دنەپروپەتروۆسك وبلىستىق ولكەتانۋ مۋزەيىنىڭ باستاماسىمەن ۋكراين اسكەرى دونباس ماڭىنداعى شايقاس اۋماعىنان قۇندى تاريحي جادىگەر سانالاتىن تۇركىلەردىڭ ەجەلگى بالبال تاستارىن قاۋىپسىز جەرگە جەتكىزدى.

باق بۇل بالبال تاستار ءحى-ءحىىى عاسىرلار ارالىعىندا قازىرگى ۋكراينانىڭ وڭتۇستىك-شىعىسىن مەكەندەگەن قىپشاق-تۇرىكتەردىڭ مۇراسى ەكەنىن جازۋدا.

بۇگىندە بۇل ايماق رەسەي اسكەرىمەن ۋاقىتشا وككۋپاتسيالانعان. سوعان قاراماستان، ۋكراين ساربازدارى 20 بالبال تاستى ۇرىس دالاسىنان شىعارىپ، قاۋىپسىز جەرگە جەتكىزگەن.

ءاربىر بالبال تاس عاسىرلار قويناۋىنان سىر شەرتەتىن قۇندى جادىگەر. قىپشاقتاردىڭ مادەني كودى، دۇنيەتانىمى مەن رۋحاني بولمىسى وسى بالبال تاستاردىڭ قاتپارىندا جاتىر دەسەك ارتىق ايتقاندىق بولماس ەدى.

سيرياداعى پالميرا قيراتىلىپ، اۋعانستانداعى باميان بۋددالارى جەرمەن جەكسەن ەتىلگەندە، بۇكىل الەم ءۇنسىز كۇيزەلگەنى ەسىمىزدە. سونداي اۋىر جاعداي تۇركى بالبال تاستارىن اينلىپ ءوتتى.

رەسەيدىڭ ۋكرايناعا جاساعان باسقىنشىلىعى ينفراقۇرىلىمدى كۇيرەتىپ، بەيبىت تۇرعىنداردىڭ ءومىرىن كۇل-تالقان ەتىپ جاتقان جوق. ول ەۋرازيا كەڭىستىگىندەگى تاريحي-مادەني تەپە-تەڭدىكتى دە بۇزىپ جاتىر.

كيەۆ، حاركوۆ، ماريۋپول ماڭىنداعى ەجەلگى قورىمدار، جادىگەرلەر مەن قازبالار تىكەلەي زىمىران استىندا قالۋدا. وسىنداي الاساپىران ساتتە ۋكراين ساربازدارىنىڭ بالبال تاستاردى قۇتقارۋى ولاردىڭ دەگەن قۇرمەتىن كورسەتەدى.

ءتىپتى، كەيبىر بالبال تاستار اۋىر اسكەري تەحنيكامەن ارنايى وپەراتسيا ارقىلى الىنىپ شىققان. مۇنداي جۇرەك تەبىرەنتەر كورىنىستەر تۋراسىندا بولاشاقتا فيلم تۇسىرۋگە دە بولادى.

قىپشاق بالبال تاستارىن امان الىپ شىعۋ ەرتەڭگى ۇرپاقتىڭ تاريحي جادىسىن ساقتاپ قالۋدىڭ، وتكەنمەن بايلانىسىن ۇزبەۋدىڭ، وركەنيەتتەردىڭ اراسىن الشاقتاتپاي، كەرىسىنشە، جاقىنداتا ءتۇسۋدىڭ ۇلگىسى. ۋكراينا جاۋىنگەرلەرى تەك شەكاراسىن عانا قورعاپ جاتقان جوق. ولار ءبىزدىڭ دە رۋحاني شەكارامىزدى ساقتاپ وتىر.

Abai.kz