قوعامدىق پالاتا – قوعامدىق دەموكراتيانىڭ ءتيىمدى ينستيتۋتى

ادىلدىك، تەڭدىك، ادام قۇقىعىن قورعاۋ جانە قوعامدىق ينستيتۋتتاردى دامىتۋ – پرەزيدەنت ساياساتىنىڭ نەگىزگى قاعيداتتارى. وسى قۇندىلىقتاردى ىسكە اسىرۋدا ءماجىلىس جانىنداعى قوعامدىق پالاتا ماڭىزدى ءرول اتقارىپ كەلەدى. بۇل تۋرالى ءماجىلىس دەپۋتاتى مارات باشيموۆ 24kz ارناسىنداعى ءوزىنىڭ اۆتورلىق باعدارلاماسىندا ايتىپ بەردى.

مارات باشيموۆ قوعامدىق پالاتانىڭ ەلدەگى دەموكراتيالىق پروتسەستەردى، ساياسي مادەنيەتتى دامىتۋداعى ماڭىزىنا كەڭىنەن توقتالدى.

– قوعامدىق پالاتا – زاڭ شىعارۋ بارىسىندا جۇرتشىلىقتىڭ پىكىرىن ەسكەرەتىن قوعامدىق ينستيتۋت. بۇل – حالىق پەن بيلىك اراسىنداعى اشىق ديالوگ الاڭى. ونىڭ جۇمىسى – پرەزيدەنت رەفورمالارىنىڭ تابىستى جۇزەگە اسۋىنىڭ كورىنىسى، – دەدى مارات باشيموۆ.

قازاقستان پرەزيدەنتى قاسىم-جومارت توقاەۆ بارلىق پىكىرتالاس كوشەدە ەمەس، پارلامەنتتە بولۋى كەرەك ەكەنىن بىرنەشە رەت اتاپ وتكەن بولاتىن. وسى باعىتتا ءماجىلىس جانىنداعى قوعامدىق پالاتا كوپ جۇمىس اتقارىپ، ءوز ميسسياسىن ورىنداپ كەلەدى.

پالاتا بۇگىندە پرەزيدەنتتىڭ جولداۋلارىندا كورسەتىلگەن ستراتەگيالىق باعىتتاردى، سونىڭ ىشىندە تسيفرلىق ترانسفورماتسيا مەن جاساندى ينتەللەكتىنى ەنگىزۋدى بەلسەنە قولداپ وتىر.

– جۋىردا جاساندى ينتەللەكت تۋرالى زاڭ قابىلداندى، پارلامەنتتىك تىڭدالىم ءوتتى. ەندى تسيفرلىق كودەكس ازىرلەنىپ جاتىر. وسى پروتسەستىڭ بارىنە قوعامدىق پالاتانىڭ ساراپشىلارى بەلسەنە اتسالىسۋدا، – دەدى مارات باشيموۆ.

سونىمەن قاتار دەپۋتات قوعامدىق پالاتا پارلامەنت پەن ساراپشىلار قوعامداستىعى اراسىنداعى بايلانىستى نىعايتقانىن اتاپ ءوتتى.

قازىرگى تاڭدا ءماجىلىس پەن قوعامدىق پالاتا اراسىندا سەنىمدى ارىپتەستىك ورناعان. دەپۋتاتتار پالاتا مۇشەلەرىنىڭ ۇسىنىستارىنا ەرەكشە ءمان بەرىپ، كوپتەگەن زاڭنامالىق باستاما سونىڭ نەگىزىندە قابىلدانىپ وتىر.

دەپۋتاتتىڭ ايتۋىنشا، 2022 جىلى قۇرىلعان ساتتەن باستاپ قوعامدىق پالاتادا جۇزدەگەن تالقىلاۋ وتكىزىلدى، ماڭىزدى زاڭدارعا تۇزەتۋلەر ەنگىزىلدى، وڭىرلەردە كوشپەلى وتىرىستار ۇيىمداستىرىلدى.

سونىڭ ىشىندە جەرگىلىكتى ءوزىن-ءوزى باسقارۋ، دەنساۋلىق ساقتاۋ، سايلانعان اكىمدەردىڭ جۇمىسى، ەلەكترساموكاتتار مەن كاليانعا قاتىستى زاڭداردىڭ ورىندالماۋى، ونلاين-كۋرستار مەن كوۋچينگ نارىعىنىڭ رەتتەلمەۋى سەكىلدى تاقىرىپتار جان-جاقتى تالقىلاندى.

مارات باشيموۆ كەيبىر پروبلەمالاردى ناقتى مىسالدارمەن ءتۇسىندىرىپ، قوعام سەنىمىن نىعايتۋ ءۇشىن قۇقىقتىق نورمالاردىڭ شىنايى ورىندالۋى قاجەتتىگىن باسا ايتتى.

– زاڭ بار، بىراق ورىندالمايدى. بۇل قوعامنىڭ زاڭعا دەگەن سەنىمىن السىرەتەدى. سوندىقتان قوعامدىق پالاتا تەك زاڭداردى تالقىلاپ قانا قويماي، ولاردىڭ تيىمدىلىگىن ارتتىرۋ تەتىكتەرىن ۇسىنۋى قاجەت، – دەدى دەپۋتات.

سونىمەن قاتار الداعى كەزەڭدە دە قوعامدىق پالاتاعا الدىنا اۋقىمدى مىندەتتەر قويىلىپ وتىر. ول – بيزنەس سالاسىنداعى زاڭنامالاردى قايتا قاراۋ، دەموگرافيالىق ۇردىستەردى زەرتتەۋ، ساياسي رەفورمالار بويىنشا قوعامدىق پىكىرتالاس ۇيىمداستىرۋ.

Abai.kz