سىرتقى ىستەر ءمينيسترىنىڭ ورىنباسارى الىبەك باقاەۆ ۋكراينادا جۇرگەن قازاقستاندىقتارعا قاتىستى پىكىر ءبىلدىردى.

ونىڭ سوزىنشە، قازىرگى تاڭدا ديپلوماتتار ۋكراينادا قازاقستان ازاماتتارى بار-جوعىن تەكسەرىپ جاتىر.

– ديپلوماتتار، اتاپ ايتقاندا شەتەلدەگى قازاقستان رەسپۋبليكاسىنىڭ كونسۋلدارى، قازاقستاندىق ازاماتتارمەن اينالىسادى. ءسىز مەنەن “تىزىمدە قازاقستان ازاماتتارى بار ما؟” دەپ سۇرادىڭىز. ءبىز ءدال قازىر وسى تىزىمدە قازاقستان رەسپۋبليكاسىنىڭ ازاماتتارى بار ما، جوق پا – سونى انىقتاپ جاتىرمىز. ال ونى ءبىلۋ ءۇشىن بىزگە كەزدەسۋلەر وتكىزۋ قاجەت. ول جەردە قازاقستان ازاماتتارى بار دەپ الدىن الا مالىمدەۋگە نەمەسە اشىق ايتۋعا قۇقىمىز جوق، دەيدى باقاەۆ.

ء"ومىر سۇرگىم كەلەدى" (حوچۋ جيت) اتتى ۋكراينالىق اقپاراتتىق جوبا ۋكراينا اۋماعىندا رەسەي اسكەرى قاتارىندا سوعىسقا قاتىسقان دەگەن قازاقستاننىڭ 661 ازاماتىنىڭ ءتىزىمىن جاريالادى. 2024 جىلدىڭ سوڭىنداعى دەرەككە سايكەس، ولاردىڭ كەمىندە 78-ءى قازا تاپقان.

جوبا اۆتورلارىنىڭ ايتۋىنشا، رەسەيلىكتەر "جاقىن شەتەلدەردەن" – قازاقستان، وزبەكستان، تاجىكستان مەن قىرعىزستاننان شىققان ميگرانتتاردى سوعىسقا اتتاندىرۋ ىسىمەن اينالىسادى.

بۇعان دەيىن قازاقستاننىڭ مادەنيەت جانە اقپارات ءمينيسترى ايدا بالاەۆا ۋكرايناعا سوعىسقا كەتىپ جاتقان قازاقستاندىقتار جايلى سۇراققا جاۋاپ بەرگەن بولاتىن.

بىزدە سوعىسقا كەتۋى مۇمكىن قازاقستاندىقتاردىڭ جاعدايىنا الاڭداپ جازعان ءجۋرناليستى پوليتسيا ۇستاپ اكەتەدى (لۇقپان احمەدياروۆ). ال رەسەيگە قارايتىن ءبىر بۇقارالىق اقپارات قۇرالى سوعىسقا اتتانعان قازاق جىگىتتى ماقتاپ، ەمىن-ەركىن ناسيحاتتايدى (“سپۋتنيك قازاقستان” سايتى). بىزدە نە بولىپ جاتىر؟ وسىنداي كەرەعارلىقتى ءتۇسىندىرىپ بەرە الاسىز با؟ يدەولوگيا جاعىنان بىزدە پروبلەما بار دەپ ويلامايسىز با؟ – دەپ سۇرادى Ulysmedia.kz تىلشىسى.

بۇل سۇراققا جاۋاپ بەرگەن ايدا بالاەۆا “ەشقانداي پروبلەما جوق” دەپ جاۋاپ بەردى. ايتۋىنشا، اقپارات كەڭىستىگىندە اقپارات اعىنى قارقىندى ءجۇرىپ جاتقاننان كەيىن ءارتۇرلى مالىمەت تارايدى.

دەرەككوز: qaz.ulysmedia.kz

Abai.kz