24 قازاندا استانادا ۇستەل تەننيسىنەن حالىقارالىق پرەزيدەنت كۋبوگىنە ارنالعان ءباسپاسوز ءماسليحاتى ءوتتى.

ءباسپاسوز ءماسليحاتىنا قاتىسقاندار:

جاراسباەۆ سەرىك ماراتۇلى, قازاقستان رەسپۋبليكاسىنىڭ تۋريزم جانە سپورت ۆيتسە-ءمينيسترى

جەتىباەۆ رۋسلان, NOMAD اكادەمياسىنىڭ ديرەكتورى

دجۋ سە حۋك, 2003 جىلعى الەم چەمپيوناتىنىڭ كۇمىس جۇلدەگەرى، وليمپيادا جانە ازيا ويىندارىنىڭ جۇلدەگەرى

قاناعاتوۆ ەلسيار بايمۇحامەدۇلى, قازاقستان رەسپۋبليكاسى ۇستەل تەننيسى فەدەراتسياسىنىڭ ۆيتسە-پرەزيدەنتى

كامەنسكي نيكولاي ميحايلوۆيچ, باس تورەشى (حالىقارالىق ساناتتاعى تورەشى)

تۋرنير 2025 جىلدىڭ 25-29 قازان ارالىعىندا Beeline Arena الاڭىندا وتەدى. ونى قازاقستان رەسپۋبليكاسى تۋريزم جانە سپورت مينيسترلىگى مەن قازاقستاننىڭ ۇستەل تەننيسى فەدەراتسياسىنىڭ قولداۋىمەن Nomad ۇستەل تەننيسى اكادەمياسى ۇيىمداستىرادى.

NOMAD اكادەمياسىنىڭ ديرەكتورى رۋسلان جەتۋباەۆ بولاشاقتا پرەزيدەنتتىك كۋبوكتى جىل سايىن وتەتىن ءداستۇرلى تۋرنيرگە اينالدىرۋ جوسپاردا بار ەكەنىن ايتىپ ءوتتى:  «بۇل تۋرنير قازاقستاننىڭ برەندىنە اينالىپ، جىل سايىن جاس تالانتتار مەن تانىمال شەبەرلەر باس قوساتىن الاڭ بولعانىن قالايمىز. بۇل جاي عانا جارىس ەمەس – ۇستەل تەننيسىن دامىتۋ مەن حالىقارالىق سپورتتىق ىنتىماقتاستىقتى نىعايتۋعا جاسالعان قادام».

جارىسقا قازاقستاندى قوسا العاندا، 14 ەلدەن 300-دەن استام سپورتشى قاتىسادى. ولاردىڭ قاتارىندا استانا، الماتى، شىمكەنت، قاراعاندى وكىلدەرى، سونداي-اق وڭتۇستىك كورەيا، قىتاي، ۆەنگريا، مىسىر، مالايزيا، يران، ساۋد ارابياسى جانە باسقا دا ەلدەردىڭ تەننيسشىلەرى بار. سونىمەن قاتار، تۋرنيرگە ITTF الەمدىك رەيتينگىنىڭ توپ-100 قاتارىنداعى ويىنشىلاردىڭ قاتىسۋى ونىڭ حالىقارالىق اۋقىمىن ايشىقتايدى. ءتۋرنيردىڭ جالپى جۇلدە قورى 115 000 اقش دوللارىن قۇرايدى.

Joo Sae-hyuk ۇيىمداستىرۋشىلارعا العىسىن ءبىلدىرىپ، قازاقستاندا ۇستەل تەننيسىنىڭ دامۋىنا قولداۋ كورسەتۋگە دايىن ەكەنىن ايتتى: 

«مۇندا بولىپ، وسىنداي اۋقىمدى شارانىڭ ءبىر بولىگى بولعانىما قۋانىشتىمىن. 2027 جىلى قازاقستان جاڭا، جەڭىستى دەڭگەيگە شىعادى دەپ سەنەمىن. مەن بار كۇشىمدى سالىپ كومەكتەسەمىن – كەلىپ تۇرامىن، قاتىسامىن جانە ەلدەرىڭىزدە ۇستەل تەننيسىنىڭ دامۋىن قولدايمىن».

