كەشە رەسەي پرەزيدەنتى ۆلاديمير پۋتين كۋرسكى اۋماعىنا بارعانىن ورىس اقپاراتى جارىسا جازىپ جاتتى. كوماندالىق باسقارۋ پۋنكتىندە جيىن وتكىزگەن ۆيدەو دا تارادى.

الايدا، ول فوتو-ۆيدەولاردان پرەزيدەنت ءپۋتيننىڭ ناقتى گەولوكاتسياسىن تانىپ-ءبىلۋ مۇمكىن ەمەس. قازىر الەمدىك باق: «پۋتين كۋرسكىگە باردى ما، الدە بارعان كەيىپ تانىتتى ما؟»دەگەن سۇراقتى قىزۋ تالقىلاۋدا.

ءۇش جىل سوعىستا ءوزى «رەسەي جەرى» دەپ پسەۆدورەفەرەندۋم وتكىزىپ، كونستيتۋتسياسىنا قوسىپ العان دونباسسقا بىردە-ءبىر مارتە بارماعان، مايداننىڭ قىز-قىز قايناپ جاتقان شەبىنە اياق باسپاعان پرەزيدەنت پۋتين قالايشا ءالى «جاۋدان» تولىق ازات ەتىلمەگەن كۋرسكىگە بارا قالدى؟

سەبەپ جالعىز: كۋرسكى شايقاسى - ءپۋتيننىڭ حالىقارالىق بەدەلىن اياققا تاپتادى. ونىڭ كامۋفلياج كيىپ، كۋرسكى وبلىسىنا بارعانىنىڭ سەبەبى دە – وسى تۇسكەن بەدەلدى كوتەرۋگە دەگەن جانتالاسى!

زەلەنسكي شە؟

ۋكراينا پرەزيدەنتى زەلەنسكي باسقىنشىلىق سوعىستىڭ ءۇش جىلىندا مايدان شەبىنە سان مارتە تابان تىرەدى. دونباسسقا دا، باحمۋتقا دا، پوكروۆسكىگە دە، باسقا مايدان شەپتەرىنە دە باردى. سولاردىڭ ءبىرسىپىراسى:

2022 جىل. حاركوۆ، حاركوۆ وبلىستارىنداعى قىزىپ جاتقان مايدان شەبىنە باردى، زەلەنسكي.

سول جىلى ماۋسىمدا لۋگانسكى وبلىسىنداعى ليسيچانسكى مايدانىنا اياق باستى. ول كەزدە دە قىزۋ شايقاستار ءجۇرىپ جاتقان.

سول جىلى ماۋسىمدا نيكولاەۆسكى وبلىسىنا، شىلدەدە دنەپروپەتروۆسكى وبلىسىنا بارىپ، ساربازدارمەن جۇزبە-ءجۇز جولىقتى.

2022 جىلدىڭ قىركۇيەگىندە پرەزيدەنت زەلەنسكي جاۋ شەگىنىپ بارا جاتقان يزيۋمگە، قاراشادا حەرسون وبلىسىنا اياق باستى. بۇل جاقتان جاۋ ەندى عانا شەگىنىپ، اتىس ءجۇرىپ جاتقان اۋماقتار ەدى.

2022 جىلدىڭ جەلتوقسانىندا پرەزيدەنت زەلەنسكي دونباسسقا باردى. ناعىز قيانكەسكى شايقاستار سول جاقتا ءجۇرىپ جاتقان.

6 جەلتوقساندا پرەزيدەنت زەلەنسكي سلاۆيانسكى قاقپاسىنان ۆيدەو ۇندەۋ ءتۇسىرىپ، پرەزيدەنت پۋتينگە سوققى جاسادى. «مىقتى بولساڭ، مەن سەكىلدى ءجۇر! مەن ساربازدارىممەن بىرگەمىن»، - دەدى.

زەلەنسكي ءوز ءومىرىن بەيگەگە تىككەن تاعى ءبىر جايت 2022 جىلدىڭ جەلتوقسانى اياقتالار ۋاقىت. پرەزيدەنت زەلەنسكي قانقاساپ سوعىس ءجۇرىپ جاتقان باحمۋتقا باردى.

2023 جىلى پرەزيدەنت زەلەنسكي سوعىس ءجۇرىپ جاتقان اۆدەەۆكاعا 2 مارتە باردى. بۇل كەزدەردە اۆدەەۆكا ءۇشىن جان الىسىپ، جان بەرىسكەن ۇرىس ءجۇرىپ جاتقان. زەلەنسكي مايدان شەبىنە ءوزى بارىپ، جاۋىنگەرلەرگە رۋح بەردى.

سول جىلدىڭ مامىرىندا پرەزيدەنت زەلەنسكي مارينكا مەن ۋگلەدارداعى مايداننىڭ الدىڭعى شەبىنە بىراق باردى.

ارادا ءبىر اي ءوتتى دەگەندە زەلەنسكي بەرديانسكى مەن مەليتوپەلدەگى مايداننان كورىندى.

ونان سوڭ تامىزدا زەلەنسكي باحمۋت باعىتىنداعى قىزىل نۇكتە - چاسوۆ يارعا باردى. سول ايدا دونەتسكى وبلىسىنداعى مايداننىڭ الدىڭعى شەبىنە اياق باستى.

ال 2024 جىلى پرەزيدەنت زەلەنسكي رابوتينو، كۋپيانسكى، زاپوروج، سلاۆيانسكى، چاسوۆ يار مايداندارىنا باردى. ال 2024 جىلدىڭ ماۋسىمىندا زەلەنسكي قانقاساپ ۇرىس ءجۇرىپ جاتقان پوكروۆسكى دالاسىنا باردى.

Abai.kz