بۇگىنگى تاڭدا تۋريزم سالاسى – ساۋدا، قوعامدىق تاماقتاندىرۋ مەن قوناق ءۇي قىزمەتىن كورسەتۋ سياقتى ەكونوميكاعا قاتىستى وزگە دە سالالاردىڭ دامۋىنا تىكەلەي ىقپال ەتەتىن، بولاشاعى زور قىزمەت تۇرلەرىنىڭ ءبىرى بولىپ وتىر.

اعىمداعى جىلدىڭ ءبىرىنشى جارتىجىلدىعىنىڭ قورىتىندىسى بويىنشا ورنالاستىرۋ ورىندارى كورسەتكەن قىزمەت كولەمى 2,0 ملرد تەڭگەنى قۇراپ، وتكەن جىلمەن سالىستىرعاندا 33,2%-عا ارتقان.

وڭىرگە كەلگەن قازاقستاندىق ازاماتتاردىڭ سانى – 121,9 مىڭ ادامدى، شەتەلدىك تۋريستەردىڭ سانى – 6,0 مىڭ ادامدى قۇرادى. نومىرلىك قور 6331 توسەك-ورىننان تۇرادى.

جالپى وبلىس اۋماعىندا 2 شيپاجاي، 1 وڭالتۋ ورتالىعى، 94 قوناق ءۇي، 2 موتەل، 4 حوستەل، 14 دەمالىس بازاسى جۇمىس ىستەيدى.

تۋريستەردىڭ ەرەكشە قىزىعۋشىلىعىن تۋدىراتىن نەگىزگى نىساندار – «سوسنوۆىي بور» شيپاجايى، ناۋرىزىم قورىعى جانە «تەرموپارك» كەشەنى. بۇل نىساندار قاجەتتى ينفراقۇرىلىممەن قامتىلعان جانە كولىك قاتىناسى دا قولجەتىمدى.

ءتۋريزمدى دامىتۋدىڭ ماڭىزدى بۋىنى – ساناتوري-كۋرورتتىق دەمالىس. بۇگىندە وبلىستا 2 شيپاجاي مەن 14 دەمالىس بازاسى قىزمەت كورسەتۋدە.

ەمدەۋ-ساۋىقتىرۋ باعىتىنداعى نەگىزگى نىساندار التىنسارين اۋدانىنىڭ كۋرورتتىق ايماعىندا ورنالاسقان. ولاردىڭ قاتارىندا «سوسنوۆىي بور» شيپاجايى، «جايلياۋ» ساۋىقتىرۋ-ويىن-ساۋىق كەشەنى، «ميۋنحەن»، «بورداعى اۋىل» دەمالىس بازالارى بار.

ايماقتا ساۋىقتىرۋ ءتۋريزمىن دامىتۋعا قولايلى ءارى قىزىقتى وزگە دە ورىندار بار ەكەندىگىن اتاپ ءوتۋ قاجەت.

سولاردىڭ ءبىرى – مەندىكارين اۋدانىنداعى قاراباەۆ اتىنداعى وڭالتۋ ورتالىعى. ول كۇردەلى جوندەۋدەن كەيىن ءوز قىزمەتىن قايتا جالعاستىردى.

ايماقتا ءتۋريزمنىڭ ءالى دە اسا كەڭ تانىمال بولماۋىنا قاراماستان، بۇل سالا بىرتىندەپ دامىپ كەلەدى: جاڭا اۋە رەيستەرى اشىلۋدا، ينۆەستيتسيالىق جوبالار ىسكە اسىرىلۋدا، ەكسكۋرسيالار ۇيىمداستىرىلۋدا.

قازىرگى ۋاقىتتا وبلىستا تۋريزم سالاسىندا بىرقاتار ينۆەستيتسيالىق جوبالار جۇزەگە اسىرىلۋدا. سونىڭ ىشىندەگى ەڭ اۋقىمدىسى – امانگەلدى اۋدانىندا كوپفۋنكتسيونالدى تۋريستىك كەشەننىڭ قۇرىلىسى. ونىڭ اۋماعىندا ۇندىستانداعى ءتاج-ماحالدىڭ، مەكسيكاداعى چيچەن-يتسا عيماراتىنىڭ، ەيفەل مۇناراسىنىڭ كوشىرمەلەرى تۇرعىزىلعان.

سونىمەن قاتار، بۇل جەردە الەمدە تەڭدەسى جوق 200 بەلگىلى قازاقستاندىق تۇلعانىڭ ەسىمى جازىلعان ۇلتتىق جادى قابىرعاسى ورناتىلعان.

تۋريستەردىڭ ىڭعايى ءۇشىن اۋماقتا قوناق ءۇي، مەيرامحانا، جازعى امفيتەاتر، سپورت جانە بالالار الاڭدارى سالىنعان. جوبانىڭ جالپى قۇنى – 3,5 ملرد تەڭگە، قۇرىلىستى اعىمداعى جىلى اياقتاۋ جوسپارلانعان.

