قازاقستان رەسپۋبليكاسىنىڭ پرەمەر-ءمينيسترى

و.ا. بەكتەنوۆ مىرزاعا!

قۇرمەتتى ولجاس ابايۇلى!

12 مامىر كۇنى ءسىزدىڭ 2025 جىلعى 25 ساۋىردەگى №68 قانداس مارتەبەسىن بەرۋ تەتىگىن وزگەرتۋ بويىنشا ۇسىنىستار ازىرلەۋ ءۇشىن جۇمىس توبىن قۇرۋ تۋرالى وكىمگە قول قويىپ، «وسى وكىمگە قوسىمشاعا سايكەس قۇرامدا قانداس مارتەبەسىن بەرۋ تەتىگىنە زاڭنامالىق تۇزەتۋلەر ەنگىزۋ جونىندەگى ۇسىنىستار ازىرلەۋ ءۇشىن جۇمىس توبى قۇرىلسىن. جۇمىس توبى 2025 جىلعى 30 مامىرعا دەيىن مەرزىمگە قانداس مارتەبەسىن بەرۋ ءتارتىبىن قايتا قاراۋ بويىنشا زاڭنامالىق تۇزەتۋلەر ازىرلەسىن جانە ولاردى قازاقستان رەسپۋبليكاسىنىڭ ۇكىمەتى اپپاراتىنا ەنگىزسىن!» دەگەن تاپسىرما بەرگەنىڭىزدى كورىپ، قاتتى قۋاندىم.

ءتىپتى، «قانداس» مارتەبەسىن بەرۋ تەتىگىنە زاڭنامالىق تۇزەتۋلەر ەنگىزۋ جونىندەگى ۇسىنىستار ازىرلەيتىن جۇمىس توبىنىڭ قۇرامىن دا بەكىتىپ قويىپسىز.

بىراق، قانداي وزگەرىستەر ەنگىزىلەتىنى تۋرالى ايتىلماپتى...

قۇرمەتتى ولجاس ابايۇلى!

2015 جىلدىڭ سوڭىندا تيمۋر قۇلىباەۆ پەن كارىم ءماسىموۆ 2013 جىلى قۇردىمعا كەتىرە جازداعان «حالىقتىڭ كوشى-قونى تۋرالى» زاڭى جىل بويى پارلامەنتتە قايتا قارالىپ، تۇزەتىلىپ، كەمەلدەنىپ، سوڭىندا تۇڭعىش پرەزيدەنت نۇرسۇلتان نازارباەۆ قول قويعان بولاتىن.

وكىنىشكە وراي، «قازاقستان رەسپۋبليكاسى كوشى-قون ساياساتىنىڭ 2023 – 2027 جىلدارعا ارنالعان تۇجىرىمداماسى» كوشى-قون ءۇردىسىن رەتتەۋگە ارنالعان سول زاڭدار مەن نورماتيۆتىك قۇجاتتاردىڭ دا، پرەزيدەنتىمىز قاسىم-جومارت توقاەۆتىڭ «دۇنيەجۇزىندەگى قانداستارىمىزدىڭ باسىن تۋعان جەردە بىرىكتىرۋ – ءبىزدىڭ قاسيەتتى پارىزىمىز!» - دەگەن ۇلى ماقساتىنىڭ دا تاس-تالقانىن شىعاردى!

توق ەتەرىن ايتسام، قازاق كوشى كارىم ءماسىموۆ زامانىنداعى بۇرىنعى تاز كەپەشىن قايتا كيدى...

سونىڭ بىرەۋى – بۇگىن ولجاس بەكتەنوۆ قايتا قاراۋ تۋرالى تاپسىرما بەرىپ وتىرعان ەتنيكالىق قازاقتارعا «قانداس» مارتەبەسىن بەرۋ ءتارتىبى!

ءبارىن قۇرتىپ وتىرعان – «حالىقتىڭ كوشى-قونى تۋرالى» زاڭىنىڭ 20-بابىنىڭ 5) تارماعى.

