سوت رەفورماسىنىڭ جەمىسى: اقتاۋلىق بلوگەر ءوزىنىڭ «انتيكورعا» قارسى جالا جابۋ ءىسىن ءوز پايداسىنا شەشتى...

اعىمداعى جىلدىڭ مامىر ايىندا ازامات سارسەنباەۆ قر اقبتك-ءنىڭ 73-2-بابىنىڭ 2-بولىگى «جالا جابۋ» بويىنشا 20 تاۋلىككە اكىمشىلىك قاماۋعا الىنعان بولاتىن. بەس ايدان كەيىن بلوگەر ءىستى قايتا قاراۋدى جانە ۇكىمنىڭ كۇشىن جويۋعا قول جەتكىزدى.

ازامات سارسەنباەۆ سوتتا: «قۇرمەتتى سوت، ءسوزدىڭ شىنى كەرەك مەن زاڭدىلىق بويىنشا وسى جوعارعى سوتقا ۇمىتتەنىپ وتىرمىن. 20 كۇن وتىرعان كەزدە نە ءۇشىن وتىرعانىمدى تۇسىنبەدىم. قانداي زاڭ بۇزۋشىلىق ءۇشىن 20 تاۋلىككە قامالعانىمدى تۇسىنبەدىم. مەن ەشكىمنىڭ جەكە باسىنا تيىسپەدىم، ەشكىمنىڭ اتىن اتامادىم. «پالەن دەگەن ادام جەمقور، ول مىناداي زاتتى ءبۇلدىردى» دەپ جازعان جوقپىن.

مەن الەۋمەتتىك جەلىگە تەك ءوز ويىمدى جازدىم. الايدا ءبىرىنشى سوت ينستاتسياسى مەملەكەتتىك ورگاندى، مەملەكەتتىك مەكەمەنى زاڭدى تۇلعا رەتىندە – جابىرلەنۋشى رەتىندە سانادى دا، مەنى   «ىسكەرلىك بەدەلىن بۇزدىڭ» دەپ كىنالى دەپ تانىپ، 20 كۇنگە تاۋلىككە جاۋىپ تاستادى.

سوندا، اكىمدىككە سىن ايتقان، ءوز ويىن اشىق ايتقان ءار ادام پوتەنتسيالدى تۇردە 20 تاۋلىككە قامالا ما؟ ءسوز بوستاندىعى قايدا؟ كونستيتۋتسيالىق قۇقىقتارىمىز قايدا؟

سول ءۇشىن ادىلدىك ىزدەيمىن. سىزدەر وسى ىستە قانداي ۇكىم شىعارساڭىز دا مەن سوعان كونەيىن دەپ وتىرمىن. مەنى اقتاپ شىقساڭىزدار مەن قۋانامىن وعان، ارينە. الايدا «ازامات سەنىكى دۇرىس ەمەس، وسى جەردە مەملەكەتتىك ورگانعا، مەكەمەگە ايىپ تاعىپ، ىسكەرلىك بەدەلىن ءتۇسىردىڭ» دەسەڭىز وعان دا كونەمىن»، - دەدى.

ال سوتتا ادىلدىككە قول جەتكىزگەن سوڭ: «پرەزيدەنت جاريالاعان سوت رەفورمالارىنىڭ كۇشىنە ەنۋىن كۇتكەنىم ءجون بولىپ شىقتى. مەن ءوزىمنىڭ كىناسىزدىگىمە كۇماندانبادىم. بىراق مەن جاعدايدى ءادىل شەشىپ، سوت جۇيەسىنىڭ مەنىڭ ءىسىمدى مەملەكەتتىك ورگانداردى سىناعانى، ەلىمىزدىڭ زاڭدارىن پايدالانىپ، بۇرمالاعانى ءۇشىن ادامداردى «قۇلىپتاۋعا» بولاتىن پرەتسەدەنت جاساۋعا نەگىز رەتىندە پايدالانۋىنا جول بەرمەگەنىنە ءالى دە وتە قۋانىشتىمىن»، - دەپ جازدى.

Abai.kz