كاسساتسيالىق سوت زاڭسىز جۇمىستان بوساتىلعان قىزمەتكەردى قايتا جۇمىسقا قالپىنا كەلتىردى.

تالاپ قويۋشى ب. ون جىلدان استام ۋاقىت بويى «جەزقازعانتسۆەتمەت» وندىرىستىك بىرلەستىگىنە قاراستى «قازاقمىس كورپوراتسياسى» جشس-ءنىڭ جەراستى كەنىشىنىڭ ءوندىرۋ ۋچاسكەسىندە شپۋر بۇرعىلاۋشى بولىپ ەڭبەك ەتكەن.

دارىگەرلىك-كونسۋلتاتسيالىق كوميسسيانىڭ قورىتىندىسى بويىنشا قىزمەتكەرگە «پنەۆموكونيوز جانە سوزىلمالى برونحيت» دياگنوزى قويىلىپ، ول جەراستى بۇرعىلاۋشىسى قىزمەتىن اتقارۋعا جارامسىز دەپ تانىلعان جانە جەراستى جاعدايلارىمەن، شاڭدانۋمەن، گازدانۋمەن جانە سالقىنداۋمەن بايلانىستى ەمەس جۇمىسقا اۋىستىرۋدى قاجەت ەتەدى دەگەن شەشىم قابىلدانعان.

وسىعان بايلانىستى ب. جۇمىس بەرۋشىنىڭ باستاماسىمەن، دەنساۋلىق جاعدايىنا وراي اتقارىپ جۇرگەن لاۋازىمىنا سايكەس كەلمەيتىندىگى سەبەپتى جۇمىستان بوساتىلعان.

تالاپ قويۋشى جۇمىستان بوساتۋ تۋرالى بۇيرىققا شاعىمدانىپ، ءوزىن قايتادان قىزمەتىنە قالپىنا كەلتىرۋدى، جەڭىل جۇمىسقا ۋاقىتشا اۋىستىرۋ مىندەتىن جۇمىس بەرۋشىگە جۇكتەۋدى، ءماجبۇرلى بوس جۇرگەن ۋاقىتى ءۇشىن جالاقى مەن مورالدىق زيان وتەمىن ءوندىرىپ بەرۋدى سۇراعان.

ءبىرىنشى جانە اپەللياتسيالىق ساتىداعى سوتتار تالاپ قويۋشىنىڭ تالابىن قاناعاتتاندىرۋدان باس تارتقان.

الايدا، ازاماتتىق ىستەر جونىندەگى كاسساتسيالىق سوت، تومەندەگى نەگىزدەر بويىنشا اتالعان سوت اكتىلەرىن كۇشىن جويدى.

قازاقستان رەسپۋبليكاسىنىڭ ەڭبەك كودەكسىنىڭ 43-بابىنا سايكەس، وندىرىستىك جاراقات، كاسىبي اۋرۋ نەمەسە ەڭبەك مىندەتتەرىن ورىنداۋ كەزىندە الىنعان وزگە دە دەنساۋلىققا زاقىم كەلتىرۋ جاعدايىندا، نە وندىرىستىك قىزمەتكە قاتىسى جوق وزگە دە اۋرۋ ءتۇرى انىقتالعان جاعدايدا، مەديتسينالىق قورىتىندى نەگىزىندە جۇمىس بەرۋشى قىزمەتكەردى ەڭبەك قابىلەتى قالپىنا كەلگەنگە دەيىن نەمەسە مۇگەدەكتىك (نە كاسىبي ەڭبەك قابىلەتىنەن ايىرىلۋ) بەلگىلەنگەنگە دەيىن دەنساۋلىعىنا قارسى كورسەتىلمەيتىن باسقا جۇمىسقا ۋاقىتشا اۋىستىرۋعا مىندەتتى.

ەڭبەك شارتى قىزمەتكەردىڭ جازباشا تۇردە ۋاقىتشا اۋىسۋدان باس تارتقان جاعدايىندا عانا توقتاتىلۋى مۇمكىن.
الايدا، ءىس ماتەريالدارىن زەرتتەۋ ناتيجەسىندە، جۇمىس بەرۋشى تاراپىنان تالاپ قويۋشىعا باسقا لاۋازىم ۇسىنۋ جونىندە ەشقانداي ۇسىنىس جۇمىستان بوساتۋعا دەيىن جاسالماعانى انىقتالدى.

وسىعان بايلانىستى، جۇمىستان بوساتۋ ءراسىمى بۇزىلعان دەپ تانىلىپ، كاسساتسيالىق سوت تالاپ قويۋشى ب.-نىڭ تالابىن قاناعاتتاندىردى.

جۇمىستان بوساتۋ تۋرالى بۇيرىق زاڭسىز دەپ تانىلىپ، قىزمەتكەر بۇرىنعى جۇمىسىنا قايتا ورنالاستىرىلدى، جۇمىس بەرۋشىگە ونىڭ دەنساۋلىعىنا قارسى كورسەتىلمەيتىن جەڭىل جۇمىسقا اۋىستىرۋ مىندەتى جۇكتەلدى. ەگەر مۇنداي مۇمكىندىك بولماعان جاعدايدا، مۇگەدەكتىك نەمەسە كاسىبي ەڭبەك قابىلەتىنەن ايىرىلۋ بەلگىلەنگەنگە دەيىن قىزمەتكەردى جۇمىستان بوساتپاي، ەڭ تومەنگى جالاقى مولشەرىن ساقتاي وتىرىپ بوساتىلعان كۇيىندە قالدىرۋ مىندەتتەلدى.

سونىمەن قاتار، ءماجبۇرلى بوس جۇرگەن ۋاقىتى ءۇشىن تالاپ قويۋشىنىڭ پايداسىنا التى ايلىق جالاقى مولشەرىندە – 3 000 000 تەڭگە جانە مورالدىق زيان ءۇشىن 200 000 تەڭگە وتەماقى ءوندىرىلدى.

ازاماتتىق ىستەر جونىندەگى كاسساتسيالىق سوت

Abai.kz