«ورمانداعى ءورت قاۋىپسىزدىگىن اۋەدەن كۇزەتۋگە بولىنگەن قاراجات جەتپەي جاتىر». ۇكىمەت وتىرىسىندا ەكولوگيا جانە تابيعي رەسۋرستار ءمينيسترى ەرلان نىسانباەۆ وسىنداي ماسەلە كوتەرىپ، ۇكىمەت باسشىسىنان كومەك سۇرادى.

«مەملەكەتتىك ورمان قورىنىڭ ورتكە نەعۇرلىم وسال ۋچاسكەلەرىن باقىلاۋ ءۇشiن ۇشۋ ۋاقىتىنىڭ 10 453 ساعاتتىق نورماسى بەلگىلەندى. الايدا رەسپۋبليكالىق بيۋدجەتتە قاراستىرىلعان قارجى جەتكىلىكسىز. قۇرمەتتى ولجاس ابايۇلى، وسى ماڭىزدى ماسەلەنى شەشۋگە ىقپال ەتۋىڭىزدى سۇرايمىز»، — دەدى ۆەدومستۆو باسشىسى.

مينيسترلىكتىڭ قوسىمشا بەرگەن اقپاراتىنا سەنسەك، بۇل ماقساتقا تاعى 11 ملرد تەڭگە كەرەك.

ايتا كەتەيىك، شىعىس قازاقستان وبلىسى زايسان اۋدانىندا ءورت سوندىرۋشىلەر قامىس پەن ءشوپتى شارپىعان ءتىلسىز جاۋمەن ءالى كۇرەسىپ جاتىر. سوننىمەن قاتار ورمان شارۋاشىلىقتارىن تەحنيكامەن جابدىقتاۋ بيۋدجەتى 5,6 ملرد تەڭگەگە قىسقارعان.

قر پرەمەر-ءمينيسترى ولجاس بەكتەنوۆ بولسا پاۆلودار جانە اباي وبلىسىندا بولعان تابيعي ءورت كەزىندە مەملەكەتتىك ورگانداردىڭ ءىس-قيمىل الگوريتمى ساقتالماعانىن سىنعا الدى.

«ءورت ءسوندىرۋ كەزىندە شۇعىل ارەكەت ەتىپ، ءتيىستى كۇشتەردى جۇمىلدىرۋ ءۇشىن جاڭادان مەملەكەتتىك ورگانداردىڭ ءىس-قيمىل الگوريتمى ازىرلەنگەن بولاتىن. الايدا بيىل پاۆلودار جانە اباي وبلىستارىندا بولعان تابيعي ءورت بۇل الگوريتمنىڭ ورىندالماي وتىرعانىن كورسەتتى. مىسالى، اباي وبلىسىندا ورمان شارۋاشىلىعى مەملەكەتتىك مەكەمەسىنىڭ قىزمەتكەرلەرى توتەنشە جاعدايلار، ىشكى ىستەر جانە قورعانىس مينيسترلىكتەرىنە ءورتتىڭ شىققانى تۋرالى تەز ارادا حابار بەرمەگەن. پاۆلودار وبلىسىندا دا دال وسىنداي جاعداي ورىن الدى»، — دەدى ول ۇكىمەت وتىرىسىندا.

Abai.kz