باس پروكۋرور بەرىك اسىلوۆ ءماجىلىس دەپۋتاتىنىڭ ساۋالىنا جولداعان جاۋاپتا اتىراۋ قالاسىندا اراب جازۋى بار تۋمەن سۋرەتكە تۇسكەن تۇرعىندار قانداي جازاعا تارتىلعانىن، تارتىلۋى مۇمكىن ەكەنىن ءمالىم ەتتى.

«اتىراۋ وبلىسىنداعى وقيعا بويىنشا قۇقىققا قايشى əرەكەت جاساعان 4 قىزدى سوت اكىمشىلىك قۇقىق بۇزۋشىلىق تۋرالى كودەكستىڭ 434-بابىنىڭ 1-بولىگىمەن (ۇساق بۇزاقىلىق) əكىمشىلىك جاۋاپكەرشىلىككە تارتتى»، - دەپ جازىلعان جاۋاپتا. 

سونداي-اق رەسمي مالىمەتتە زاڭ بۇزعان تۇلعالاردىڭ اتى-ءجونى مەن ارقالاعان ايىپپۇل كولەمى اشىق كورسەتىلگەن. ونداعى مالىمەتكە سۇيەنسەك، ءبىر ادامعا 78 640 تەڭگە، تاعى 3 ادامعا 39 320 تەڭگە ايىپپۇل سالىنعان.

«سونىمەن بىرگە اتالعان فاكتى بويىنشا 2025 جىلعى 27 ناۋرىزدا اتىراۋ قالاسىنىڭ پوليتسيا باسقارماسى قىلمىستىق كودەكستىڭ 372-بابىمەن (مەملەكەتتىك رəمىزدەردى قورلاۋ) سوتقا دەيىنگى تەرگەپ-تەكسەرۋدى باستادى. قىلمىستىق ءىس شەڭبەرىندە ءتيىستى ساراپتاما تاعايىندالدى. ودان بولەك ساۋالدا كورسەتىلگەن ۋəجدەر تەكسەرىلەدى. ولاردىڭ نəتيجەلەرى بويىنشا قۇقىقتىق باعا بەرىلىپ، قىلمىستىق ءىس بويىنشا پروتسەستىك شەشىم قابىلدانادى»، - دەپ جازادى بەرىك اسىلوۆ.

باس پروكۋرور ستاندارتقا ساي ەمەس مەملەكەتتىك تۋلاردى ساتقان ماركەتپلەيس سورەدەن ول ءونىمدى الىپ تاستاعانىن دا جەتكىزدى.

«قىلمىستىق قۋدالاۋ ورگانىمەن «Ozon» ماركەتپلەيسىنىڭ قازاقستانداعى وكىلدىگىنە قىلمىستىق قۇقىق بۇزۋشىلىقتار جəنە باسقا دا زاڭ بۇزۋشىلىقتار جاساۋعا ىقپال ەتكەن مəن-جايلاردى جويۋ جونiندەگi ۇسىنۋ (قىلمىستىق پروتسەستىك كودەكستىڭ 200-بابىنىڭ تəرتىبىندە) قىلمىستىق ءىس شەڭبەرىندە جولداندى. نəتيجەسىندە «Ozon» سايتىنان جازۋى بار قازاقستان رەسپۋبليكاسىنىڭ مەملەكەتتىك تۋىن ساتۋ تۋرالى، سونداي-اق كەز كەلگەن ءدىني ماتەريالدارعا قاتىستى بارلىق جارناما الىنىپ تاستالدى»، - دەلىنگەن جاۋاپتا.

ەسكە سالساق، ناۋرىز ايىندا اتىراۋ وبلىسىندا ارابشا جازۋى بار دا مەملەكەتتىك تۋمەن فوتوعا تۇسكەندەر ۇستالعان بولاتىن.

Abai.kz