«الەۋمەتتىك مەديتسينالىق ساقتاندىرۋ قورى» (امسق) كەاق استانا قالالىق فيليالىنىڭ ديرەكتورى گۇلجان شايحىبەكوۆامەن وتاندىق ساقتاندىرۋ جۇيەسىندەگى رەفورمالار مەن جاڭاشىلدىقتار، مەديتسينالىق قىزمەتتىڭ حالىققا قولجەتىمدىلىگى مەن امسق-نىڭ بۇگىنگى تاڭداعى قىزمەتىندەگى وزگەرىستەر تۋرالى كەڭىرەك سۇحباتتاسقان ەدىك.

سۋرەت: اۆتوردىڭ جەكە مۇراعاتىنان الىندى.

ون ءتورت ستاندارتتى ەنگىزدىك

– گۇلجان تۇرارقىزى، مەملەكەت باسشىسى قاسىم-جومارت توقاەۆ 2025 جىلعى 9 قىركۇيەكتەگى حالىققا جولداۋىندا جاساندى ينتەللەكت تەحنولوگياسىن قولدانىپ، مەديتسينالىق قىزمەتتەردىڭ ساپاسىنا جانە كولەمىنە مونيتورينگ جۇرگىزەتىن جاڭا جۇيە قالىپتاستىرۋعا ۇكىمەتكە تاپسىرما بەردى. قازىرگى كەزدە امسق مەديتسينالىق قىزمەتتەردىڭ ساپاسى مەن كولەمىنە قالاي مونيتورينگ جۇرگىزىپ وتىر؟ ءسىزدىڭ ويىڭىزشا، مونيتورينگ جۇرگىزەتىن جاڭا جۇيە قالاي قالىپتاسادى؟

– بۇگىندە جاساندى ينتەللەكت ارقىلى ءبىز مەديتسينالىق كومەك كورسەتۋدىڭ 14 ستاندارتىن ىسكە قوستىق. سونداي-اق جاساندى ينتەللەكت ارقىلى 350 اقاۋلار مەن ءتارتىپ بۇزۋلاردى انىقتاۋ الگوريتمدەرىن جۇزەگە اسىردىق. بۇل رەتتە جي 45 الگوريتمدى دەربەس ازىرلەدى، ولار قازىر سىناقتان وتۋدە. بۇل جۇمىستى ءارى قاراي دامىتۋ ءۇشىن مەديتسينالىق كومەك ستاندارتتارى مەن كلينيكالىق حاتتامالاردى جاڭارتۋ جانە تسيفرلاندىرۋ كوزدەلىپ وتىر. ارينە بۇل جۇمىستاردى مەديتسينالىق قاۋىمداستىقپەن بىرىگىپ جاساعان ءجون دەپ ويلايمىن. قازىر جي الگوريتمى قولعا الىنىپ جاتقان سالالار بار. بۇل ءارتۇرلى قىزمەتتەردىڭ سپەتسيفيكالىق ەرەكشەلىكتەرىن تولىعىراق زەرتتەۋدى تالاپ ەتەدى. بۇكىل الەمدە مەديتسينالىق قىزمەتتەر مەن شىعىندار كولەمىنىڭ، تەحنولوگيالىق جەتىستىكتەردىڭ جانە اقپارات كولەمىنىڭ وسۋىنە بايلانىستى دەنساۋلىق ساقتاۋ پروتسەستەرىن اۆتوماتتاندىرۋ نەگىزگى باسىمدىققا اينالۋدا.

– مەملەكەت باسشىسى بيىلعى جولداۋىندا: «بيۋدجەت قارجىسى شەكتەۋلى كەزدە الەۋمەتتىك مەديتسينالىق ساقتاندىرۋ قورى ءىس جۇزىندە بيۋدجەتتى رەتتەۋشى ءرولىن اتقارىپ وتىر. قور دايىن ءونىم جەتكىزەتىن كاسىپورىندارعا باقىلاۋدى كۇشەيتكەننىڭ ارقاسىندا شىعىندى كوبەيتپەي ۇستاپ وتىر» دەي كەلە ءمامس-ءتىڭ تيىمدىلىگى مەن ومىرشەڭدىگىن اتاپ ءوتتى. وسى ورايدا قوردىڭ جۇمىسى، باقىلاۋ تەتىكتەرى، رەتتەۋشىلىك فۋنكتسياسى تۋرالى كەڭىرەك اڭگىمەلەپ بەرسەڭىز.