اتالعان تۋريستىك نىسان الداعى ۋاقىتتا تورعاي ءوڭىرىنىڭ باستى تۋريستىك ورتالىعىنا اينالىپ، تەك حابقا عانا ەمەس، جاقىن ايماقتارداعى وزگە دە تاريحي-مادەني جانە تابيعي ورىندارعا تۋريستەردى تارتۋعا مۇمكىندىك بەرەدى.

اۋدان اۋماعىندا عىلىمي قاۋىمداستىق پەن تۋريستەردىڭ زور قىزىعۋشىلىعىن تۋدىرىپ وتىرعان بىرەگەي ەسكەرتكىشتەر – تورعاي گەوگليفتەرى ورنالاسقان («تورعاي سۆاستيكاسى» امانگەلدى اۋىلىنان 22 كم، «ۇشتوعاي شارشىسى» 125 كم قاشىقتىقتا).

سونداي-اق اۋدان كىرەبەرىسىندە ورنالاسقان «جۇرەتىن» قۇمكەشۋ بارحاندارى دا قوناقتار ءۇشىن ەرەكشە قىزىق.

كۇندەلىكتى كۇيبەڭنەن الشاقتاپ، تىنىعۋ ءۇشىن دەنيسوۆ اۋدانىندا «شاڭىراق» دەمالىس بازاسىنىڭ قۇرىلىسى ءجۇرىپ جاتىر. بازا توبىل وزەنىنىڭ بويىندا، جوعارعى توبىل سۋ قويماسىنىڭ اۋماعىندا ورنالاسقان. جوبانىڭ ءبىرىنشى كەزەڭى اياقتالىپ، ەكى جايلى جاعاجاي، كاتاماران جالداۋ بەكەتى بار پيرس، كولەڭكەلى جانە بالالار الاڭدارى، «بالىقشى اۋىلى» تۇرعىن كەشەنىندە جىل بويى تۇرۋعا ارنالعان 6 جايلى ءۇي جانە 8 گريل-ايماق سالىندى.

وبلىس اۋماعىندا جىل بويعى «بادەن بادەن» اتتى جاڭا تەرمالدى كەشەننىڭ قۇرىلىسى دا جوسپارلانعان. جوباعا فرانشيزا ساتىپ الىنىپ، جەر تەلىمى بولىنگەن، بولجامدى قۇنى – 3,5 ملرد تەڭگە. جوسپار بويىنشا ول 2028 جىلعا دەيىن ىسكە اسىرىلماق.

سونىمەن قاتار، توبىل قالاسىندا حالىقارالىق «Courtyard by Marriott Kostanay» قوناق ءۇي كەشەنىنىڭ قۇرىلىسى قولعا الىنۋدا. جوبانىڭ قۇنى – 9,8 ملرد تەڭگە، كەشەن 9 قاباتتان، 141 نومىردەن تۇرادى.

قوستاناي قالاسىندا حالىقارالىق «Holiday Inn» قوناق ءۇي كەشەنىنىڭ قۇرىلىسى دا جوسپارلانعان. جوبانىڭ قۇنى – 9,0 ملرد تەڭگە، 100 نومىردەن تۇرادى.

قوستاناي اۋەجايى اۋماعىندا بۇرىنعى جاتاقحانا عيماراتى قايتا جوندەلىپ، قوناق ۇيگە اينالدىرىلۋدا، جوبا قۇنى – 600 ملن تەڭگە.

2024 جىلى التىنسارين اۋدانىندا «MUNCHEN» دەمالىس بازاسىنىڭ قۇرىلىسى جۇزەگە اسىرىلىپ، وعان 700 ملن تەڭگە جۇمسالدى.

اعىمداعى جىلى ارقالىق قالاسىندا بۇرىنعى اۆتوۆوكزال عيماراتى قايتا جوندەلىپ، قوناق ءۇي كەشەنىنە اينالدى. جوبا قۇنى – 200 ملن تەڭگە.

جىل سوڭىنا دەيىن التىنسارين اۋدانىندا «Green House» دەمالىس ايماعىنىڭ قۇرىلىسى اياقتالادى دەپ كۇتىلۋدە، قۇنى – 150 ملن تەڭگە.

سونىمەن بىرگە، قوستاناي قالاسىندا تۋريستەردىڭ بوس ۋاقىتىن قىزىقتى وتكىزۋ ءۇشىن «وسمينوگ» اكۆاپاركىن قايتا قۇرۋ جوباسى باستالدى. جوبانىڭ قۇنى – 11,2 ملرد تەڭگە، سىيىمدىلىعى – 1200 ادام. جوسپار بويىنشا جوبا 2026 جىلى اياقتالادى.

Abai.kz