ۇلكەن الماتى كولىنە (ۇاك) اپاراتىن جولداعى كولىك كەپتەلىسى تۇسىرىلگەن ۆيدەو قازاقستانداعى ىشكى تۋريزمگە قىزىعۋشىلىقتىڭ قارقىندى ارتىپ كەلە جاتقانىن تاعى ءبىر مارتە كورسەتتى.

الەۋمەتتىك جەلىلەردە ۇاك-كە اپاراتىن جولدا تۇسىرىلگەن كادرلار قىزۋ تالقىلانۋدا. بەينەجازباعا قاراعاندا، تۇستەن كەيىن كولگە قاراي اعىلعان كولىك لەگى كۇرت كوبەيىپ، اۆتوتۇراق تا لىق تولعان.

الماتى ءۇشىن مۇنداي كورىنىس بۇگىندە قالىپتى جاعدايعا اينالىپ كەلەدى. دەمالىس جانە مەرەكە كۇندەرى تاۋلى باعىتتارعا قالا تۇرعىندارى عانا ەمەس، مەگاپوليس ماڭىنداعى تابيعاتتى تاماشالاۋعا كەلگەن تۋريستەر دە كوپتەپ اعىلادى.

نەلىكتەن ۇلكەن الماتى كولىنە سۇرانىس ارتتى؟

تۋريستىك كومپانيا مەنەدجەرى اقەركە زەكەنقىزىنىڭ ايتۋىنشا، بيىل ىشكى تۋريزمگە سۇرانىس سونشالىقتى ارتقاندىقتان، كومپانيالار كەلىپ جاتقان وتىنىمدەردى ارەڭ يگەرىپ جاتىر.

«ءبىزدىڭ ءبىر عانا وپەراتور كولساي مەن شارىن شاتقالى باعىتتارىنا كۇنىنە 50 ورىندىق بەس اۆتوبۋستى جولعا شىعارادى. مۇنداي كومپانيالار از ەمەس، ولاردىڭ بارىندە جاعداي ۇقساس»، – دەيدى ول.

ونىڭ سوزىنشە، تۋرعا ءبىر-ەكى كۇن بۇرىن الدىن الا جازىلماعان جاعدايدا بوس ورىن تاپپاي، كۇتۋ تىزىمىنە قالۋ قاۋپى جوعارى.

تۋريستەردىڭ اراسىندا شەتەل ازاماتتارى دا از ەمەس. نەگىزىنەن قىتاي، رەسەي جانە ءۇندىستاننان كەلگەن قوناقتار باسىم. سونداي-اق ەۋروپادان كەلەتىن تۋريستەر دە بار، بىراق ولاردىڭ سانى ازيالىق ەلدەردەن كەلگەندەرگە قاراعاندا تومەن.

مامان مۇنى قازاقستاننىڭ تابيعي تۋريستىك باعىتتارىنا دەگەن قىزىعۋشىلىقتىڭ ارتۋىمەن بايلانىستىرادى. ونىڭ بايقاۋىنشا، قازىر ساياحاتشىلار قالالىق ەكسكۋرسيالاردان گورى تاۋلى ايماقتار مەن شاتقالدارعا ءجيى بارادى.

ۇلكەن الماتى كولى الماتىنىڭ ەڭ تانىمال تابيعي ورىندارىنىڭ ءبىرى بولىپ قالا بەرەدى. وعان جەتۋ سالىستىرمالى تۇردە وڭاي، ال كولگە اپاراتىن جولدىڭ ءوزى ءبىر كۇندىك تاۋ ساياحاتىنىڭ اجىراماس بولىگىنە اينالعان.

قازاقستان دەمالىس باعىتى رەتىندە تانىمال بولا باستادى

ەل ىشىندەگى ءتۋريزمنىڭ قارقىن العانىن رەسمي ستاتيستيكا دا راستايدى.

تۋريزم جانە سپورت مينيسترلىگىنىڭ مالىمەتىنشە، 2025 جىلى قازاقستانعا تۋريستىك ماقساتپەن 15,7 ميلليون شەتەل ازاماتى كەلگەن. بۇل كورسەتكىشكە جۇمىس ىستەۋ نەمەسە تۇراقتى تۇرۋ ءۇشىن كەلگەندەر كىرمەيدى.

ولاردىڭ ىشىندە 11,1 ميلليون ادام شەتەلدىك تۋريست ساناتىنا جاتقىزىلعان.

ىشكى تۋريزم دە ءوسىپ كەلەدى. مۇنى تەك ستاتيستيكادان ەمەس، ءىرى قالالاردىڭ ماڭىنداعى تانىمال تۋريستىك باعىتتاردىڭ تەز تولىپ كەتۋىنەن دە بايقاۋعا بولادى.

بۇل تۇرعىدا الماتى ەرەكشە ورىن الادى. قالانى دامىتۋدىڭ 2026–2030 جىلدارعا ارنالعان جوسپارىنا سايكەس، 2024 جىلى الماتىعا 2,3 ميلليون تۋريست كەلگەن. ونىڭ ىشىندە 686,3 مىڭى – شەتەل ازاماتتارى.

قاۋىپسىزدىك تە ماڭىزدى فاكتورعا اينالدى

قازىرگى تاڭدا تۋريستەر ءۇشىن اسەم تابيعات، قوناقۇيلەر نەمەسە باعامەن قاتار قاۋىپسىزدىك تە ماڭىزدى.

الەمدەگى تۇراقسىز گەوساياسي جاعداي اياسىندا ساياحاتشىلار تىنىش قوعامدىق احۋالى بار، لوگيستيكاسى تۇسىنىكتى ءارى ساپاردى ارتىق تاۋەكەلسىز جوسپارلاۋعا بولاتىن باعىتتاردى كوبىرەك تاڭداي باستادى.

Global Peace Index 2025 رەيتينگى بويىنشا قازاقستان 163 مەملەكەت پەن اۋماقتىڭ ىشىندە 56-ورىنعا جايعاستى. ال Ranking.kz دەرەگىنە سايكەس، بۇل كورسەتكىش بويىنشا قازاقستان ورتالىق ازياداعى ەڭ بەيبىت ەل اتاندى.

Abai.kz