قازاقستاننىڭ XII ازاماتتىق فورۋمىندا ءماجىلىس دەپۋتاتى ەلنۇر بەيسەنباەۆ ەلدىڭ ەكونوميكالىق تۇراقتىلىعىن نىق ساقتاپ، بارلىق الەۋمەتتىك مىندەتتەمەلەرىن تولىق ورىنداپ وتىرعانىن جانە ۇزاقمەرزىمدى بيۋدجەتتىك جوسپارلاۋى بار مەملەكەتتەردىڭ قاتارىندا ەكەنىن اتاپ ءوتتى.

https://baq.kz/

ءبىز بيۋدجەتكە تۇسىمدەردىڭ تۇراقتىلىعىن جانە ەكونوميكانىڭ ورنىقتى ءوسىمىن بايقاپ وتىرمىز. ازاماتتار الدىنداعى بارلىق الەۋمەتتىك مىندەتتەمەلەر تولىق ورىندالۋدا، - دەدى ەلنۇر بەيسەنباەۆ.

قازاقستان – ءۇش جىلدىق بيۋدجەت جۇيەسىنە وتكەن از ەلدىڭ ءبىرى

دەپۋتاتتىڭ ايتۋىنشا، ءۇش جىلدىق بيۋدجەتكە كوشۋ – ەلدىڭ بولجامدىلىق پەن ستراتەگيالىق باسقارۋعا باعىتتالعان ماڭىزدى قادامى.

قازاقستان ءۇش جىلدىق بيۋدجەتكە وتكەن ساناۋلى ەلدەردىڭ ءبىرى. بۇل — ەكونوميكانىڭ تۇراقتىلىعى مەن ۇزاقمەرزىمدى جوسپارلاۋ قابىلەتىنىڭ ايعاعى. الەمدە شامامەن 50 مەملەكەت قانا وسىنداي جۇيەگە كوشكەن، ال قالعان 150 ەل ءالى دە تۇراقسىزدىق پەن بولجانبايتىن كىرىس جاعدايىندا ءومىر ءسۇرىپ جاتىر، - دەدى ول.

2024 جىلى قازاقستان بيۋدجەتىنىڭ كىرىستەرى 44 ميلليارد دوللاردان اسىپ، بۇل كورسەتكىش وزبەكستاننان ءبىر جارىم ەسە جوعارى بولعان.

حالىقارالىق ۆاليۋتا قورىنىڭ دەرەكتەرىنە سۇيەنسەك، قازاقستان يراننان 4 ميلليارد دوللارعا، ال بولگاريادان 10 ميلليارد دوللارعا كوپ كىرىس جيناعان، - دەپ مىسال كەلتىردى دەپۋتات.

الەۋمەتتىك ساياسات: تولەمدەردىڭ ءوسۋى مەن وڭىرلەردى قولداۋ

بەيسەنباەۆتىڭ ايتۋىنشا، مەملەكەت زەينەتاقى مەن جاردەماقىنى تەك يندەكساتسيالاپ قانا قويماي، جىل سايىن ولاردىڭ مولشەرىن ارتتىرىپ وتىر.

بۇل جۇيەلى ءتاسىل. الداعى ون جىلدا الەۋمەتتىك تولەمدەرگە جۇمسالاتىن شىعىن تاعى 10 تريلليون تەڭگەگە وسەدى، - دەدى ول.

2025 جىلدىڭ قورىتىندىسى بويىنشا وڭىرلەردى دامىتۋعا رەسپۋبليكالىق بيۋدجەتتىڭ 30 پايىزى — 76 تريلليون تەڭگە باعىتتالعان. بۇل — رەكوردتىق كورسەتكىش.

قازاقستاندا بار بولعانى ءۇش ءوڭىر عانا بيۋدجەتتىڭ دونورى سانالادى، ال ون جەتى ءوڭىر – دوتاتسيالىق. نەگىزگى اۋىرتپالىق رەسپۋبليكالىق بيۋدجەتكە تۇسەدى. كەيدە قاراجاتتىڭ كوبىرەك بولىگىن جەرگىلىكتى دەڭگەيدە قالدىرۋ تۋرالى ۇسىنىستار ايتىلادى، الايدا ەلدىڭ تۇراقتىلىعى مەن وڭىرلەردىڭ دامۋىن ءدال وسى ورتالىق بيۋدجەت قامتاماسىز ەتىپ وتىر، - دەپ اتاپ ءوتتى پارلامەنتاري.