– الەۋمەتتىك مەديتسينالىق ساقتاندىرۋ قورى بۇگىنگى تاڭدا قازاقستاننىڭ دەنساۋلىق ساقتاۋ جۇيەسىندەگى ماڭىزدى قارجىلىق ينستيتۋت بولىپ وتىر. پرەزيدەنت اتاپ وتكەندەي، بيۋدجەت مۇمكىندىگى شەكتەۋلى جاعدايدا قور شىعىنداردى ارتتىرماي، تيىمدىلىكتى ساقتاپ، جۇيەنىڭ تۇراقتىلىعىن قامتاماسىز ەتىپ كەلەدى. مۇنى بىرنەشە مىسالدارمەن تۇسىندىرۋگە بولادى. مىسالى، قوردىڭ نەگىزگى قىزمەتىن الايىق. امسق — مەملەكەت پەن ازاماتتار اراسىنداعى قارجىلىق دانەكەر. ياعني، ول ازاماتتار مەن جۇمىس بەرۋشىلەردىڭ جارنالارىن جيناپ، سول قاراجات ەسەبىنەن حالىققا كورسەتىلەتىن مەديتسينالىق قىزمەتتەردى ساتىپ الادى. بۇرىن بۇل فۋنكتسيالار تىكەلەي مەملەكەتكە تيەسىلى بولسا، قازىر قور ساتىپ الۋ جانە مونيتورينگ جۇيەسىن نارىقتىق پرينتسيپتەرگە جاقىنداتتى: ءتيىمدى جۇمىس ىستەيتىن ەمحانالار مەن اۋرۋحانالار كوبىرەك تاپسىرىس بەرۋدى قولعا الىپ وتىر. ەكىنشى مىسال - باقىلاۋ جانە مونيتورينگ تەتىكتەرى. قور قىزمەت كورسەتۋشى مەديتسينالىق ۇيىمدارعا تەك قارجى بولۋمەن شەكتەلمەيدى. سونىمەن قاتار، كورسەتىلگەن قىزمەتتەردىڭ ساپاسىن تەكسەرەدى; ءاربىر قىزمەتتىڭ ناقتى كولەمى مەن قۇنىنا مونيتورينگ جۇرگىزەدى; ەم-دوم الۋشىلاردىڭ شاعىمدارىن تالدايدى جانە كەرى بايلانىس ورناتادى; جالعان نەمەسە نەگىزسىز كورسەتىلگەن قىزمەتتەردى انىقتاپ، قارجىنى كەرى قايتارادى. مىسالى، قور اقپاراتتىق جۇيەلەر ارقىلى ەمحانالاردىڭ ناقتى كورسەتكىشتەرىن (قابىلدانعان ناۋقاستار، قويىلعان دياگنوزدار، ەمدەۋ كولەمى) ونلاين باقىلاي الادى. رەتتەۋشىلىك فۋنكتسيانى دەنساۋلىق ساقتاۋ مينيسترلىگى اتقارادى. سونىمەن قاتار، قور ءىس جۇزىندە دەنساۋلىق ساقتاۋ سالاسىنىڭ قارجىلىق رەتتەۋىش قۇرالدارىنىڭ ءبىرى بولعانىن ايتۋىمىز كەرەك. ول مەديتسينالىق ۇيىمدارعا تەگىن مەديتسينالىق كومەكتىڭ كەپىلدىك بەرىلگەن كولەمى (تمككك) جانە مىندەتتى الەۋمەتتىك مەديتسينالىق ساقتاندىرۋ ء(مامس) شارتتارىن بەلگىلەيدى; سالاداعى باسەكەلەستىكتى ارتتىرۋعا ىقپال ەتەدى; قىزمەت ساپاسىنا قاراي تولەم جۇيەسىن ەنگىزەدى. وسى ارقىلى بيۋدجەت شىعىنىن كوبەيتپەي، بىراق قىزمەت ساپاسىن جاقسارتۋعا مۇمكىندىك بەرەدى دەگەن ماقساتىمىز بار. سونىڭ ناتيجەسىندە ءتيىمسىز شىعىندار قىسقارىپ، مەديتسينالىق قىزمەتتەردىڭ اشىقتىعى ارتىپ، ازاماتتاردىڭ ساقتاندىرۋ ارقىلى ساپالى قىزمەتكە قول جەتكىزۋ مۇمكىندىگى كەڭەيادى. قورىتىندىلاي ايتقاندا، امسق بۇگىندە تەك قارجى بولەتىن قۇرىلىم ەمەس — ول سالاداعى قارجىنىڭ ءتيىمدى اينالىمىن قامتاماسىز ەتەتىن، ساپانى رەتتەيتىن جانە ازاماتتاردىڭ قۇقىقتارىن قورعايتىن ستراتەگيالىق ينستيتۋت دەڭگەيىنە كوتەرىلدى. 

