بۇگىن Abai.kz اقپاراتتىق پورتالى وقىرماندارىنىڭ نازارىنا الەم جاڭالىقتارىنان شولۋ ۇسىنباقپىز...

سۋرەت: ammiac.com سايتىنان الىندى.

رەسەي، يران جانە قىتاي يادرولىق باعدارلامانى تالقىلايدى

بۇگىن رەسەي، قىتاي جانە يران اراسىنداعى يران يادرولىق باعدارلاماسى ماسەلەلەرى بويىنشا ۇشجاقتى كەلىسسوزدەر ماسكەۋدە وتەدى، دەپ حابارلادى يران ءسىم رەسمي وكىلى ەسمايل باگاي.

تۇراقتى بريفينگتە: «بۇگىن نەمەسە ەرتەڭ ماسكەۋدە ءۇش ەل فورماتىنداعى كەزەكتى كەزدەسۋ وتەدى، وندا رەسەي، قىتاي جانە يران يادرولىق باعدارلاماعا، بىرلەسكەن جان-جاقتى ءىس-قيمىل جوسپارىنا جانە بۇۇ قاۋىپسىزدىك كەڭەسىنىڭ 2231 قارارىنا بايلانىستى ءتۇرلى ماسەلەلەردى تالقىلايدى»، - دەپ مالىمدەدى ديپلومات.

بۇعان دەيىن، 14 ناۋرىزدا بەيجىڭدە ءۇش ەلدىڭ سىرتقى ساياسات ۆەدومستۆولارى باسشىلارىنىڭ ورىنباسارلارى دەڭگەيىندە يادرولىق تاقىرىپ بويىنشا كونسۋلتاتسيالار وتكەن بولاتىن. كەزدەسۋ قورىتىندىسى بويىنشا رەسەي ءسىم قاتىسۋشىلاردىڭ كەلىسسوزدەر ارقىلى «ومىرشەڭ جانە ۇزاق مەرزىمدى شەشىمدەردى» ىزدەۋگە دەن قويۋعا كەلىستى دەپ حابارلاعان ەدى.

سۋرەت: bbc.com سايتىنان الىندى.

رەسەيلىك قارۋدان ءۇندى كومپونەنتتەرى تابىلدى

رەسەي قارۋىندا العاش رەت ءۇندى ءوندىرىسىنىڭ كومپونەنتى تابىلدى، دەپ حابارلادى ۋكراينا قورعانىس مينيسترلىگىنىڭ باس بارلاۋ باسقارماسى.

ۆەدومستۆو رف قارۋىنىڭ التى تۇرىندە قولدانىلاتىن 200-گە جۋىق جاڭا بولشەكتەر مەن كومپونەنتتەر تۋرالى مالىمەتتەردى جاريا ەتتى، ونىڭ ىشىندە رەسەيلىك «شاحەد» ۇلگىسىندەگى ۇۇا CRP-انتەنناسى، سولتۇستىك كورەيانىڭ KN-24 بالليستيكالىق زىمىراندارى، «كينجال» ح-47 زىمىرانىنداعى كومپيۋتەر، Supercam S350, «گەربەر» جانە Zala دروندارى بار. اتاپ ايتقاندا، «گەران-2» ۇشقىشسىز ۇشاقتارىنا ارنالعان CRP-انتەننالاردان تەك ەكى امەريكالىق چيپ تابىلدى.

«بۇل رف-نىڭ وعان قارسى سانكتسيالار ەنگىزگەن ەلدەردىڭ قۇرامداس بولىكتەرىنە تاۋەلدىلىكتى ازايتۋعا تالپىنىسىن ايعاقتايدى»، - دەپ ءتۇسىندىردى باس پروكۋراتۋرا.

بۇدان باسقا، بارلاۋشىلار 2025 جىلى ۋكرايناعا شابۋىل جاساعان «شاحەدتەردە» قىتاي تىلىندە تاڭبالانعان جاڭا كەدەرگىدەن قورعالعان انتەننالار پايدا بولعانىن انىقتادى. وسىنداي انتەننالاردىڭ بىرىندە 15 كومپونەنتتىڭ تەك ەكەۋىن امەريكالىق Texas Instruments جانە Linear Technologies كومپانيالارى وندىرگەن. باسقا كوپتەگەن بولشەكتەر قىتايدا جاسالعان.

«رەسەيلىك قارۋدان العاش رەت ءۇندىستان ءوندىرىسىنىڭ كومپونەنتى - Aura Semiconductor كومپانياسىنىڭ تاكتىلىك بۋفەرى تابىلدى»، - دەلىنگەن حابارلامادا.

سۋرەت: bezformata.com سايتىنان الىندى.

يران مەن اقش تەكەتىرەسى: تەگەران قاتاڭ جاۋاپپەن قورقىتتى

يرانعا قارسى كەز كەلگەن سىرتقى اگرەسسيا ەلدىڭ قارۋلى كۇشتەرى تاراپىنان قاتاڭ سوققىعا ۇشىرايدى. بۇل تۋرالى يسلام رەسپۋبليكاسى ءسىم رەسمي وكىلى ەسمايل باگاي اقش پەن يزرايل رەسمي تۇلعالارىنىڭ يران يادرولىق نىساندارىنا سوققى بەرۋ مۇمكىندىگى تۋرالى مالىمدەمەلەرىنە تۇسىنىكتەمە بەرۋ جونىندەگى وتىنىشىنە جاۋاپ رەتىندە مالىمدەدى.

«يران يسلام رەسپۋبليكاسىنىڭ قارۋلى كۇشتەرى كەز كەلگەن قاۋىپ-قاتەرگە قارسى تۇرۋ قابىلەتىن ۇدايى جەتىلدىرەدى. ءبىز ەلىمىزگە قاتىستى كەز كەلگەن شابۋىل مەن اگرەسسياعا بار كۇشىمىزبەن جاۋاپ بەرەمىز. يرانعا قاۋىپ توندىرەتىندەر، ەگەر بۇل قاۋىپ-قاتەرلەر ىسكە اسىرىلسا، ولار دەرەۋ جان-جاقتى جاۋاپ الاتىنىن بىلۋگە ءتيىس»، - دەدى ديپلومات اپتا سايىنعى بريفينگتە. «يسلام رەسپۋبليكاسىنا قاتىستى كەز كەلگەن قاۋىپ-قاتەرگە قاتاڭ جاۋاپ بەرىلەدى»، - دەپ ءسوزىن تولىقتىردى.

بۇعان دەيىن ءيزرايلدىڭ قورعانىس ءمينيسترى يسراەل كاتس پالەستينالىق حاماس قوزعالىسىنىڭ باسشىلىعىن يرانمەن تىكەلەي بايلانىستا بولدى دەپ ايىپتاعان بولاتىن.

Abai.kz