اقش وسىعان دەيىن بەيبىتشىلىك ءۇشىن ۋكراينادان «رەسەي وكۋپپاتسيالاعان جەرلەردى رەسەيگە تاستاپ كەتۋدى» تالاپ ەتە باستاعان بولاتىن...

وسىنى قوش كورگەن رەسەي باسشىلارى، تىپتەن، ۋكرايناعا تيەسىلى 4 وبلىستى تۇگەلىمەن، وعان قوسا قىرىمدى «رەسەي جەرى» دەپ ۋكراينا عانا ەمەس، بۇكىل الەم مويىنداۋىن تالاپ ەتۋگە كوشتى.

رەسەي ونىڭ «زاڭدىق نەگىزى» رەتىندە وزدەرىنىڭ كونستيتۋتسياسىنا ەنگىزگەن وسى وزگەرىستەردى باسشىلىققا الاتىنىن جاسىرماي ايتتى دا.

الايدا، ونداي «كونستيتۋتسيالىق وزگەرىستەر» تەك رەسەيگە قاتىستى ونىڭ «ىشكى ماسەلەسى» بولعاندىقتان - الەم ەلدەرى ونى مويىندامادى.

سەبەبى، بۇل - حالىقارالىق زاڭدى بۇزۋ، ەكى ەل اراسىنداعى وسىنداي اگرەسسيا مەن تەرروريزمدى زاڭداستىرۋ بولىپ شىعادى.

ولاي بولسا، رەسەي ءوز اسكەرىن ۋكراينادان بۇۇ شەگاراسىنىڭ بويىمەن (1991 ج) تولىق اكەتپەيىنشە، ۋكراينا «ءوزىنىڭ تەرريتوريالىق تۇتاستىعىن قورعاۋشى، ياعني - وتان سوعىسىن وتكەرۋشى جانە ءوز كونستيتۋتسياسىنا ساي ارەكەت ەتۋشى مەملەكەت» سانالادى دا، ول مايدان شەبىندەگى اتىستى توقتاتا المايدى.

اتىستى توقتاتۋ - ۋكراينانىڭ كاپيتۋلياتسياسى بولادى.

«ەندەشە، - دەيدى، - ۋكراينا تاراپى، - ءبىز جانە رف ەلدەگى، تىلداعى ەنەرگەتيكالىق ينفراسترۋكتۋرانى اتقىلاۋدى توقتاتايىق»...

بىراق وعان رەسەي جاعى كونبەي وتىر.

وسىعان قاراماستان، ۋكراينا تاراپى ساۋد ارابياسىندا اقشتىڭ بىتىمشىلەر دەلەگاتسياسىمەن كەزدەسىپ، كەلىسسوزدەر جاساۋى بارىسىندا وتە شەبەر ديپلوماتيالىق قادامدار جاسادى.

ۋكراينا دەلەگاتسياسى – «ۋكراينا ۋاقىتشا اتىستى توقتاتۋعا دايار» دەگەن شەشىمگە كەلىستى.

بۇل جاعدايدا، ۋكراينا تەك ۇتادى.

سەبەبى، ەندى «شەشۋى قيىن ديللەمما» رەسەيدىڭ سۇراعىنا اينالدى:

رەسەي «جوق» دەسە، ءوزى اگرەسسور ەل ەكەنىن مويىندايدى، «ءيا» دەسە - ول ءوزى سانكتسيالار ايماعىندا قالا بەرەدى دە، ۋكراينا اسكەرىنىڭ تىم كۇشەيىپ كەتۋىنە جول بەرەدى...

وسىدان كەيىن اقش تاراپى «ۋكرايناعا قارۋ بەرۋدى توقتاتۋ جانە سپۋتنيكتىك بارلاۋ دەرەگىنەن شەتتەتۋ» دەگەن جاقىندا شىعارعان شەشىمىنەن باس تارتاتىن بولدى...

سونىمەن، وسىلاي وتكەن «اقش-ۋكراينا تۇسىنبەۋشىلىگى» ۋكراينا ءۇشىن پايدالى اياقتالدى:

- ەۋرووداق ۋكرايناعا كومەكتى ونداعان ەسە ارتتىرۋ جوباسىن جاساپ جاتىر

- ەۋروپا ءوزىنىڭ اسكەري ءوندىرىسىن دامىتۋ ەلەمەنتىنە ۋكراينانى قوستى.

- اقش بۇرىنعى ۋادەلەسكەن اسكەري كومەگىن جالعاستىراتىن بولدى.

مۇندا، مىنانى ايتا كەتۋ كەرەك: اقش رەسەيدى قولداعان از ۋاقىتتا جۇزدەگەن ميلليارد دوللارعا شىعىنعا باتىپ ۇلگەردى... دەگەن ەسەپتەر شىقتى - ونى ەشكىم تەرىستەگەن جوق.

ءسويتىپ، الەمنىڭ اگرەسسيانى ەمەس، بەيبىت دەموكراتيانى تاڭدايتىنى وسىدان ايقىن كورىنىس تاپتى دەپ قورىتىندىلاۋعا بولادى.

ءابدىراشيت باكىرۇلى

Abai.kz