كۋبوكتىڭ باستى وقيعالارىنىڭ ءبىرى – الەمدىك ۇستەل تەننيسى جۇلدىزدارىنىڭ قاتىسۋىمەن وتەتىن شوۋ-ماتچ. وعان سپورت اڭىزدارى – سيۋي سين (قىتاي), الەمنىڭ ەكس-ءبىرىنشى راكەتكاسى; فان بو (قىتاي), الەم چەمپيوناتىنىڭ كۇمىس جۇلدەگەرى، ءوزىنىڭ شابۋىلداۋ ستيلىمەن تانىمال; ۆەرنەر شلاگەر (اۆستريا), 2003 جىلعى الەم چەمپيونى جانە ەۋروپا چەمپيوناتتارىنىڭ بىرنەشە دۇركىن جۇلدەگەرى; سونداي-اق دجۋ سە حۋك (كورەيا), 2003 جىلعى الەم چەمپيوناتىنىڭ كۇمىس جۇلدەگەرى، 2011 جىلعى قولا جۇلدەگەرى جانە 2012 جىلعى وليمپيادا ويىندارىنىڭ قاتىسۋشىسى قاتىسادى. ولاردىڭ قاتىسۋى تۋرنيرگە ەرەكشە اۋقىم بەرىپ، كورەرمەندەرگە ۇمىتىلماس اسەر سىيلايدى.

«وزدەرىڭىزگە ءمالىم، 2027 جىلى قازاقستان ۇستەل تەننيسىنەن الەم چەمپيوناتىن قابىلدايدى. سوندىقتان مۇنداي دەڭگەيدەگى ءىرى جارىستى وتكىزۋ ەلىمىز ءۇشىن ۇلكەن مارتەبە. بۇل ءىس-شارا الەمدىك دوداعا دايىندىق رەتىندە ۇيىمداستىرىلىپ وتىر. جارىسقا شەتەلدىك مىقتى سپورتشىلار كەلەدى دەپ جوسپارلانعان. سول سپورتشىلاردىڭ ويىندارىن جاس جەتكىنشەكتەرىمىز تاماشالاپ، ۇلكەن تاجىريبە جيناقتاي الادى. وسى جارىس ارقىلى ەل ۇزدىكتەرىن جانە ۇستەل تەننيسىنىڭ رەزەرۆىن بايقاۋعا بولادى», – دەدى قازاقستان رەسپۋبليكاسىنىڭ تۋريزم جانە سپورت ۆيتسە-ءمينيسترى سەرىك ماراتۇلى جاراسباەۆ.

تۋرنير ءتورت جاس ساناتى بويىنشا جەكە جانە كوماندالىق ەسەپتە وتەدى:

• U-11 – 2014 ج.ت. جانە ودان كىشىلەر;
• U-16 – 2009 ج.ت. جانە ودان كىشىلەر;
• Open 17+ – 2008 ج.ت. جانە ودان ۇلكەندەر;
• Team event – كوماندالىق رازرياد.

قازاقستاننىڭ ۇزدىك تەننيسشىلەرى – كيريلل گەراسيمەنكو، الان قۇرمانعاليەۆ، ايدوس كەنجەعۇلوۆ، يسكاندەر حاركي، زاۋرەش اقاشەۆا، سارۆينوز ميركاديروۆا، جانەركە قوشقۇمباەۆا جانە انەل باقىت – پرەزيدەنت كۋبوگىندە ەل نامىسىن قورعايدى.

تۋرنير كەستەسى:

• 24 قازان – قاتىسۋشىلاردىڭ كەلۋى، جاتتىعۋلار، ءباسپاسوز ءماسليحاتى
• 25 قازان – سالتاناتتى اشىلۋ ءراسىمى، جەكە بىرىنشىلىك (U-11, U-16)
• 26 قازان – جەكە بىرىنشىلىك (U-11, U-16)
• 27 قازان – كوماندالىق بىرىنشىلىك جانە جەكە جارىستار (Open 17+)
• 28 قازان – جارتىلاي فينالدىق كەزدەسۋلەر
• 29 قازان – فينالدىق ويىندار جانە ماراپاتتاۋ ءراسىمى

پرەزيدەنت كۋبوگى سپورت مادەنيەتىن دامىتۋعا، جاستار اراسىندا ۇستەل تەننيسىن ناسيحاتتاۋعا جانە حالىقارالىق ىنتىماقتاستىقتى نىعايتۋعا باعىتتالعان. بۇل جاي عانا جارىس ەمەس، سپورتتى العا جىلجىتۋ ماقساتىندا جاس تالانتتار مەن تانىمال شەبەرلەردىڭ باسىن قوساتىن الاڭ. تۋرنير قازاقستاننىڭ ورتالىق ازياداعى ۇستەل تەننيسىنىڭ جاڭا ورتالىعى رەتىندەگى ورنىن نىعايتادى.

ءتۋرنيردىڭ بارلىق كۇندەرى كىرۋ تەگىن. تۋرنير باعدارلاماسىمەن https://presidentscup.kz/ru سايتىندا تانىسۋعا بولادى.

Abai.kz