سۋرەت: اۆتوردىڭ جەكە مۇراعاتىنان الىندى.

قىمبات ەم-دومدى تەگىن الادى

– ۇكىمەت وتىرىسىندا دەنساۋلىق ساقتاۋ ءمينيسترى اقمارال ءالنازاروۆا ءمامس جۇيەسى ىسكە قوسىلعاننان كەيىن سالانى قارجىلاندىرۋدىڭ ورتاشا جىلدىق ءوسىمىنىڭ قارقىنى 2 ەسەدەن استام ۇلعايىپ، 23.8 پايىزدى قۇراعانىن مالىمدەدى. مينيستر 2027 جىلعا قاراي ءمامس قاراجاتى مەديتسينا سالاسىنىڭ شىعىستارىن نەگىزىنەن قارجىلاندىراتىن جيىنتىق كوزگە اينالاتىنىن ايتتى. بۇل قاراپايىم حالىق ءۇشىن مەديتسينالىق قىزمەتتەردىڭ قولجەتىمدىلىگىن ارتتىرۋعا جانە مەديتسينا قىزمەتكەرلەرىنىڭ ەڭبەك جاعدايلارىن جاقسارتۋعا مۇمكىندىك بەرەتىنىنە توقتالدى. قاراپايىم حالىققا كورسەتىلەتىن مەديتسينالىق قىزمەتتەردىڭ قولجەتىمدىلىگى ارتقانىن نەدەن كورۋگە بولادى؟ ناقتى مىسالدار كەلتىرسەڭىز.

– ءمامس جۇيەسى ىسكە قوسىلعالى حالىققا مەديتسينالىق قىزمەتتىڭ قولجەتىمدىلىگى ناقتى ارتتى. بىرىنشىدەن، بۇگىندە تۇرعىنداردىڭ 84 پايىزدان استامى ساقتاندىرىلعان جانە بۇرىن اقىلى بولعان كت، مرت، ستوماتولوگيا، قىمبات جوعارى تەحنولوگيالىق قىزمەتتەردى تەگىن الا الادى. ەكىنشىدەن، ءمامس-ءتىڭ قاراجاتى كوبەيۋىنە بايلانىستى مەديتسينالىق كومەك كورسەتۋشىلەردىڭ سانى ارتىپ كەلەدى (وڭىرلەردە جاڭا مەديتسينالىق تەحنيكا ساتىپ الىنىپ، اۋىلدىق ەمحانالاردا دياگنوستيكا قولجەتىمدى بولدى). ولاردىڭ دەڭگەيىنىڭ ءوسۋى مەديتسينالىق كومەكتى حالىققا جاقىنداتا ءتۇستى. ۇشىنشىدەن، تسيفرلاندىرۋدىڭ ناتيجەسىندە دارىگەردىڭ قابىلداۋىنا جازىلۋ مەن جولداما الۋ جەڭىلدەپ، كەزەك كۇتۋ ۋاقىتى قىسقاردى. ناتيجەسىندە قاراپايىم ازامات ساپالى مەديتسينالىق كومەككە بۇرىنعىدان الدەقايدا وڭاي قول جەتكىزەدى. ءمامس جۇيەسىندە حالىق ءۇشىن قولجەتىمدى بولعان ەڭ قاراپايىم مۇمكىندىكتەرگە مىسال كەلتىرەيىن. ءمامس جۇيەسىنىڭ باستى ارتىقشىلىعى – اي سايىنعى شاعىن جارنالار ارقىلى قىمبات ەمدى تەگىن الۋ مۇمكىندىگى. سوزىلمالى اۋرۋلارى بار ازاماتتار (گيپەرتونيا، ديابەت، دەمىكپە جانە ت.ب.) دارىگەردىڭ تۇراقتى باقىلاۋىندا بولىپ، تەكسەرۋلەر مەن ەم-شارالاردان تەگىن وتەدى. ال جەدەل كومەك قاجەت بولعان جاعدايلاردا (ينفاركت، ينسۋلت، وپەراتسيا قاجەت بولعاندا) — قىمبات ەم مەن وڭالتۋ دا ءمامس ەسەبىنەن تەگىن كورسەتىلەدى. ياعني، اي سايىن از عانا جارنا تولەي وتىرىپ، ادام ءوز دەنساۋلىعىن قارجىلاي قورعاپ، كەرەك كەزدە ساپالى مەديتسينالىق كومەككە اقىسىز قول جەتكىزەدى. ياعني، قاراپايىم تىلمەن ايتقاندا، ءمامس-ءتىڭ ارقاسىندا «اۋىرىپ قالسام، ءبارى اقىلى» دەگەن قورقىنىش ازايدى.

