كيبەرشابۋىلعا ماشىقتانعان «Ares Leaks» ۇيىمى رەسەيدىڭ مەملەكەت قاۋىپسىزدىگىنە قاتىستى 8 بەتتىك قۇپيا قۇجاتتى قولعا تۇسىرگەن. نيۋ-يورك تايمس گازەتى اتالمىش قۇجاتتى اقش پەن ەۋروپادانىڭ زەرتتەۋ ورىندارىنا جىبەرىپ، شىندىعىنا كوز جەتكىزگەن.

اتالمىش قۇجات 2023 جىلدىڭ سوڭى مەن 2024 جىلدىڭ باسىندا دايىندالعان دەگەن ناقتى جورامال ايتىلعان.

قىتايعا قاتىستى قۇپيا قۇجاتتى فسب-عا قاراستى بۇعان دەيىن بەيمالىم بولىپ كەلگەن استىرتىن بارلاۋ مەكەمەسى دايىنداعان ەكەن. وندا قىتايدىڭ رەسەيدىڭ مەملەكەت قاۋىپسىزدىگىنە قاتەر توندىرەتىنى ايتىلىپ، قازىرگى ەڭ نەگىزگى ساۋدا، اسكەري ارىپتەسىن دۇشپان ەلدەر قاتارىنا قوسقان. ناقتى فاكت رەتىندە قىتاي تارابىنىڭ ورىستاردى، اسىرەسە پۋتين بيلىگىنە كوڭىلى تولمايتىن عالىمداردى ىشكە تارتىپ، اسكەري قۇپيالارعا قول جەتكىزۋگە ۇمتىلاتىنى، ۋكراينا سوعىسىن ەرەكشە نازارعا الىپ باتىستىڭ قارۋى مەن سوعىس تاكتيكاسىن بىلۋگە دەن قويىپ وتىرعانى، گەولوگيالىق بارلاۋ مەن ۋنيۆەرسيتەت ارالىق ارىپتەستىكتى العا تارتىپ، جالپى بەتتىك جانسىزدىق ارەكەتپەن شۇعىلدانىپ وتىرعانى، ونىڭ ءتۇبى تەرريتوريا تالاپ ەتۋگە سوقتىراتىنى جازىلعان ەكەن.

پۋتين ۋكرايناعا سوعىس اشقاننان كەيىن باتىس سانكتسياسىنا ۇشىراپ، الەمنەن وقشاۋلانىپ قالعانى بەلگىلى. قازىر قىتاي رەسەيدىڭ نەگىزگى ساياسي ءارى ەكونوميكالىق ارىپتەسى بولىپ وتىر. جوعارداعى قۇپيا قۇجات شىن بولسا، ءپۋتيننىڭ قىتايمەن دوستىققا امالسىزدان بارىپ وتىرعانىن، باسقا شىعار جول قالماعانىن كورۋگە بولادى.

قىتاي، رەسەي، يران، سولتۇستىك كورەيا – تورتتىگىنىڭ باسقان-تۇرعانىن اڭدىپ وتىرعان اقش تارابى ءبارىن ءبىلىپ وتىر ەكەن. ترامپتىڭ اق ۇيگە كەلە سالا بايدەننەن باسقا جول ۇستانىپ، كرەملمەن بايلانىسىن قايتا قالپىنا كەلتىرۋگە تىرىسىپ، رەسەيدى الەمدىك قاۋىمداستىققا قايتا تارتۋى – قىتاي مەن رەسەيدىڭ دوستىعىنىڭ ءوزارا سەنىمسىزدىككە قۇرىلعان، گەوساياسي مۇددەدەن تۋىنداعان بىرلەستىك ەكەنىن، ولاردىڭ اراسىنا سىزات ءتۇسىرۋ ۋاقىتتىق عانا شارۋا ەكەنىن تەرەڭ باعامداعاندىقتان تۋىنداعان شەشىم ەكەن.

كولەڭكەسىنەن قورىققان كرەملدىڭ قىتايدان قاۋپى قالىڭداماسا، سەيىلمەيتىن ءتۇرى بار. قازاقستاننان كەيىن، جاقىندا وزبەكستان قىتايمەن ۆيزاسىز بايلانىستى جولعا قويدى. فسب رەسەي ازاماتتارىنىڭ قىتايلىق تيك-توك، ۆيچات اككاۋنتىن تەكسەرىپ، بۇعاتتاپ جۇرگەندە، قىتاي مەن بارىس-كەلىستىڭ، ساۋدانىڭ جاندانۋىنا بايلانىستى ورتا ازيا ازاماتتارى قىتايلىق پلاتفورمالاردى جاپپاي قولدانا باستادى. بۇل ءوز كەزەگىندە ولارعا ءتىپتى دە قيىندىق تۋدىرۋى مۇمكىن. ورتا ازيادا قىتايدى قۇبىجىق ەتىپ كورسەتەتىن اقپاراتتار قارشا بوراسا وعان ەش تاڭدانۋعا بولمايدى.

Abai.kz