عىلىم جانە جوعارى ءبىلىم ءمينيسترى ساياسات نۇربەك پرەزيدەنتتىڭ اقش-تاعى ساپارى اياسىندا وتكەن ماڭىزدى كەلىسسوزدەر جونىندە مالىمدەدى، دەپ حابارلايدى BAQ.KZ ءتىلشىسى.

ءمينيستردىڭ ايتۋىنشا، مەملەكەت باسشىسى الەمدەگى ەڭ كونە عىلىمي ورتالىقتاردىڭ ءبىرى – سميتسون ينستيتۋتىنىڭ باسشىلىعىمەن كەزدەستى. “بولاشاق” باعدارلاماسى ارقىلى قازاقستاندىق عالىمدار مەن زەرتتەۋشىلەر وسى بەدەلدى ورتالىقتا ءبىلىم الۋ مۇمكىندىگىنە يە بولادى.

سميتسون ينستيتۋتى – الەمدەگى ەڭ ءىرى مادەني، ءبىلىم بەرۋ جانە عىلىمي-زەرتتەۋ كەشەنى. ونىڭ قۇرامىندا 21 مۇراجاي مەن گالەرەيا، 14 عىلىمي جانە ءبىلىم بەرۋ ورتالىعى بار. قازاقستاندىق عالىمدار ءۇشىن بۇل جاڭا مۇمكىندىكتەردىڭ ەسىگىن اشادى، – دەپ جازدى مينيستر Telegram-داعى كانالىندا.

سونىمەن بىرگە ETS (Educational Testing Service) ۇيىمىنىڭ باسشىلىعىمەن كەلىسسوزدەر جۇرگىزىلگەن. ساياسات نۇربەكتىڭ ايتۋىنشا، وسى ۇيىم ساراپشىلارىنىڭ قاتىسۋىمەن ارنايى جۇمىس توبى قۇرىلىپ، ۇبت جۇيەسى حالىقارالىق ستاندارتتارعا سايكەس تۇبەگەيلى جاڭارتىلادى.

ETS – تەستولوگيا سالاسىنداعى ەڭ بەدەلدى ۇيىم. ولاردىڭ تاجىريبەسى نەگىزىندە قازاقستانداعى ۇلتتىق بىرىڭعاي تەستىلەۋدىڭ مازمۇنى مەن ادىستەمەسى تەرەڭ جاڭعىرتىلادى، – دەدى مينيستر.

Abai.kz