– اقمارال ءالنازاروۆا ءمامس جۇيەسىنىڭ نەگىزگى جەتىستىگى – «تابىستى ادامنىڭ وسال توپقا جاردەمى» قاعيداتىنىڭ ءساتتى ىسكە اسىرىلعانىن ەكەنىن قاداپ ايتتى. وسى فورمۋلانى قاراپايىم تىلمەن ءتۇسىندىرىپ بەرسەڭىز. پرەزيدەنتتىڭ جولداۋىندا دا حالىقتىڭ الەۋمەتتىك جاعىنان وسال توپتارىنا قولداۋ كورسەتۋ تۋرالى اشىق ايتىلدى. وسى باعىتتاعى قوردىڭ جۇمىسى قالاي جۇرگىزىلەدى؟

– «تابىستى ادامنىڭ وسال توپقا جاردەمى» قاعيداتى – ءمامس جۇيەسىنىڭ الەۋمەتتىك وزەگىن كورسەتەتىن باستى ۇستانىم. قاراپايىم تىلمەن ايتقاندا، جۇمىس ىستەيتىن، تابىسى بار ازاماتتار تولەيتىن جارنالار ەسەبىنەن مەملەكەت الەۋمەتتىك تۇرعىدان وسال توپتاردىڭ (زەينەتكەرلەر، كوپبالالى انالار، مۇگەدەكتەر، ستۋدەنتتەر، بالالار جانە ت.ب.) مەديتسينالىق ساقتاندىرۋىن ءوز موينىنا الادى. مىسالى، ءسىز رەسمي جۇمىس ىستەيسىز جانە اي سايىن تابىسىڭىزدان ءمامس جارناسىن تولەيسىز. سول قاراجات تەك ءسىزدىڭ ەمەس، ساقتاندىرۋ جۇيەسىنە قاتىسقان بۇكىل قوعامنىڭ دەنساۋلىعىنا جۇمسالادى. ال ءوز بەتىمەن تابىس تابا المايتىن ادامدار ءۇشىن تولەمدى مەملەكەت ءوزى اۋدارادى. ناتيجەسىندە، بارىنە تەڭ مۇمكىندىك بەرىلەدى – ادام تابىسىنا قاراماستان بىردەي ساپاداعى مەديتسينالىق كومەك الا الادى. بۇل مالىمەتتەر ءمامس جۇيەسىنىڭ الەۋمەتتىك تەڭدىك قاعيداتىنىڭ ناقتى ىسكە اسقانىن كورسەتەدى. 2024 جىلى استانا قالاسى بويىنشا بارلىعى 983 مىڭ ادام مەديتسينالىق كومەك العان، سونىڭ ىشىندە نەگىزگى ۇلەس — الەۋمەتتىك وسال توپتارعا تيەسىلى. جەڭىلدىگى بار 15 ساناتقا كىرەتىن 753 مىڭ ادام (زەينەتكەرلەر، بالالار، كوپبالالى انالار، ستۋدەنتتەر جانە ت.ب.) ءۇشىن امسق 105 ملرد تەڭگە تولەگەن. بۇل – جالپى سومانىڭ شامامەن 76 پايىزى، ياعني قاراجاتتىڭ باسىم بولىگى وسال توپتارعا باعىتتالعان. جۇمىس ىستەيتىن ازاماتتار (156 مىڭ ادام) ءۇشىن جۇمىس بەرۋشىلەردىڭ جارنالارى ەسەبىنەن 19,3 ملرد تەڭگە تولەنگەن. جەكە كاسىپكەرلەر مەن ازاماتتىق-قۇقىقتىق كەلىسىمشارتپەن (گپح) جۇمىس ىستەيتىندەر – 51 مىڭ ادام، 7 ملرد تەڭگە. ءوزىن-ءوزى ساقتاندىرعان ازاماتتار – 23 مىڭ ادام، 6,2 ملرد تەڭگە. قىسقاشا ايتقاندا، بۇل جۇيە – قوعامدىق ءوزارا كومەك مودەلى. 

