جاڭا زامان قازاق تاريحىندا قازاقستاننىڭ قوس تۋماسى: ءبىرى – رۋحاني-ساياسي،  ەندى ءبىرى – عالامتورلىق ارانداتۋشىلىق جاسادى.

كىمدەر تۋرالى ەكەنىن ىشتەرىڭىز سەزىپ وتىرعان شىعار؟ سوندا دا اڭگىمەنىڭ باستى كەيىپكەرلەرىنىڭ اتىن اتاپ، ءتۇسىن تۇستەپ وتكەنىمىز ءجون سياقتى.

ونىڭ ءبىرى – «ياندەكستىڭ» نەگىزىن قالاۋشى، اتىراۋدىڭ تۋماسى اركادي يۋرەۆيچ ۆولوج بولسا، ەكىنشىسى – اتىڭ وشكىر ۆلاديمير ۆولفوۆيچ جيرينوۆسكي.

قازاق بولعان سوڭ «اتىڭ وشكىر» دەيمىز. بىراق قازاقتىڭ سۋىن ءىشىپ، قۇدىعىنا ولە-ولگەنشە تۇكىرىپ وتكەن جيرينوۆسكيدىڭ ء(وزى وقىعان مەكتەبىندە تالاي مارتە اكەسىن تانىتىپ ساباعان قازاق سىنىپتاستىرىڭ قويعان لاقاپ اتى - جيريك) "اتى وشپەيىن" دەپ تۇر ەكەن.

نەگە دەيسىز بە، وندا رەسەيدىڭ باستى باسىلىمى – «تاسس-تا» شىققان مىنا حاباردى وقىساڭىز قانىڭىز باسىڭىزعا شاۋىپ شىعا كەلەدى. سونىمەن «تاسس» نە دەيدى، سوعان توقتالا كەتەيىك:

رەسەيلىك اقپارات: «2026 جىلى الماتىدا جيرينوۆسكيگە ەسكەرتكىش اشىلادى»، - دەپ جازادى.

سوزبە-ءسوز اۋدارما: «2026 جىلعى ناۋرىز-ساۋىردە – سارانسك قالاسى، موردوۆيا رەسپۋبليكاسىندا ۆ.ۆ.جيرينوۆسكيگە ارنالعان ەسكەرتكىشتەر مەن وزگە دە ەسكەرتكىش نىسانداردىڭ سالتاناتتى اشىلۋى مەن ەستەلىك ءىس-شارالار وتەدى. 2026 جىلدىڭ ءساۋىر-مامىر ايلارىندا، رف سۋبەكتىلەرىندە دە جيرينوۆسكيگە ارنالعان ەسكەرتكىشتەر مەن وزگە دە ەسكەرتكىش نىسانداردىڭ سالتاناتتى اشىلۋى جوسپارلانعان»، - دەلىنگەن جوبا حابارلاماسىندا.

سونداي-اق: «ەسكە الۋ ءىس-شاراسى قازاقستاندا، ساياساتكەردىڭ تۋعان جەرى – الماتىدا وعان ارنالعان ەسكەرتكىشتىڭ سالتاناتتى اشىلۋى اتالىپ وتىلەدى»، - دەپ جازادى.

بۇل ءبىر جاعىنان – قازاق دەسە اۋزىنا كەلگەنىن ايتقان جاندى دارىپتەۋ بولسا، ەكىنشى جاعىنان – قازاقتى سىرتىنان بيلەپ-توسەۋ ەمەس پە؟ قازاقستاندا دومينانت باسىمدىققا يە قازاقتاردىڭ جيرينوۆسكيدى ءيتتىڭ ەتىنەن جەك كورەتىنىن رەسەي بيلىگى جاقسى بىلەدى. سوندا رەسەيدىڭ ساياسي يدەولوگتارى قازاقتى تاعى ءبىر تۋلاتىپ، ەلىمىزدەگى ەكى ءىرى الەۋمەتتىك توپ اراسىنا وت تاستاماق پا؟

تاقىرىپقا تۇزدىق: اتالعان اتىشۋلى ماسەلەگە بايلانىستى: «الماتى قالاسىنىڭ مادەنيەت باسقارماسىنا ۆ.جيرينوۆسكيگە ەسكەرتكىش ورناتۋ تۋرالى وتىنىشتەر تۇسكەن جوق،  الماتى قالاسىنىڭ تاريح جانە مادەنيەت ەسكەرتكىشتەرىن قورعاۋ كوميسسياسى ءتيىستى ۇسىنىستى قاراستىرعان جوق»، - دەپ حابارلادى الماتى قالاسىنىڭ مادەنيەت باسقارماسى.

ءتۇيىن: «تاسس» بۇل اقپاردى قايدان شىعاردى؟ رەسەي پرەزيدەنتى پۋتين 2024 جىلعى قاراشادا: «2026 جىلى جيرينوۆسكيدىڭ 80 جىلدىعىن مەملەكەتتىك دەڭگەيدە مەرەكەلەۋ تۋرالى» جارلىققا قول قويدى. سول الاشاپقىننىڭ ىشىنە قاساقانا جيرينوۆسكيدىڭ «تۋعان جەرى» دەپ اتاپ، قازاق جەرىندەگى الماتىنى دا كىرگىزىپ جىبەرگەن سياقتى .

ءابىل-سەرىك الىاكبار

Abai.kz