تۇركيا ساقشىلارى 19 ناۋرىز كۇنى «زاڭسىز اقشا جىمقىردى»، «تەرروريستەرگە كومەكتەستى» دەگەن كۇدىكپەن ىستامبۇل مەرى ەكرەم يماموعلۋ مەن ونىڭ سەنىمدى سەرىكتەرىن تۇتقىندادى. بارلىعى 100 ادام كۇدىكتى رەتىندە ۇستالعان. ولاردىڭ قاتارىندا كەڭەسشىسى ەرتان يىلتىز، باق-پەن بايلانىستى كەڭەسشىسى مۇرات ونگۋن جانە مەديا، كينو، جارناما سالاسىنداعى تانىمال تۇلعالار بار.

ەكرەمنىڭ ايەلىنىڭ تاۋەلسىز ارنالارعا ايتۋىنشا، قۇقىقتىق ورگان قىزمەتكەرلەرى ەلەڭ-الاڭدا 13 جاستاعى قىزدارىمەن بىرگە سارەسىلەرىن ءىشىپ وتىرعاندا، باسا-كوكتەپ كىرىپ، جۇبايىن ۇستاپ اكەتكەن. ىلە-شالا ەكرەمنىڭ پارتيالاستارى مەن جاقتاستارى كوشەگە شىعىپ: «ۇكىمەت، بيلىكتەن كەت!»، «ەكرەم، سەن جالعىز ەمەسسىڭ!» دەپ ۇرانداتقان.

وسىدان كەيىن ەل ىشىندە الەۋمەتتىك جەلىلەردىڭ جۇمىسى شەكتەلدى. سونىمەن قاتار، مەردىڭ ۇستالۋىنا بايلانىستى ىستامبۇلدا 23 ناۋرىزعا دەيىن دەمونستراتسيالار مەن ميتينگىلەر وتكىزۋگە تىيىم سالىندى.

ەكرەم يماموعلۋ 54 جاستا. ەردوعانعا باستى باسەكەلەس - رەسپۋبليكالىق حالىق پارتياسىنىڭ وكىلى. ول وسى اپتانىڭ سوڭىندا پارتيا اتىنان 2028 جىلعى پرەزيدەنت سايلاۋىنا ۇمىتكەر دەپ جاريالانۋى كەرەك ەدى. سول سەبەپتى ساياسي ساراپشىلار ونىڭ ۇستالۋىنان ساياسي استار ىزدەپ وتىر. «پرەزيدەنت سايلاۋى مەرزىمىنەن بۇرىن ءوتۋى مۇمكىن» دەپ بولجايدى.

ساياساتتانۋشى بەرك ەسسەن: «بۇل ارەكەتتى ساياسي قارسىلاسقا باعىتتالعان توڭكەرىس دەپ باعالاۋعا بولادى. بۇل قادام تۇركيانى رەسەي، بەلارۋس سياقتى ديكتاتورلىق مەملەكەتكە ايلاندىرادى»، - دەيدى.

رەسپۋبليكالىق حالىق پارتياسىنىڭ توراعاسى وزگيۋر وزەل ەردوعاندى «سايلاۋدى قولدان ۇيىمداستىرماقشى» دەپ ايىپتادى.

ىستامبۇلداعى تولقۋلاردان كەيىن تۇرىك ليراسىنىڭ اقش دوللارىنا شاقققانداعى قۇنى ەڭ تومەنگى رەكوردتىق دەڭگەيگە دەيىن قۇلدىرادى. 1 اقش دوللارى 11,99%-عا قىمباتتاپ، 41,1 ليرا بولدى. وسىلايشا، تۇركيا تاريحىندا امەريكالىق ۆاليۋتا باعامى العاش رەت 40 ليرادان اسقان.

Borsa Istanbul قورىنىڭ اشىلۋ كەزىندە بازالىق يندەكس 6,9%-عا تومەندەپ، ساۋدا-ساتتىق كىلت توقتادى. ەلدىڭ 10 جىلدىق تاۋەلسىز وبليگاتسيالارىنىڭ قۇنى دا قۇلدىراي جونەلدى. اسىرەسە، مۇندايدى كۇتپەگەن شەتەلدىك ينۆەستورلار شىنداپ ابدىراپ قالدى.

ال ەردوعاننىڭ ميتينگ وتكىزۋگە سالعان تىيىمىنا قاراماستان بۇگىن ىستامبۇل كوشەلەرى ادامدارعا لىق تولدى. قالا مەرى عيماراتى الدىندا جينالعاندارعا رەسپۋبليكالىق حالىق پارتياسىنىڭ كوشباسشىسى وزگيۋر وزەل: «مىنا بولعان جاعداي – توڭكەرىس جاساۋعا ارەكەتتەنۋ» دەپ مالىمدەدى.

Abai.kz