13 ماۋسىمدا بىرىككەن ۇلتتار ۇيىمىنىڭ ءبىلىم، عىلىم جانە مادەنيەت جونىندەگى باس ديرەكتورى (يۋنەسكو) ودرە ازۋلە يۋنەسكو مەن قازاقستان رەسپۋبليكاسىنىڭ ۇكىمەتى اراسىندا يۋنەسكو اياسىنداعى 2-ساناتتاعى ورتالىق رەتىندە ورتالىق ازيا وڭىرلىك گلياتسيولوگيالىق ورتالىعىنىڭ مارتەبەسىن قالپىنا كەلتىرۋ تۋرالى كەلىسىمگە قول قويدى.

2025 جىلعى 19 ماۋسىمدا قازاقستان رەسپۋبليكاسى تاراپىنان كەلىسىمگە عىلىم جانە جوعارى ءبىلىم ءمينيسترى ساياسات نۇربەك قول قويدى. ونىڭ مارتەبەسىن قالپىنا كەلتىرۋ قازاقستاننىڭ وڭىردەگى عىلىمي جانە ەكولوگيالىق كۇن ءتارتىبىن دامىتۋداعى بىرەگەي ءرولىن كورسەتەدى.

2020 جىلى قۇرىلعان يۋنەسكو اياسىنداعى ورتالىق ازيا وڭىرلىك گلياتسيولوگيالىق ورتالىعى — يۋنەسكو قامقورلىعىنداعى الەمدەگى جالعىز گلياتسيولوگيالىق ورتالىق.

كەلىسىمگە قول قويۋ گلياتسيولوگيالىق ورتالىققا قازاقستان ءۇشىن اسا ماڭىزدى تاۋلى مۇزدىق جۇيەلەرىن جەدەل باقىلاۋ بويىنشا زەرتتەۋلەردى جالعاستىرۋعا مۇمكىندىك بەرەدى. بۇل ترانسشەكارالىق باسسەيندەردەگى مۇزدىقتاردىڭ اۋداندارى مەن كولەمىن، ولاردىڭ وزگەرۋ ۇردىستەرىن باعالاۋعا جول اشادى. مۇنداي دەرەكتەر ەل مەن ءوڭىر دەڭگەيىندەگى سۋ رەسۋرستارىن باسقارۋ شەشىمدەرىن قابىلداۋ نەگىزى رەتىندە باعالاۋعا مۇمكىندىك بەرەدى.

كەلىسىم قازاقستاننىڭ جاھاندىق عىلىمي باستامالارعا ينتەگراتسيالانۋى ءۇشىن جاڭا مۇمكىندىكتەر اشادى، سونداي-اق ەلدىڭ ورنىقتى دامۋ مەن حالىقارالىق ىنتىماقتاستىققا قوسقان ۇلەسىن كۇشەيتەدى.

ايتا كەتەلىك يۋنەسكو شتاب-پاتەرىندە نۇرعيسا تىلەنديەۆكە ارنالعان كورمە اشىلعانى تۋرالى حابارلاعان ەدى.

Abai.kz