قالامىزدا «تازا قازاقستان» اكتسياسى ءالى دە جالعاسىپ جاتىر. بۇل ارقىلى الماتى ەكولوگيالىق جاۋاپكەرشىلىگى جوعارى قالا ەكەنىن كورسەتىپ كەلەدى.  كەزەكتى ءىس-شارا بارىسىندا شاھارداعى تۇرمىستىق قالدىقتارعا ارنالعان كونتەينەرلەر مەن الاڭقايلار ارنايى تازالاۋدان وتكىزىلدى. بۇل – تەك سانيتارلىق شارا عانا ەمەس، ەكولوگيالىق مادەنيەتتى قالىپتاستىرۋداعى ماڭىزدى قادام.

24 ءساۋىر كۇنى قالامىزدىڭ اۋەزوۆ اۋدانىنداعى ءۇش مەكەنجايدا ورنالاسقان كونتەينەرلەر مەن قوقىس الاڭقايلارىنا تازالىق جۇمىستارى جۇرگىزىلدى.  ايتالىق، 3-ىقشاماۋدان، №14-ءۇي،  №65-ءۇي جانە 1-ىقشاماۋدانداعى № 77 ۇيلەردىڭ اۋلالارىنا  ورنالاسقان  كۇندەلىكتى تۇرمىستىق قالدىقتارعا ارنالعان كونتەينەرلەرگە دەزينفەكتسيا جاسالدى. شارا بارىسىندا  تەك كونتەينەرلەر عانا ەمەس، ولار ورنالاسقان الاڭقايلار دا وڭدەلىپ، دەراتيزاتسيا جۇمىستارى جۇرگىزىلدى. بۇل ەندى ءبىر جاعىنان اۋرۋ تاراتۋشى كەمىرگىشتەرمەن كۇرەستىڭ دە ءتيىمدى ءادىسى رەتىندە قولعا الىنعان.

كونتەينەرلەر جاقىن ورنالاسقان ۇيلەردىڭ تۇرعىندارى دا تازالىق شاراسىن  قولدايتىنىن جەتكىزدى.

– قالدىقتار جينالاتىن ورىن تازارتىلىپ، ارنايى سۇيىقتىقتارمەن وڭدەلىپ جاتىر. اۋاسى مەن اينالاسى تازارىپ، كوڭىلىمىز دە ورنىعىپ جاتقانداي. بالالارىمىز ەمىن-ەركىن ويناي الاتىن بولدى. وسىنداي يگى  جۇمىستار  كوبەيسە ەكەن دەيمىن. قالانىڭ تازالىعى – ءاربىر تۇرعىننىڭ جاۋاپكەرشىلىگى، سوندىقتان بارشامىز يگى ىسكە اتسالىسۋىمىز كەرەك، – دەيدى 3-ىقشاماۋدان تۇرعىنى گۇلنار مىرزاحانقىزى.

تاقىرىپقا وراي: ماحانبەت  سانسىزباەۆ، الماتى قالاسىنىڭ ەكولوگيا جانە قورشاعان ورتانى قورعاۋ باسقارماسىنىڭ قالدىقتاردى باسقارۋ ءبولىمىنىڭ باس مامانى:

– جۇرگىزىلىپ جاتقان شارا تەك سىرتقى تازالىق ەمەس، تۇرعىنداردىڭ  دەنساۋلىعىن قورعاۋ. كونتەينەرلەر مەن الاڭقايلاردى دەزينفەكتسيالاۋ – ءتۇرلى اۋرۋلاردىڭ الدىن الۋدىڭ بىردەن-ءبىر جولى. بۇل جۇمىس الداعى ۋاقىتتا دا جۇيەلى تۇردە جۇرگىزىلىپ وتىرادى، - دەيدى.

Abai.kz