جاقىندا وتكەن ۇكىمەت وتىرىسىنان ءمالىم بولعانداي بيىل ەلىمىزدىڭ مادەني كەڭىستىگىن جاڭا مۇمكىندىكتەر، جاڭا جوبالار كۇتىپ تۇر. شىلدەنىڭ بىرىنە دەيىن كرەاتيۆتى يندۋستريانى دامىتۋ قورى قۇرىلاتىن بولدى.

سالاعا جاۋاپتى مينيسترلىك وكىلدەرىنىڭ سوزىنشە، قوردىڭ بيۋدجەتى ۇلتتىق لوتەرەيا وپەراتورى قىزمەتىنەن بولىنەتىن 3% اۋدارىم ەسەبىنەن قالىپتاستىرىلادى.

«قور قىزمەتىنىڭ ماڭىزدى باعىتتارىنىڭ ءبىرى – كرەاتيۆتى يندۋسترياداعى ۆەنچۋرلىق ينۆەستيتسيالاردى دامىتۋ. وسىعان بايلانىستى احقو بازاسىندا باسقارۋشى كومپانيالاردىڭ پۋلىن تارتا وتىرىپ، جەدەل جانە قايتارىمدى نەگىزدە اقشالاي قاراجاتتى ءتيىمدى ورنالاستىرۋعا مۇمكىندىك بەرەتىن ۆەنچۋرلىق بولىمشە قۇرىلاتىن بولادى»، – دەيدى.

كرەاتيۆتى يندۋستريانىڭ جىلىكتى سالاسى سانالاتىن كينو وكىلدەرىنىڭ دە ءوز ايتارى بار ەكەن. قازاق كينوسىنىڭ رەكوردىن ورناتقان «بيزنەس پو كازاحسكي» جوباسىنىڭ اۆتورى نۇرلان قوياانباەۆ سالا ماماندارى باس قوسقان كەلەلى كەڭەسكە ءوزىنىڭ شاقىرىلماعانىنا نارازى ەكەن.

«مەملەكەتتىك دەڭگەيدە كينوعا بايلانىستى جيىندار ءوتىپ جاتىر! قازاق كينوسىنىڭ اتىنان وسى جيىندا الەكساندر ۆلاديميروۆيچ اكسيۋتيتس، يگور تساي ت.ب كينو ماماندار قاتىسىپتى. ولارعا قارسىلىعىمىز جوق، بىراق ءبىزدى نەگە شاقىرمايدى؟ وسىنداي ماڭىزدى جيىندارعا «اۋىلدان» شىققان پروديۋسەرلەردى دە شاقىرىڭدارشى. وسى جيىندا وكىنىشكە وراي، 30 جىل كينوعا ميللياردتاپ اقشا بولىنگەنى تۋرالى ايتىلمادى، سول اقشا ماعىنالى كينولارعا جاراتىلۋ كەرەك ەدى… ول اقشالاردى كىم الدى»، - دەپ وكپە-رەنىشىن ءبىلدىرىپتى.

ونىڭ ايتۋىنشا، ازىلكەشتەر تۇسىرگەن كينولار قازاق كينو نارىعىنان ويىپ ورىن الىپ، گولليۆۋدتىڭ قوماقتى قارجىعا تۇسىرگەن كينولارىن ىعىستىرعان.

«وسىدان 7-8 جىل بۇرىن كينوتەاترلاردا كورسەتىلگەن كينولاردىڭ 99,9% شەتەلدىك كينولار بولعان، ياعني 99,9% اقشا شەتەلگە كەتىپ جاتتى! 30 جىل بويى! قازاق تىلىندە كينولار كينوتەاترلاردا كورسەتىلمەدى!

قازاقتىڭ جىگىتتەرى مەن قىزدارى بىرىگىپ، ءوز اقشالارىنا، مەملەكەتتەن قاراجات الماي كينو تۇسىرە باستادى، قولدان كەلگەنشە! بۇگىن 80-100 ملن دوللارعا جۋىق قازاق كينوسالاسى قالىپتاستى! سالاداعى بارلىق ماماندار جۇمىسپەن قاماتاماسىز ەتىلدى! شەتەلدىك كينو ءداۋىرى اياقتالدى»، - دەيدى قويانباەۆ.

ۇكىمەتكە دە ايتار ۇسىنىس-كەڭەستەرى بار ەكەن:

«پرەزيدەنتىمىز ايتقانداي، ءار سالانى كوتەرۋ ءۇشىن مىقتى باسشىلار كەرەك. كينو سالاسىنا مىقتى باسشى كەرەك! ايتپاقشى، گولليۆۋدتا كينوستۋديالاردىڭ باسشىلارى رەجيسسەرلار ەمەس، مىقتى بيزنەس مەنەدجەرلەر!

كىم ايتتى گولليۆۋدتتىڭ بارلىق كينوسى جاقسى دەپ؟! 2024 جىلى قازاقستاندا گولليۆۋدتىڭ 200-گە جۋىق كينوسى كورسەتىلدى. وزىڭىزگە ۇناعان كينولاردى اتاپ وتەيىكشى، مىسالى، كورول لەۆ، مۋانا، گلادياتور، ديۋنا… تاعى كوپ بولسا 5-6 كينونى ايتا الامىز، قالعان 190 گولليۆۋدتىڭ كينوسىن كىم كوردى، كوڭىلدەن شىققان جوق. بىزدە دە سولاي 100 قازاقتىڭ كينوسى شىقتى، ونىڭ 5-6-سى عانا كوڭىلدەن شىقتى، قالعان 94 كينو السىزدەۋ. ءوزىمىزدى جامانداي بەرمەي، ءبىر ءبىرىمىزدى قولداپ جۇرەيىك»، - دەپ جازدى پروديۋسەر.

Abai.kz