ارقالىق قالاسىندا مىرجاقىپ دۋلاتۇلىنىڭ تۋعانىنا 140 جىل تولۋىنا وراي وتكىزىلگەن «ۇلى دالا جورىعى» حالىقارالىق ات مارافونى ءوز مارەسىنە جەتتى. جارىستى «JORYQ» ات سپورتى فەدەراتسياسى ۇيىمداستىردى. وعان «AMANAT» پارتياسى، قوستاناي وبلىسى اكىمدىگى، سونداي-اق تۋريزم جانە سپورت مينيسترلىگى قولداۋ كورسەتتى.

سۋرەتتى تۇسىرگەن: اباي ۋاحيت، ماقسات شاعارباي.

جەڭىمپازداردى ماراپاتتاۋ سالتاناتىنا «AMANAT» پارتياسىنىڭ اتقارۋشى حاتشىسى داۋلەت كارىبەك، قوستاناي وبلىسىنىڭ اكىمى قۇمار اقساقالوۆ، پرەمەر-ءمينيستردىڭ كەڭەسشىسى، «JORYQ» ات سپورتى فەدەراتسياسى قامقورشىلىق كەڭەسىنىڭ توراعاسى ەرالى توعجانوۆ، «JORYQ» ات سپورتى فەدەراتسياسىنىڭ پرەزيدەنتى باقىتجان تۇرلىبەكوۆ جانە وزگە دە ازاماتتار قاتىستى.

«AMANAT» پارتياسىنىڭ اتقارۋشى حاتشىسى داۋلەت كارىبەك تورعاي ولكەسى قازاق زيالىلارىنىڭ التىن بەسىگى ءارى ەلىمىزدىڭ قاستەرلى رۋحاني ورتالىقتارىنىڭ ءبىرى ەكەنىن اتاپ ءوتتى.

«ۇلى دالا جورىعى» وسىدان ءۇش جىل بۇرىن تىكەلەي مەملەكەت باسشىسى قاسىم-جومارت توقاەۆتىڭ قولداۋىمەن باستالعان بولاتىن. ءۇش جىلدىڭ اينالاسىندا بۇل بايگە التىنشى مارتە وتكىزىلىپ جاتىر. وسى ۋاقىت ىشىندە مارافون-بايگە الەمگە تانىمال حالىقارالىق جارىس دەڭگەيىنە كوتەرىلىپ كەلەدى. وسىنىڭ ءبارى پرەزيدەنتىمىزدىڭ ۇلتتىق سپورتتى دامىتۋعا جاساپ وتىرعان قامقورلىعىنىڭ، قولداۋىنىڭ ارقاسى ەكەنىن باسا ايتۋعا ءتيىسپىز. بۇگىندە ۇلتتىق سپورت حالقىمىزدىڭ ۇلتتىق تولقۇجاتىنا، ماقتانىشىنا، ءتىپتى ءومىر سالتىنا اينالدى دەسە بولادى»، – دەدى ول.

«AMANAT»-تىڭ اتقارۋشى حاتشىسى پارتيا الداعى ۋاقىتتا دا ۇلتتىق سپورت تۇرلەرىنە، سونىڭ ىشىندە ات سپورتىنا جان-جاقتى قولداۋ كورسەتۋ جۇمىسىن جالعاستىراتىنىن ايتتى. ماسەلەن، بىلتىر ەل پرەزيدەنتى ماجىلىستەگى «AMANAT» پارتياسىنىڭ فراكتسياسى ازىرلەگەن جىلقىلاردىڭ وتاندىق تۇقىمدارىن ساقتاۋ جانە ءوسىمىن مولايتۋ ماسەلەلەرى جونىندەگى ارنايى زاڭعا قول قويدى. سونىمەن قاتار مەملەكەت باسشىسىنىڭ تاپسىرماسى بويىنشا ەلىمىزدە جاڭا ۇلتتىق سپورت ورتالىقتارى، كلۋبتار، مەكتەپتەر اشىلۋدا. وندا 600 مىڭنان استام ادام قازاقتىڭ ءداستۇرلى سپورت تۇرلەرىمەن شۇعىلدانادى.

