ۋكراينا مەن رەسەي 16-شى مامىردا ستامبۇلدا وتكەن كەلىسسوز دە ءوزارا 1000 تۇتقىننان الماستىرۋعا كەلىسكەن ەدى. وتكەن اپتانىڭ اياعىنا قاراي تۇتقىن الماسۋدى اياقتادى. جۇما كۇنى 390, سەنبى كۇنى 307, جەكسەنبى كۇنى 303 تۇتقىن الماستى. رەسەي تارابى ادەتتەگىدەي كەلىسىمگە كەلگەن، ۋادەسىندە تۇرعان كەيىپ تانىتقانىمەن، كيەۆتەن باستاپ ۋكراينانىڭ بارلىق اۋماعىن دەرلىك اۋە سوققىسىنىڭ استىنا الدى.

ۋكراينا تارابىنىڭ مالىمەتى بويىنشا 298 درون، 69 زىمىرانمەن شابۋىلداعان. سالدارىنان 13 بەيبىت تۇرعىن قايتىس بولعان. 24-ءشى مامىردا كرەمل ءباسپاسوزى ورىس اسكەرىنىڭ ميمىرتتاپ جىلجىپ كەلە جاتقانىن، دونەتسكتەگى 2 ەلدىمەكەندى، سۋمي وبىلىسىنداعى 1 ەلدىمەكەندى باسىپ العانىن مالىمدەگەن ەدى. سوڭعى اپتادا ورىس تارابى سوعىس باستالعان 3 جىلدان بەرگى ەڭ سۇراپىل شابۋىل ۇيىمداستىرعان.

كەشە ۋكراينا پرەزيدەنتى زەلەنسكي تەلەگرام ارناسىندا: "امەريكانىڭ ۇنسىزدىگى، الەم ەلدەرىنىڭ بەيقامدىعى ءپۋتيندى تەك قانا شابىتتاندىرادى. رەسەيدىڭ ءار جولعى وسىنداي سۇراپىل شابۋىلى ولارعا جويقىن سانكتسيا سالۋعا سۇرانىپ تۇر", - دەدى.

اق ءۇيدىڭ ۋكراينا ماسەلەسى جونىندەگى ەلشىسى كەللوگ رەسەيدىڭ ۋكرايناعا كەزەكتى شابۋىلىنىڭ 1977-ءشى جىلى قابىلدانعان "جەنەۆا كەلىسىمىنە" قايشى ەكەنىن العا تارتىپ، سوعىستى دەرەۋ توقتاتۋعا ۇندەدى.

اقش پرەزيدەنتى ترامپ تا: "مەن پۋتينمەن دوس ەدىم. مىناعان كوزىم جەتتى: ول ۋكراينانى تۇگەلىمەن يەلەگىسى كەلەدى. ول قۇتىردى", - دەپ جازبا جاريالادى. ترامپ سونىمەن بىرگە: ء"ار ايتقان ءسوزى جاڭا داعدارىسقا ۇرىندىرادى" دەپ زەلەنسكيگە دە شۇيلىكتى. سوڭىندا "بۇل سوعىس.پۋتين مەن زەلەنسكيدىڭ، بايدەن ۇشەۋىنىڭ سوعىسى", - دەپ ءوز باسىن الا قاشتى.

ال ەۋروپا ەلدەرى بولسا رەسەيدىڭ كەزەكتى سوققىسىنا جاۋاپ رەتىندە 18-ءشى رەتكى كەزەكتى سانكتسيا پاكەتىن دايىنداعانىن مالىمدەدى. وعان رەسەيدىڭ 20-عا جۋىق بانكىن SWIFT جۇيەسىنەن شىعارۋ، ورىس مۇنايىنا بەلگىلەگەن شەكتى باعانى تومەندەتۋ، "سولتۇستىك اعىن" قۇبىرىن بۇكىلدەي توقتاتۋ قاتارلى شەكتەۋلەر كىرگەن. ەۋرووداق سونداي-اق 2027-ءشى جىلدىڭ اياعىنا قاراي رەسەي شيكىزاتىنا تاۋەلدىلىكتەن بۇتىندەي قۇتىلۋدى، رەسەيمەن قاتىسى بار قارجىلىق ۇيىمدارمەن جەكەلەردىڭ مال-مۇلكىن بۇعاتتاۋدى جوسپارلاپ وتىر.

رەسەي تارابى ايىبىن مويىنداماي وزدەرىنىڭ دە شابۋىلعا ۇشىراعانىن ايتىپ اقتالۋدا. كرەمل ءباسپاسوزىنىڭ ايتۋىنشا ۋكراينانىڭ 110 درونىن اتىپ تۇسىرگەن. ونىڭ 13-ءى ماسكەۋ ماڭىندا قۇلاتىلعان.

مۇنىڭ الدىندا پۋتينمەن تىلدەسكەن ترامپ: "سوعىس توقتاماسا دا، كەلىسسوزدەر جالعاسا بەرەدى", - دەگەن ەدى.

كەشەگى جازباسىندا ءپۋتيندى جازىقسىز ادامداردى ءولتىردى دەپ ايىپتاپ، "ونىڭ ۋكراينانى جۇتسام دەگەن ارانى رەسەيدى كۇيرەتىپ تىنادى" دەدى.

Abai.kz