اتالعان نورما 2023 جىلى 19 ساۋىردە سەناتتىڭ ماقۇلداۋىمەن قابىلداندى.

بۇل نورماعا ساي، كوشىپ كەلۋشىلەردى قونىستاندىرۋ ءۇشىن ۇكىمەت ايقىنداعان سەگىز وڭىردەن وزگە توعىز وبلىس پەن ءۇش قالاعا قونىستانعىسى كەلەتىن ەتنيكالىق قازاقتارعا «قانداس» مارتەبەسى بەرىلمەۋى كەرەك!

بىراق، بۇل نورمانىڭ قازاقستان رەسپۋبليكاسىنىڭ كونستيتۋتسياسىنىڭ 21-بابىنا قايشى ەكەنىن ايتىپ، ءبىز ماسەلە كوتەرگەن سوڭ، اتقارۋشى بيلىك توعىز وبلىس پەن ءۇش قالاعا قونىستانعىسى كەلەتىن ەتنيكالىق قازاقتارعا «قانداس» مارتەبەسىن زاڭسىز بەرە باستادى، ءالى بەرىپ كەلەدى.

20-باپتىڭ 5) تارماعى كونستيتۋتسياسىنىڭ 21-بابىنا عانا ەمەس، 12-بابىنىڭ 2 تارماعىنا; 14-بابىنىڭ 2 تارماعىنا دا ساي كەلمەيدى.

ءتىپتى، قازاقستان رەسپۋبليكاسىنىڭ ەڭ قىمبات قازىناسى - ادام جانە ادامنىڭ ءومىرى، قۇقىقتارى مەن بوستاندىقتارى دەگەن كونستيتۋتسيانىڭ 1-بابىن ەسكە الساق، 20-باپتىڭ 5) تارماعى شەتتەن كەلگەن ەتنيكالىق قازاقتاردىڭ قۇقىقتارى «قىمبات قازىنا» سانالماي تۇر. بۇل – ءبىر!

ەكىنشىدەن، «قانداس» مارتەبەسىن بۇرىنعى «حالىققا قىزمەت كورسەتۋ ورتالىنىنان» (تسون) ءۇش جۇمىس كۇنى ىشىندە بەرىلەتىن ءتارتىپتىڭ «قۇتتى مەكەن» ءموبيلدى قوسىمشاسى جانە migration.enbek.kz پورتالى اقىلى 30 جۇمىس كۇنى ىشىندە بەرىلەتىن ەتىپ وزگەرتىلۋى – الىستان ورالعان اعايىندى قاتتى قيناپ جىبەردى. ءتىپتى، جەمقورلىققا جول اشىپ، دەلدالداردىڭ جەمىنە اينالدىرىپ جىبەردى.

پرەزيدەنت اكىمشىلىگىنىڭ ماڭايىنداعى مەملەكەت باسشىسىنىڭ ابىروي-بەدەلىن، ۇلتتىق مۇددەنى ويلامايتىن ساناسىز ساراپشىلاردىڭ كوشى-قون ساياساتى جونىندەگى كەڭسەدە وتىرىپ جاساعان ساپاسىز «ساراپتاماسى» نەگىزىندە زاڭدار مەن نورماتيۆتىك قۇجاتتارعا ەنگىزىلگەن بۇل وزگەرىستەردى مەن اقوردادا وتىرعان ايىرىم لاۋازىمدى تۇلعالاردىڭ ۇلى كوشتى توقتاتۋ ءۇشىن ادەيى جاساعان كەدەرگىسى، پرەزيدەنتىمىز قاسىم-جومارت توقاەۆتىڭ بەدەلىن ءتۇسىرۋ ماقساتىندا جاساعان قاستاندىعى دەپ ەسەپتەيمىن!

قۇرمەتتى ولجاس ابايۇلى!