سۋرەت: اۆتوردىڭ جەكە مۇراعاتىنان الىندى.

ەكى پاكەت نەگە بىرىكتىرىلدى؟

– پرەمەر-مينيستر ولجاس بەكتەنوۆ ۇكىمەت وتىرىسىندا سويلەگەن سوزىندە 2026 جىلدان باستاپ تۇرمىسى تومەن ازاماتتار جەرگىلىكتى بيۋدجەتتەر ەسەبىنەن مەديتسينالىق ساقتاندىرۋ جۇيەسىنەن كومەك الاتىنىن ءمالىم ەتتى. بۇل كومەكتى قانشا ادام، قالاي الادى جانە كىمدەر الادى؟

– بۇل جاڭالىق – الەۋمەتتىك ادىلدىك پەن قولجەتىمدى مەديتسينالىق كومەكتى كۇشەيتۋگە باعىتتالعان ماڭىزدى قادام. ۇكىمەت باسشىسى ولجاس بەكتەنوۆ ايتقانداي، 2026 جىلدان باستاپ تۇرمىسى تومەن ازاماتتاردىڭ ءمامس جۇيەسىندەگى جارنالارى جەرگىلىكتى بيۋدجەت ەسەبىنەن تولەنەدى. بۇل كومەك تۇرمىسى تومەن، ياعني تابىسى ەڭ تومەن كۇنكورىس دەڭگەيىنەن تومەن ازاماتتارعا باعىتتالادى. ولاردىڭ قاتارىنا: رەسمي تابىسى جوق نەمەسە تابىسى تومەن وتباسىلار; ۋاقىتشا جۇمىسسىز نەمەسە قيىن ومىرلىك جاعدايدا قالعان ادامدار كىرەدى. مۇنداي ازاماتتار ءۇشىن ءمامس جارناسىن جەرگىلىكتى اكىمدىكتەر ءوز بيۋدجەتى ەسەبىنەن تولەيدى. ازاماتتىڭ مارتەبەسى الەۋمەتتىك قورعاۋ ورگاندارى ارقىلى انىقتالادى — ياعني، ول شىنىمەن دە تۇرمىسى تومەن ساناتقا جاتاتىنى تەكسەرىلەدى. وسىلايشا، ول ادام ساقتاندىرىلعان بولىپ ەسەپتەلەدى جانە ءمامس اياسىنداعى بارلىق تەگىن مەديتسينالىق قىزمەتتەرگە تولىق قول جەتكىزەدى. 50 مىڭنان استام وسى ساناتتاعى ازاماتتار ناقتى مەديتسينالىق كومەككە مۇقتاج جاندار. د جانە ە ساناتتاعى ادام سانى 50 مىڭ بولسا 25-30 مىڭ ادام مەديتسينالىق كومەككە جۇگىنەدى. تەك مەديتسينالىق كومەككە جۇگىنگەن ازاماتتار ءۇشىن اكىمدىك جارنا تولەيدى. وسى ازاماتتاردىڭ تەڭ دارەجەدە مەديتسينالىق كومەك الۋعا مۇمكىندىگى بار. ياعني، ەشكىم تابىسىنىڭ ازدىعىنان ساپالى ەمنەن ايىرىلمايدى — بۇل «ادىلەتتى قازاقستان» قاعيداتىنىڭ ناقتى ىسكە اسۋى.

– استانا قالاسىندا ءمامس جۇيەسىندە ساقتاندىرىلعان قانشا ادام بار جانە قانشا ادام وسى جۇيەگە كىرمەي وتىر؟ ءار ادامعا اي سايىن قانشا جارنا تولەنەدى؟

– 2025 جىلعى 1 قازانداعى جاعداي بويىنشا استانا قالاسىنىڭ ساقتاندىرىلماعان تۇرعىندارىنىڭ سانى 240 مىڭ ادامدى قۇرايدى. ايىنا 4250 تەڭگە نەمەسە جىلىنا 51 000 تەڭگە تولەپ، ساقتاندىرۋ مارتەبەسىن الادى.

