«قاسقىردىڭ اۋزى جەسە دە قان، جەمەسە دە قان» دەمەكشى، قاي ءبىر جىلى ەل بيلىگى زەينەتاقى قارجىسىن ازەربايجان كومپانياسىنا اۋدارامىن دەپ وپىق جەپ قالعان ەدى. قازىر دە زەينەتاقى اقشاسىنىڭ ءتيىمسىز جۇمسالىپ جاتقانى ارا-تۇرا ايتىلىپ قالادى. بۇل راس پا، الدە قاتە پىكىر مە؟

بۇعان تاياۋدا ۇلتتىق بانك ءباسپاسوز قىزمەتىنىڭ باسشىسى اسان قالياحمەت پىكىر بىلدىرگەن. ونىڭ سوزىنشە، «مينۋسقا» كەتكەن ايلار بولعانىمەن، تۇتاس جىلداعى كورسەتكىش ەشقانداي دا تەرىس بولماعان.

«2022 جىل ءتىپتى وڭاي بولعان جوق. ناۋرىز، ءساۋىر، مامىر – ءۇش اي قاتارىنان «مينۋسقا» كەتكەن. ەڭ ۇلكەن «شىعىن» مامىر ايىندا – 290,5 ملرد تەڭگە. ال ماۋسىم ايىندا تابىسى بىردەن 506,6 ملرد تەڭگەگە ۇلعايدى. كەيىن، قازان ايىندا تاعى دا «مينۋس» – 69,4 ملرد تەڭگە. دەگەنمەن جىل قورىتىندىسى بويىنشا تابىس +915 ملرد تەڭگەگە جەتكەن. 2023 جىلى ينۆەستيتسيالىق كىرىس «مينۋسقا» تەك قازان ايىندا كەتكەن: - 145 ملرد تەڭگە. بىراق جىل قورىتىندىسى بويىنشا ينۆەستيتسيالىق تابىس +1,6 ترلن تەڭگە بولدى»، دەيدى.

بىلتىر ساۋىردە ينۆەستيتسيالىق تابىس «مينۋسقا» كەتىپ، 51 ملرد تەڭگەنى قۇرادى. ال ودان كەيىنگى مامىر ايىندا: + 116,7 ملرد تەڭگە. ياعني ەكى ەسە وسكەن.

«2024 جىلدىڭ قورىتىندىسى بويىنشا بجزق-نىڭ جالپى ينۆەستيتسيالىق تابىسى: + 3,3 ترلن تەڭگە. قارجىلىق ەسەپكە قاراساق، ءبىر اي تابىس مينۋسقا كەتسە دە، ەكى-ءۇش اي تابىس وڭ. ال تۇتاس ءبىر جىلدىڭ قورىتىندىسى بويىنشا «مينۋسقا» كەتكەن جىل جوق. بىلتىرعى 3,3 ترلن تەڭگە – ءتىپتى رەكورد. دەمەك، زەينەتكە قالدىرىلعان اقشا ەشقايدا «جوعالعان» جوق. كەرىسىنشە سوڭعى جىلدارى ينۆەستيتسيالىق تابىسى ارتىپ كەلەدى. مۇنىڭ سەبەبى – زەينەتاقى اكتيۆتەرى اكتسيا نارىعىنا كوپتەپ قۇيىلا باستادى. ونىڭ تابىسى جوعارى، دەگەنمەن، تاۋەكەلى دە از ەمەس»، دەپ جازادى مامان.

Abai.kz