شىمكەنتتەگى “جاستار رەسۋرستىق ورتالىعىنىڭ” بىرنەشە قىزمەتكەرى ينتەرنەتتە بەلسەندىلىك تانىتپاعان – اتاپ ايتقاندا، ورتالىقتىڭ جەلىدەگى پاراقشاسىنا لايك باسپاعان قىزمەتكەرلەرگە باسشىلىق قىسىم جاساپ، جازباشا جانە اۋىزشا ەسكەرتۋ جاسالىپ جاتقانىن حابارلادى. بۇل جونىندە اقپاراتتى جۋرناليست ازات ديداربەك جازدى.

“جاستار ورتالىعى قالامىزدىڭ جاستار ماسەلەسىن شەشەدى دەگەنگە سەنىڭكىرەمەيتىن ەدىك، ەندى لايك باسقان-باسپاعان قىزمەتكەرلەرىن ءتىزىپ، تەكسەرىپ، وزدەرى حاتتا جازعانداي تىرناقشا ىشىندەگى “ەسكەرتۋ” جاساپ، جۇمىس جاساۋىنا كەدەرگى كەلتىرىپ جۇرسە، وڭبايدى.. بۇگىن (16 ءساۋىر – رەد.) وسىنداي قىسىم كورە بەرگەن ورتالىق قىزمەتكەرىنىڭ مازاسى قاشىپ، قۇلاپ قالىپ، جەدەل-جاردەم شاقىرىپ، العاشقى مەديتسينالىق كومەككە جۇگىنۋىنە تۋرا كەلدى!” دەپ جازىپ، جەرگىلىكتى اكىمدىكتەردى بەلگىلەپ، وسى ماسەلەگە نازار اۋدارۋدى سۇراعان.

سۋرەت: ازات ديداربەكتىڭ پاراقشاسىنان الىنعان.

ازاتتىق 17 ساۋىردە اتالعان ورتالىققا حابارلاسقان كەزدە ءبىر قىزمەتكەر تەلەفون كوتەرگەنمەن سول ساتتە بايلانىس ءۇزىلدى. كەيىن ءتىلشى تاعى بىرنەشە رەت حابارلاسىپ كورگەنمەن ەشكىم تۇتقانى كوتەرگەن جوق.

سۋرەت: ازات ديداربەكتىڭ پاراقشاسىنان الىنعان.

Qaz365.kz سايتى شىمكەنت قالالىق ىشكى ساياسات جانە جاستار ىستەر جونىندەگى باسقارماسىنىڭ باسشىسى ايگەرىم جۇماعۇلوۆانىڭ سوزىنەن تۇسىنىكتەمە كەلتىردى.

“مەن جاعدايدىڭ العاشقى جاريالانۋىنان باستاپ حاباردارمىن. وزىمە جۇمىس جوسپارىن بەلگىلەدىم. جاعداي بويىنشا شەشىم ادىلەتتى جانە وبەكتيۆتى تۇردە قابىلدانادى” دەدى ول باسىلىمعا.

دەرەككوزى: ازاتتىق راديوسى

Abai.kz