– 2026 جىلدان باستاپ مەديتسينالىق كومەكتىڭ ەكى پاكەتى – تمككك مەن ءمامس پاكەتى بىرتىندەپ بىرىڭعاي مەديتسينالىق كومەك پاكەتى رەتىندە بىرىكتىرىلەتىنى ءمالىم. بۇل وزگەرىستىڭ تيىمدىلىگى نەدە؟

– وتە ورىندى سۇراق. 2026 جىلدان باستاپ تەگىن مەديتسينالىق كومەكتىڭ كەپىلدىك بەرىلگەن كولەمى (تمككك) مەن مىندەتتى الەۋمەتتىك مەديتسينالىق ساقتاندىرۋ ء(مامس) پاكەتتەرىن بىرىكتىرۋدىڭ باستى ماقساتى – جۇيەنى جەڭىلدەتۋ جانە ازاماتتارعا مەديتسينالىق كومەكتى بارىنشا قولجەتىمدى ەتۋ. مۇنداي بىرىكتىرۋدىڭ نەگىزگى تيىمدىلىكتەرى كوپ. بىرىنشىدەن، حالىق ءۇشىن تۇسىنىكتى ءارى ىڭعايلى جۇيە قۇرىلادى. قازىر ەكى پاكەت بار: بىرىندە – شۇعىل جانە الەۋمەتتىك ماڭىزى بار كومەك، ەكىنشىسىندە – جوسپارلى جانە كەڭەيتىلگەن قىزمەتتەر. كوپشىلىك قايسىسىنا نە كىرەدى، قالاي پايدالانۋ كەرەك ەكەنىن تۇسىنبەي جاتادى. بىرىڭعاي پاكەت ەنگىزىلسە، ازامات «ساقتاندىرىلعانمىن با، جوق پا؟» دەپ الاڭداماي، بارلىق نەگىزگى مەديتسينالىق كومەكتى ءبىر جۇيە ارقىلى الادى. ەكىنشىدەن، قارجىنى ءتيىمدى ءبولۋ. ءبىرتۇتاس پاكەت دەنساۋلىق ساقتاۋ سالاسىندا قارجىنىڭ ءبولىنۋىن وڭتايلاندىرادى، ياعني قايتالاناتىن اكىمشىلىك شىعىندار ازايادى. بۇل – بىردەي قىزمەتتەرگە ەكى بولەك كوزدەن قارجى جۇمساماۋعا مۇمكىندىك بەرەدى. ۇشىنشىدەن، الەۋمەتتىك تەڭدىكتى كۇشەيتۋ. جاڭا مودەل بويىنشا، حالىق تابىسىنا نەمەسە مارتەبەسىنە قاراماستان، بارلىعى نەگىزگى مەديتسينالىق قىزمەتتەرگە تەڭ قولجەتىمدىلىككە يە بولادى. بۇل اسىرەسە اۋىل تۇرعىندارى مەن الەۋمەتتىك وسال توپتارعا ءتيىمدى. ءتورتىنشىسى، باسقارۋ مەن باقىلاۋدىڭ جەڭىلدەۋى.

قازىر ەكى پاكەت بويىنشا ەسەپ جۇرگىزۋ، مونيتورينگ جانە باقىلاۋ بولەك جۇيەلەرمەن ىسكە اسادى. بىرىكتىرىلگەن جۇيە بۇل پروتسەستى قاراپايىم ءارى اشىق ەتەدى. قىسقاشا ايتقاندا، بىرىڭعاي مەديتسينالىق كومەك پاكەتى — بۇل ازامات ءۇشىن «ءبىر تەرەزە» قاعيداتى بويىنشا جۇمىس ىستەيتىن، تۇسىنىكتى، تەڭ جانە ءتيىمدى جۇيە. ياعني، كىم بولسا دا، قاي جەردە تۇرسا دا — قاجەتتى ەم مەن كومەككە ەركىن قول جەتكىزە الادى.

– گۇلجان تۇرارقىزى، ساليقالى سۇحباتىڭىزعا كوپ راقمەت! ەڭبەگىڭىزدىڭ جەمىسىن كورىڭىز!

 سۇحباتتاسقان تولەن تىلەۋباي

Abai.kz