«مەن بارىنەن ايىرىلدىم – بوستاندىقتان، وتباسىمنان، بالالارىمنان» — الاياقتىق ءۇشىن سوتتالعان ايەلدىڭ حيكاياسى...

ماڭعىستاۋ وبلىسىندا 23 جاستاعى ايەل 17 ەپيزود الاياقتىق جاساعانى ءۇشىن كىنالى دەپ تانىلىپ، سوت ۇكىمىمەن 3 جىل 6 ايعا باس بوستاندىعىنان ايىرىلدى.

ءىس ماتەريالدارىنا سايكەس، ول تانىستارىنا «تاۋارلىق نەسيەنى قولما-قول اقشاعا اينالدىرىپ بەرەمىن، كەيىن ۇستەمە پايىزىمەن قايتارامىن» دەپ سەندىرگەن. اڭعال ازاماتتار ءوز اتتارىنا نەسيە رەسىمدەگەن، ال الىنعان قاراجات سوتتالعان ايەل مەن ونىڭ تۋىستارىنىڭ ەسەپشوتىنا اۋدارىلىپ وتىرعان.

سوتتا ول كىناسىن تولىق مويىنداپ، كوز جاسىن تىيا المادى. ۇكىم جاريالانعان سوڭ، ول سوت زالىندا قاماۋعا الىنىپ، تۇزەتۋ مەكەمەسىنە جىبەرىلدى.

«مەن بارىنەن ايىرىلدىم – بوستاندىقتان، وتباسىمنان، بالالارىمنان. كۇيەۋىم كەتىپ قالدى. ەكى كىشكەنتاي بالامدى كورمەگەلى ءبىر جىلدان استى. ولار مەنى وسىنداي جەردە كورگەنىن قالامايمىن. اشكوزدىك پەن اقشاعا دەگەن قۇمارلىق ءومىرىمدى كۇيرەتتى. ەندى تەك وكىنۋدەن باسقا امالىم جوق»، – دەدى ول كوز جاسىنا ەرىك بەرىپ.

قازىر وعان تەك اناسى عانا كەلەدى. ەكى كىشكەنتاي بالا انا مەيىرىمىنسىز ءوسىپ جاتىر. سوتتالعان ايەل بالالاردىڭ كوزىنە قاراۋعا ۇيالاتىندىعىن، «كىنادان ورتەنىپ جۇرگەنىن» جاسىرمايدى.

دەرەككوزى: قر ءىىم

Abai.kz