كۋبالىق مۋزىكانت ميگەل گۋتەررەس كاربونەلدىڭ ءانى كۇتپەگەن جەردەن ۆەنەسۋەلادا ۇلكەن رەزونانس تۋدىردى. بەس كۇننىڭ ىشىندە TikTok-تا 400 مىڭنان استام، YouTube-تا ءجۇز مىڭنان اسا قارالىم جيناعان تۋىندىنى قازىر ەلدەگى مىڭداعان ءۇي تىڭداپ وتىر. ءاننىڭ ماتىنىندە: «بۇركىت كوككە كوتەرىلسە – ول ولجاسىن كورەدى. ەندى سەن قورشاۋداسىڭ، نيكولاس، اڭشىلىق باستالدى» دەگەن جولدار بار. بەينەباياندا ۆەنەسۋەلا پرەزيدەنتى نيكولاس مادۋرو مەن ونىڭ سەرىكتەرى امەريكالىق DEA تىكۇشاقتارىنان باس ساۋعالاپ قاشقانداي بەينەلەنگەن.

بۇل اننەن كەيىن جاعداي ودان سايىن ۋشىعىپ، اقش سوڭعى ونجىلدىقتاعى ەڭ ءىرى تەڭىز وپەراتسياسىن باستاۋ تۋرالى شەشىم قابىلدادى. ۆەنەسۋەلا جاعالاۋىنا ءتورت مىڭ تەڭىز جاياۋ اسكەرى بار ءۇش ەسمينەتس، P-8 Poseidon ۇشاقتارى جانە يادرولىق قارۋ الىپ جۇرە الاتىن سۋ استى قايىعى جونەلتىلدى. USS Gravely, USS Jason Dunham جانە USS Sampson ەسمينەتستەرى 36 ساعات ىشىندە جەتەدى دەپ كۇتىلۋدە.

بۇل وپەراتسيا – دونالد ترامپ اكىمشىلىگىنىڭ ەسىرتكى كونترابانداسىنا قارسى كۇرەس باعدارلاماسىنىڭ ءبىر بولىگى. جاقىندا اقش باس پروكۋرورى پەم بوندي مادۋرونىڭ باسىنا تىگىلگەن سىياقىنى ەكى ەسەگە ءوسىرىپ، 50 ميلليون دوللارعا جەتكىزدى. بۇل سوما كەزىندە ۋساما بەن لادەن ءۇشىن جاريالانعان اقشادان دا كوپ.

مەملەكەتتىك حاتشى ماركو رۋبيو دا مادۋرو رەجيمىن اقش-قا كوكاين جەتكىزۋمەن اينالىستى دەپ ايىپتادى. بۇعان دەيىن ترامپ اكىمشىلىگى ۆەنەسۋەلالىق Tren de Aragua, مەكسيكالىق Sinaloa كارتەلى مەن ۆەنەسۋەلالىق Cartel de los Soles ۇيىمدارىن تەرروريستىك توپ دەپ تانىعان. سوڭعىسىنىڭ قۇرامىندا قازىرگى جانە بۇرىنعى جوعارى شەندى اسكەريلەر بار، ال امەريكادا بۇل قۇرىلىمدى تىكەلەي مادۋرو باسقارادى دەگەن پىكىر بار. دەگەنمەن شىن باسشىسى — ونىڭ سەرىگى ديوسدادو كابەلو بولۋى مۇمكىن دەگەن دە بولجام ايتىلادى.

اق ءۇي ۆەنەسۋەلانى رەسمي تۇردە «ەسىرتكى ەلى» دەپ جاريالاپ، ترامپ كارتەلگە قارسى اسكەري سوققى بەرۋگە رۇقسات ەتەتىن جارلىققا قول قويدى. بۇل قۇجات اقش تەڭىز جاياۋ اسكەرلەرىنە تىكەلەي جەر ۇستىندەگى وپەراتسيالارعا قاتىسۋعا مۇمكىندىك بەرەدى. اسكەري ساراپشىلار پەنتاگون مادۋرونى تۇتقىنداۋ ءۇشىن ارنايى جاساق وپەراتسياسىن ىسكە قوسۋى مۇمكىن ەكەنىن جوققا شىعارمايدى. مۇنداي ستسەناري 1989 جىلى پاناما باسشىسى مانۋەل نورەگانى ۇستاۋ وپەراتسياسىنا ۇقسايدى.

اسكەري قىسىمعا جاۋاپ رەتىندە مادۋرو «ۇلتتىق ەگەمەندىكتى قورعاۋ ءۇشىن» 4,5 ميلليون حالىقتىق جاساقتى جۇمىلدىراتىنىن جاريالادى. الايدا ساراپشىلار بۇل مالىمدەمەنى نەگىزسىز دەپ سانايدى. ۆەنەسۋەلا قازىر لاتىن امەريكاسىندا وقشاۋلانعان ەلگە اينالعان. ونى اشىق قولداعان جالعىز ساياساتكەر – كولۋمبيا پرەزيدەنتى، بۇرىنعى كوتەرىلىسشى گۋستاۆو پەترو. ول ح پلاتفورماسىندا: «ۆەنەسۋەلاعا جاسالعان شابۋىل – بۇكىل لاتىن امەريكاسى مەن كاريب ايماعىنا جاسالعان سوققى» دەپ جازدى.

ترامپتىڭ العاشقى پرەزيدەنتتىك مەرزىمىندە-اق ۆەنەسۋەلاعا اسكەري وپەراتسيا جاساۋ مۇمكىندىگى تالقىلانعان. بىراق ول كەزدە بۇل جوسپار ىسكە اسپادى. قازىر اقش اسكەرىنىڭ ۆەنەسۋەلاداعى پارتيزاندىق سوعىستارعا ارالاسۋى ۆەتنامدىق تاجىريبەنىڭ قايتالانۋىنا اكەلۋى مۇمكىن دەگەن كۇدىك بار. دەگەنمەن امەريكالىق ەسمينەتستەردىڭ «توماگاۆك» زىمىراندارىمەن ۆەنەسۋەلاداعى نىساندارعا سوققى جاساۋعا تولىق مۇمكىندىگى بار.

سونىمەن، ۆاشينگتون مادۋروعا قارسى «اڭشىلىقتى» باستاپ كەتتى.

Abai.kz