وسى ورايدا تاۋەلسىزدىك العاشقى جيىرما جىلىندا اتاجۇرتقا ورالعان قانداستاردىڭ سانىن دا ەسكە تۇسىرە كەتكەن ارتىق بولماس.

1991-1996 جىلدارى 104 009 ادام;

1997-2001 جىلدارى 82 335 ادام;

2002-2006 جىلدارى 384 106 ادام;

2007-2011 جىلدارى 308 832 ادام تاريحي وتانىنا كوشىپ كەلىپتى.

ال، 2020-2024 جىلدارى نەبارى 41 990 ادام عانا ورالىپتى.

وسى سوڭعى بەس جىل ىشىندە 6026 ادام تمد مەن وزگە مەملەكەتتەرگە كوشىپ كەتىپتى.

قازاقستانداعى بەس جىلداعى كوشى-قون ايىرماسى: +35 784-ادام.

دەمەك، جىلىنا ءجۇز مىڭداعان قانداستارىمىز اتاجۇرتىنا اعىلىپ جاتاتىن كەشەگى نۇرسۇلتان نازارباەۆ زامانىنداعى ۇلى كوش جوق!

بۇگىن قازاقستانعا كوشىپ كەلگەندەر شەتەلگە  كوشىپ كەتكەندەر مەن ولگەندەردىڭ ورنىن تولتىرۋعا دا جەتپەي قالدى!

سوندىقتان، قازىرگى تاڭدا «قانداس» مارتەبەسىنە ءوتىنىش بەرۋشىلەر اتقارۋشى بيلىككە دە،  «قانداس» مارتەبەسىن بەرۋگە كەلىسىم بەرەتىن ۇلتتىق قاۋىپسىزدىك كوميتەتىنە دە ەش قيىندىق تۋدىرمايدى!

قۇرمەتتى ولجاس ابايۇلى!

سول ءۇشىن سىزدەن، ءبىرىنشى، «حالىقتىڭ كوشى-قونى تۋرالى» زاڭىنىڭ 20-بابىنىڭ 5) تارماعىن الىپ تاستاۋعا;

ەكىنشى، «قانداس» مارتەبەسىن بۇرىنعى «حالىققا قىزمەت كورسەتۋ ورتالىنىنان» (تسون) ءۇش جۇمىس كۇنى ىشىندە بەرىلەتىن ءتارتىپتى تۇگەلدەي قالپىنا كەلتىرۋگە ىقپال ەتۋىڭىزدى سۇرايمىن.

سونداي-اق، ءوزىڭىز جاقسى بىلەسىز، مەن سوڭعى جيىرما جىلدان استام ۋاقىتتان بەرى كوشى-قون ساياساتىمەن تىنباي اينالىسىپ كەلە جاتقان بەلسەندى ازاماتپىن; كوشى-قون ءۇردىسىن رەتتەۋگە ارنالعان زاڭدار مەن نورماتيۆتىك قۇجاتتارعا ەلەۋلى وزگەرىستەر مەن تولىقتىرۋلار ەنگىزۋگە ىقپال ەتكەن تاجىريبەلى مامانمىن; پرەزيدەنتىمىز قاسىم-جومارت توقاەۆتىڭ قولداۋشىسىمىن...

سوندىقتان، پرەمەر-مينيستر ولجاس بەكتەنوۆ 2025 جىلعى 25 ساۋىردەگى №68 قانداس مارتەبەسىن بەرۋ تەتىگىن وزگەرتۋ بويىنشا ۇسىنىستار ازىرلەۋ ءۇشىن قۇرىلعان جۇمىس توبىنا مەنى دە قوسۋلارىڭىزدى وتىنەمىن!

قۇرمەتپەن،

اۋىت مۇقيبەك،

«ەرەن ەڭبەگى ءۇشىن» مەدالىنىڭ،

«قۇرمەت» وردەنىنىڭ يەگەرى.

Abai.kz