سۋرەتتى تۇسىرگەن: اباي ۋاحيت، ماقسات شاعارباي.

قوستاناي وبلىسىنىڭ اكىمى قۇمار اقساقالوۆ «ۇلى دالا جورىعى» تەك سپورتتىق ءىس-شارا عانا ەمەس، سونىمەن قاتار قازاقستان حالقى اسسامبلەياسىنىڭ 30 جىلدىعى تۇسىندا ەل بىرلىگىن، تاتۋلىق پەن دوستىقتى نىعايتۋدىڭ ەرەكشە بەلگىسىنە اينالعانىن اتاپ ءوتتى.

«بۇل مارافون – تەك قانا سپورتتىق دودا ەمەس. ول – حالقىمىزدىڭ تاريحىن دارىپتەيتىن، ۇلتتىق رۋحىمىزدى جاڭعىرتاتىن، ەلدىگىمىزدى ايقىندايتىن تاعىلىمدى ءىس-شارا. ارقالىق تورىندە مارەسىنە جەتكەن بۇل دودا ۇلى تۇلعانىڭ رۋحىنا جاسالعان تاعزىم، ونىڭ ۇرپاققا قالدىرعان اماناتىن ۇلىقتاۋدىڭ ايقىن كورىنىسى دەپ بىلەمىن. ايتا كەتەيىن، كەلەسى جىلى ارقالىق قالاسىنىڭ 70 جىلدىق مەرەيتويى اتالىپ وتەدى. وسىعان وراي، «ۇلى دالا جورىعىن» ءداستۇرلى تۇردە جالعاستىرىپ، وسى تاريحي داتاعا ارناپ وتكىزۋدى جوسپارلاپ وتىرمىز»، – دەدى ايماق باسشىسى.

سۋرەتتى تۇسىرگەن: اباي ۋاحيت، ماقسات شاعارباي.

بەس كۇنگە سوزىلعان مارافون قورىتىندىسى بويىنشا، ءبىرىنشى ورىندى قىرعىزستاننىڭ ءبىرىنشى قۇراماسى يەلەنىپ، اسقان توزىمدىلىگى مەن شىنايى شەبەرلىگىن كورسەتتى. ولاردىڭ جالپى ۋاقىتى – 26 ساعات، 41 مينۋت، 47 سەكۋند. ەكىنشى بولىپ مارە سىزىعىن اقتوبە وبلىسىنىڭ كومانداسى كەسىپ ءوتتى (27 ساعات، 21 مينۋت). ال ءۇشىنشى ورىندى قوستاناي وبلىسىنىڭ ءبىرىنشى كومانداسى قانجىعالادى (27 ساعات، 32 مينۋت، 14 سەكۋند).

بيىل جارىسقا 19 كوماندا، سونىڭ ىشىندە قىرعىزستان جانە رەسەي مەملەكەتتەرىنىڭ وكىلدەرى، سونداي-اق قازاقستان حالقى اسسامبلەياسىنىڭ كومانداسى قاتىستى.

سۋرەتتى تۇسىرگەن: اباي ۋاحيت، ماقسات شاعارباي.

ەسكە سالا كەتەيىك، وڭىردە مىرجاقىپ دۋلاتۇلىنىڭ 140 جىلدىعىنا وراي وزگە دە اۋقىمدى مەرەكەلىك ءىس-شارالار ءوتتى. قوستانايدا ۇلى اقىن ءارى «الاش» قوزعالىسىنىڭ قايراتكەرىنە ارنالعان ەسكەرتكىش اشىلدى، ال تورعايدا رەسپۋبليكالىق ايتىس جانە عىلىمي-پراكتيكالىق كونفەرەنتسيا ءوتتى. سونىمەن قاتار دەپۋتاتتار مەن قوعام بەلسەندىلەرى اقىننىڭ تۋعان ولكەسى بيدايىق اۋىلىندا ورنالاسقان مۇراجايعا باردى.

Abai.kz