قارالى حاباردى پارلامەنت سەناتىنىڭ دەپۋتاتى جانبولات جورگەنباەۆ حابارلادى.

"قوعام جانە مەملەكەت قايراتكەرى، ارداقتى ازامات، اسىل دوس مۇساحانوۆ اڭسار تۇرسىنحانۇلىنىڭ دۇنيەدەن وزۋىنا بايلانىستى قايعىلارىڭىزعا ورتاقتاسىپ، كوڭىل ايتامىن. وسىنداي اۋىر كۇندە قارالى كوڭىلدەرىڭىزگە جۇبانىش، قايىسقان قابىرعالارىڭىزعا مەدەت تىلەيمىن. اڭسار تۇرسىنحانۇلى ەڭبەك جولىن اۋىل شارۋاشىلىعى سالاسىنان باستاپ، قر پارلامەنتى سەناتىنىڭ ەكس-دەپۋتاتى، قر پرەزيدەنتى اكىمشىلىگىنىڭ مەملەكەتتىك ينسپەكتورى، الماتى وبلىسىنىڭ اكىمى، جامبىل، قاراساي اۋداندارىنىڭ اكىمى لاۋازىمدارىن زور ابىرويمەن اتقارىپ، وبلىستىڭ، اۋداننىڭ قوعامدىق-ساياسي قىزمەتتەردىڭ ورتاسىندا ءجۇرىپ، جاۋاپتى قىزمەتتەردە حالىقتىڭ ريزاشىلىعىنا بولەنگەن ارداقتى جان ەدى", - دەپ جازدى ول.

الماتى وبلىسىنىڭ اكىمدىگى اڭسار مۇساحانوۆ 19 اقپاندا كەنەتتەن قايتىس بولعانىن حابارلادى.

اڭسار مۇساحانوۆ 1966 جىلى 31 شىلدەدە الماتى وبلىسى ايدارلى اۋىلىندا دۇنيەگە كەلگەن. ەڭبەك جولىن اۋىل شارۋاشىلىعى سالاسىنان باستاعان. ءار جىلدارى الماتى وبلىسىنىڭ جامبىل جانە قاراساي اۋداندارىنىڭ اكىمى، پرەزيدەنت اكىمشىلىگىنىڭ مەملەكەتتىك ينسپەكتورى بولعان.

2011-2014 جىلدارى اڭسار مۇساحانوۆ الماتى وبلىسىنىڭ اكىمى قىزمەتىن اتقاردى. 2014 جىلدان 2020 جىلعا دەيىن پارلامەنت سەناتورى بولدى. "قۇرمەت" وردەنىنىڭ يەگەرى.

Abai.kz