رەزەرۆتەر، قارىز جانە قارجىلىق تۇراقتىلىق

بەيسەنباەۆتىڭ ايتۋىنشا، قازاقستاننىڭ قارجىلىق قاۋىپسىزدىك جاستىعى ايتارلىقتاي.

جىل باسىنان بەرى حالىقارالىق رەزەرۆتەر، ونىڭ ىشىندە التىن-ۆاليۋتا اكتيۆتەرى مەن باعالى قاعازدار كولەمى 20 پايىزعا ءوسىپ، 52 ميلليارد دوللارعا جەتتى. سوڭعى دەرەكتەرگە سايكەس، قازىر بۇل كورسەتكىش 64 ميلليارد دوللارعا تەڭ. جالپى العاندا، بۇل – 63 تريلليون تەڭگە، ياعني ەلدىڭ ءۇش جىلدىق بيۋدجەتىنە بالاما سوما، - دەدى دەپۋتات.

ونىڭ ايتۋىنشا، ەلدىڭ مەملەكەتتىك قارىزى قاۋىپسىز دەڭگەيدە – ءجىو-ءنىڭ 25 پايىزى كولەمىندە قالىپ وتىر. كەيبىر ءوڭىر ەلدەرىندە بۇل كورسەتكىش 40–45 پايىزعا دەيىن جەتەدى.

قازاقستان قارجىلىق تۇراقتىلىق ايماعىندا قالا بەرەدى، - دەدى ول.

بەيسەنباەۆتىڭ ايتۋىنشا، جاڭا بيۋدجەت كودەكسىندە قارجىنىڭ اشىق ءارى ءتيىمدى جۇمسالۋىنا ارنالعان ناقتى تەتىكتەر قاراستىرىلعان.

ماقساتتى ترانسفەرتتەردى پايدالانۋ قاتاڭ شەكتەلدى – تەك ماڭىزدى ينفراقۇرىلىمدىق جوبالارعا باعىتتالادى. پارلامەنتتىك باقىلاۋ كۇشەيتىلدى. ءبىز بيۋدجەت تاپشىلىعىن ازايتۋ باعىتىن ۇستانىپ، شىعىستاردى 2 تريلليون تەڭگەگە قىسقارتتىق. وسى قاراجاتتى ۇلتتىق قورعا ساقتادىق، - دەپ ءتۇسىندىردى دەپۋتات.

قازاقستان – نەگىزگى كورسەتكىشتەر بويىنشا الەمنىڭ ۇزدىك 50 ەلىنىڭ قاتارىندا

دەپۋتاتتىڭ ايتۋىنشا، قازاقستان ماكروەكونوميكالىق نەگىزگى پارامەترلەر بويىنشا الەمنىڭ توپ-50 ەلىنە كىرەدى جانە ساياسي، ەكونوميكالىق جۇيەسىنىڭ تۇراقتىلىعىن ساقتاپ وتىر.

ارينە، كەيبىر باعىتتاردا جەتىلدىرۋدى قاجەت ەتەتىن ماسەلەلەر بار، دەگەنمەن ەل جالپى العاندا تۇراقتىلىق پەن دامۋدىڭ بىرىزدىلىگىن كورسەتىپ وتىر، - دەدى بەيسەنباەۆ.

سونىمەن قاتار ول ساياسي جاڭعىرتۋدىڭ ماڭىزىن ەرەكشە اتاپ ءوتتى.

بىزدە ۇلتتىق ديالوگ پلاتفورماسى قالىپتاستى، پارلامەنتتىك مادەنيەت پەن كوپپارتيالىق جۇيە دامىپ كەلەدى. ازاماتتىق بەلسەندىلىك تانىتىپ جۇرگەن جاستاردىڭ قاتارى ارتىپ بارادى. بۇگىندە ءاربىر ازامات ءوز پىكىرىن اشىق ايتۋعا جانە ەل ومىرىنە ەركىن قاتىسۋعا مۇمكىندىك الىپ وتىر، - دەدى دەپۋتات.

ونىڭ ايتۋىنشا، سايلاۋ جۇيەسىن رەفورمالاۋ ناتيجەسىندە سايلاۋ ۇدەرىسى اشىق ءارى باسەكەلى سيپاتقا يە بولعان.

قازىر سايلاۋ بارلىق دەڭگەيدە – اۋىلدان باستاپ رەسپۋبليكالىق قۇرىلىمدارعا دەيىن – وتكىزىلىپ كەلەدى. بۇل دەموكراتيالىق تاجىريبەنىڭ قالىپتى نورماسىنا اينالدى، - دەپ تۇيىندەدى ەلنۇر بەيسەنباەۆ.

Abai.kz