قاۋىپسىز قوزعالىسىن قامتاماسىز ەتىپ، تاۋار جەتكىزۋ ۋاقىتىن جەدەلدەتتى.

كۇرشىمدەگى كوپىر – جاي عانا قۇرىلىس ەمەس، بارلىق ءوڭىر ءۇشىن جاڭا ۇدەرىس پەن جاڭا مۇمكىندىكتەردىڭ سيمۆولى ىسپەتتەس.

سۋرەت: gov.kz سايتىنان الىندى.

جەرگىلىكتى تۇرعىن ايبار ەرىكوۆ اتاپ وتكەندەي، كوپىر «ۇلكەن الەمگە اشىلعان ەسىك» بولدى:

«قىستا بۇقتىرما سۋ قويماسىنىڭ ارعى جاعىنا ءوتۋ ءۇشىن قالىڭ مۇزدىڭ قاتۋىن كۇتكەنىمىز ەسىمدە. ەندى ءبىز بۇل تۋرالى ويلامايمىز! كولىككە وتىراسىڭ – ارعى جاعادان شىعاسىڭ. ءبىز ءۇشىن بۇل كوپىر ۇلكەن الەمگە اشىلعان ەسىك سياقتى. قالاعا بارۋ الدەقايدا جەڭىل، جىلدام جانە قاۋىپسىز».

شاعىن كاسىپ يەسى ايناش ورازباەۆا وڭىردەگى ساۋدا جاندانا تۇسكەنىن مالىمدەيدى:

«بۇرىن بىزگە تاۋارلاردى جەتكىزۋ ناعىز كۆەست بولاتىن: جازدا – پاروم، قىستا – مۇز ۇستىمەن، ال ماۋسىمنان تىس ۋاقىتتا ەشتەڭە اكەلمەيتىن. ەندى تاۋارلار ءۇزىلىسسىز جەتكىزىلىپ، دۇكەندەردەگى اسسورتيمەنت ءوستى، باعالار تۇراقتالدى. كوپىر ارقىلى جۇمىس ىستەۋ الدە قايدا وڭاي، ال ادامداردىڭ ءومىر سۇرۋىنە ىڭعايلى جاعداي جاسالدى».

سۋرەت: gov.kz سايتىنان الىندى.

اۋىر جۇك كولىگىنىڭ جۇرگىزۋشىسى مۇرات رامازانوۆ جولدى جانە جولداعى ۋاقىتتى ۇنەمدەۋ تۋرالى ايتىپ بەردى:

«ەگەر بۇرىن ماعان بۇقتىرما سۋ قويماسىن اينالىپ ءوتۋ ءۇشىن قوسىمشا 500 شاقىرىم ءجۇرۋ كەرەك بولاتىن. سەبەبى مەن تابيعاتىمنان ەكسترەمالدى جاقسى كورمەيمىن جانە كولىگىمنىڭ سالماعىمەن مۇزدىڭ بەرىكتىگىن تەكسەرگىم كەلمەدى. ەندى مەن كوپىردەن ءوتىپ بارا جاتىرمىن. بۇل جانار مايدى عانا ەمەس، ۋاقىتتى دا ۇنەمدەپ، جۇيكەنىڭ دە شارشاماۋىنا ۇلكەن مۇمكىندىك».

كۇرشىمدەگى كوپىر شىعىس قازاقستاننىڭ الەۋمەتتىك-ەكونوميكالىق دامۋىنا سەرپىن بەرىپ قانا قويماي، تۇتاستاي العاندا ەلدىڭ كولىك-لوگيستيكالىق سالاسىنىڭ دامۋىنا وڭ اسەرىن تيگىزىپ، لوگيستيكالىق باعىتتاردى جاقسارتىپ، شەكارا ماڭىنداعى ەلدەرمەن ۇزدىكسىز بايلانىستاردى قامتاماسىز ەتتى. سونداي-اق كوپىر ايماقتىڭ تۋريستىك الەۋەتىن ارتتىرىپ، وڭىردەگى جانە بۇقتىرما سۋ قويماسىنىڭ كوركەم كورىنىسىن تاماشالاۋعا مۇمكىندىك بەرەرى ءسوزسىز.

Abai.kz