كەشە ماجىلىستە «كىرىستەردى جىلىستاتۋ جانە تەرروريزمدى قارجىلاندىرۋعا قارسى ءىس-قيمىل» ماسەلەلەرىنە ارنالعان زاڭ جوباسىن تالقىلاۋ وتىرىسى ءوتتى. دەپۋتات باقىتجان بازاربەك بىرقاتار ماڭىزدى ساۋال كوتەردى.

ونىڭ ايتۋىنشا، زاڭ جوباسىنىڭ ءۇشىنشى بابىندا قارجىلىق مونيتورينگ سۋبەكتىلەرى رەتىندە اتالعان 20 ۇيىمنىڭ ءتىزىمى تولىق ەمەس جانە بىرنەشە وزەكتى مەكەمە بۇل تىزىمنەن تىس قالىپ وتىر.

«نە سەبەپتى بۇل تىزىمگە “زاڭسىز اكتيۆتەردى قايتارۋ تۋرالى” جشس، Astana Hub, “قازاقستان حالقىنا” قوعامدىق قورى، اۆتولومباردتار، “جاسىل دامۋ” اق كىرمەگەن؟ ەنداۋمەنت قورلارى مەن ەسەپ بەرۋ ورتالىقتارى دا نازاردان تىس قالعان. ولاردى قارجىلىق مونيتورينگ سۋبەكتىلەرىنىڭ قاتارىنا ەنگىزۋگە دايىنسىزدار ما؟ — دەدى دەپۋتات.

وسىعان جاۋاپ رەتىندە قارجىلىق مونيتورينگ اگەنتتىگى توراعاسىنىڭ ورىنباسارى جەڭىس ەلەمەسوۆ بۇل مەكەمەلەردىڭ كەيبىرى ءىس جۇزىندە قارجىلىق مونيتورينگكە قاتىسۋشى ەكەنىن اتاپ ءوتتى.

«Astana Hub پەن لومباردتار سياقتى ۇيىمدار بىزگە ەسەپ بەرەدى. ءبىز ولاردان مالىمەتتەر الامىز. كىمدەردىڭ سۋبەكت بولاتىنىنا قاتىستى شەشىمدەر حالىقارالىق تاجىريبە نەگىزىندە، اتاپ ايتقاندا، فاتف ۇسىنىمدارىنا سۇيەنە وتىرىپ قابىلدانادى. دەگەنمەن، ءسىز ۇسىنعان ۇيىمداردى دا قاراستىرۋعا دايىنبىز», — دەدى ول.

الايدا باقىتجان بازاربەك بۇل جاۋاپقا قاناعاتتانبادى. ونىڭ ايتۋىنشا، زاڭ جوباسىنىڭ ءۇشىنشى بابىندا ناقتى 20 سۋبەكتىنىڭ ءتىزىمى بەرىلگەن، ال Astana Hub, اۆتولومباردتار، تسيفرلىق ماينينگپەن اينالىساتىن مەكەمەلەر بۇل تىزىمگە ەنبەگەن.

«Astana Hub ىشىندە كريپتوۆاليۋتا مەن زاڭسىز تابىس اينالىمىنا قاتىستى ۇيىمدار كوپ. ال اۆتولومباردتار ميكروكرەديتتىك ۇيىمدارعا جاتپايدى. سوندىقتان ولاردىڭ بولەك قارالۋى قاجەت», — دەپ ناقتىلادى دەپۋتات.

ماجىلىستە قارالىپ جاتقان بۇل زاڭ جوباسى قارجىلىق قىلمىستاردىڭ الدىن الۋ، تەرروريزمدى قارجىلاندىرۋمەن كۇرەسۋ جانە فاتف تالاپتارىن ورىنداۋ اياسىندا ازىرلەنگەن. جوبادا قارجىلىق وپەراتسيالاردى باقىلاۋ تەتىكتەرىن كۇشەيتۋ ءۇشىن قارجى مونيتورينگى سۋبەكتىلەرىنىڭ ءتىزىمىن كەڭەيتۋ قاراستىرىلعان.

نازاربەۆ قورى نەگە اقشانى جىلىستاتۋ مونيتورينگىنەن تىس قالدى — اگەنتتىك جاۋابى

قارجىلىق مونيتورينگ اگەنتتىگى توراعاسىنىڭ ورىنباسارى جەڭىس ەلەمەسوۆكە ءماجىلىستىڭ جالپى وتىرىسىنان كەيىن جۋرناليست: «نازارباەۆ قورى نەگە اقشانى جىلىستاتۋ مونيتورينگىنەن تىس قالدى؟» دەگەن سۇراق قويدى.

وعان اگەنتتىك توراعاسى بىلاي دەپ جاۋاپ بەردى:

«قارجىلىق مونيتورينگ سۋبەكتىسىنە العاننان قانداي پايدا بار. بىرىنشىدەن، مىنانى ءتۇسىنۋ كەرەك. نازارباەۆ قورىنا قارجى قايدان تۇسەدى؟ قارجى ۇيىمدارىنان تۇسەدى. قارجى ۇيىمدارى دەگەنىمىز — بانكتەر، تولەم ۇيىمدارى. ولاردىڭ ءبارى ونسىز دا قارجىلىق مونيتورينگ سۋبەكتىسىنە كىرەدى. ولارعا قوياتىن كريتەريلەرىمىز بار. قورعا اقشا تۇسكەن بولسا، ول بانك ارقىلى كەلگەن بولسا، قانشالىقتى زاڭدى ەكەنىن كورىپ وتىرامىز. ول اۋدارىمدا كۇدىك بولسا، بىزگە مالىمەت تۇسەدى. ءارى قاراي تالدايمىز»، — دەدى ول.

«ءسىزدىڭ جاۋابىڭىزدان قارجىلىق مونيتورينگ اگەنتتىگى نازارباەۆ قورىن زاڭسىز اقشانى جىلىستاتۋعا بەيىم ۇيىم رەتىندە قاراپ وتىرعان جوق دەگەن قورىتىندى شىعارا الامىز با»، — دەپ ناقتىلادى جۋرناليست.

جەڭىس ەلەمەسوۆ: «ءيا»، — دەپ قىسقا قايىردى

Abai.kz