«امەريكانى قايتا قۇدىرەتتەندىرەم» دەپ اق ۇيگە قايتا ورالعان ترامپ العاشقى شەتەل ساپارىن ەجەلگى ءداستۇر بويىنشا كورشىسى كانادا، بولماسا مەكسيكا، نە ەۋروپادان ەمەس، پارسى شىعاناعىنداعى ءۇش باي ەل – ساۋد-ارابيا، كاتار، بىرىككەن اراب امىرلىگىنە قىدىرۋدان باستادى.

الەمدىك باق ترامپتىڭ بۇل ساپارىنىڭ ساياسي مۇددەدەن گورى، تازا ەكونوميكالىق پايدانى كوزدەيتىنىن جارىسا جازىپ جاتىر.

دەسە دەگەندەي، مامىردىڭ 13-ءى كۇنى ساۋد استاناسى ەر-ريادقا ات باسىن تىرەگەن ترامپ يلون ماسك باستاعان اقش-تىڭ الپاۋىت كومپانيالارىنىڭ 15 باسشىسىمەن بىرگە، «ساۋد-اقش» ىسكەرلىك فورۋمىنا قاتىستى.

فورۋمدا ساۋد حانزاداسى ناۋرىزدا ۋادە ەتكەن 600 ميلليارد دوللارلىق كەلىسىمگە قول قويعان. ودان بولەك، ساۋد تارابى الداعى 5 جىلدا اقش-تان قۇنى 124 ميلليارد دوللارعا قارۋ ساتىپ الاتىن بولىپ پاتۋالاسقان.

فورۋمنان كەيىن كوڭىلى شالقىعان ترامپ سالمان حانزادا مەن ەردوعاننىڭ قولقاسىن ەسكەرىپ، سيرياعا سالىنعان 10 جىلدان بەرگى سانكتسيانى الىپ تاستايتىنىن جاريالادى. ونىڭ استارىندا دا ەكونوميكالىق مۇددە جاتىر ەكەن.

سيريانىڭ جاڭا باسشىسى سانكتسيانى الىپ تاستاۋ ءۇشىن ترامپقا ءۇش ءتۇرلى جەڭىلدىك ۇسىنعان.

ءبىرىنشى ەل استاناسى داماسكىنىڭ ورتالىعىنان ترامپتىڭ جەكە كومپانياسىنا قوناق ۇي سالۋعا جەر ۇسىنعان.

ەكىنشى يزرايلمەن قاقتىعىسپاۋعا ۋادە بەرگەن.

ءۇشىنشى اقش-قا سيريانىڭ مۇناي مەن گاز قۇبىرلارىن ەركىن پايدانۋعا رۇقسات بەرگەن.

سارسەنبى كۇنى ترامپ سيريانىڭ جاڭا باسشىسى احمات ال شارامەن كەزدەسەدى.

ترامپ ودان بولەك بەيسەنبى كۇنى ستانبۇلدا وتەتىن رەسەي-ۋكراينا كەلىسسوزىنە رۋبيو باستاعان اق ءۇي وكىلدەرىنىڭ قاتىساتىنىن جەتكىزدى. بىراق ءوزىنىڭ باراتىن-بارمايتىنىن ناقتىلامادى.

ترامپتىڭ مۇناي مەن گازعا باي الپاۋىت باي ەلدەرگە ساپارى مامىردىڭ 17-نە دەيىن جالعاسادى.

بىرىككەن اراب امىرلىگى الداعى 10 جىلدا اقش ەكونوميكاسىنا 1 تريليون 400 ميلليارد دوللار اقشا قۇياتىنىن جاريلاعان ەدى. وسى جولى بىرقاتارىنا قول قويىلماق.

ترامپتىڭ ساپارىنىڭ الدىندا كاتاردىڭ پاتشا اۋلەتى اقش پرەزيدەنت ۇشاعىنىڭ مەرزىمدى جوندەۋ ۋاقىتىنىڭ كەلۋىنە بايلانىستى اق ءۇي باسشىسىنا سالتاناتتى «بوينگ 747» ۇشاعىن سىيعا تارتاتىنىن مالىمدەگەن ەدى.

ترامپ ودان دا باس تارتپايتىنىن ايتقان سوڭ، اقش باق وكىلدەرى شۋلاپ، ترەكەڭ ارتىنان «ۋاقىتشا سىيلىق قوي» دەپ اقتالعان ەدى.

ءبارىن ايت تا ءبىرىن ايت، ترامپتىڭ العاشقى ششەتەل ساپارى كوڭىلىن توعايتىپ، مول ولجامەن جاقسى باستالىپ وتىر.

يران، حاماس، حۋرسيتتەرمەن كەلىسسوزدەر دە وسى ايماقتا ءجۇرىپ جاتىر. اراب ەلدەرى ماسكتىڭ كۇن ەنەرگياسىنا كوڭىلى اۋىپ، مۇناي ءوندىرۋدى قىسقارتۋعا كەلىسسە، رەسەيگە قيىن بولعالى تۇر. ەندى پارسى ەلدەرىنە ترامپتىڭ ءىزىن الا اقش-تىڭ قىتاي سياقتى باسەكەلەس ەلدەرىنىڭ باسشىلارى اعىلۋى مۇمكىن.

Abai.kz