رەسەيدىڭ ەكىنشى ءىرى مۇناي كومپانياسى «لۋكويل» بىرنەشە ەلدىڭ سانكتسياسىنا ۇشىراۋىنا بايلانىستى حالىقارالىق اكتيۆتەرىن ساتاتىنىن مالىمدەدى. ونىڭ قازاقستاندا دا بىرنەشە ۇلەسى بار.

«كەيبىر مەملەكەتتىڭ كومپانيا مەن ونىڭ ەنشىلەس ۇيىمدارىنا قاتىستى شەكتەۋ شارالارىن ەنگىزۋىنە بايلانىستى كومپانيا شەتەلدىك اكتيۆتەرىن ساتۋ نيەتى تۋرالى حابارلايدى. قازىر الەۋەتتى ساتىپ الۋشىلاردان وتىنىشتەر قابىلدانۋدا»،—دەلىنگەن حابارلامادا.

بۇل مالىمدەمە رەسەيگە قارسى جاڭا سانكتسيالار پاكەتى ەنگىزىلگەننەن كەيىن جاريالاندى.

ايتا كەتەيىك، كومپانيا قازاقستانداعى "تەڭىزشەۆرويل" جوباسىنىڭ 5 پايىزىنا، "قاراشىعاناقتىڭ" 13,5 پايىزىنا، "قۇمكولدىڭ" 50 پايىزىنا، "كاسپي قۇبىر كونسورتسيۋمىنىڭ" 12,5 پايىزىنا يەلىك ەتەدى. بۇعان قوسا، «لۋكويل» — قازاقستان مۇنايىن ەكسپورتتايتىن كاسپي قۇبىر كونسورتسيۋمىنىڭ سەرىكتەسى.

ەسكە سالا كەتسەك، 14 قازاندا پرەزيدەنت قاسىم-جومارت توقاەۆ مۇناي كومپانياسىنىڭ باسشىسى ۆاگيت الەكپەروۆتى ەلدىڭ «ەنەرگەتيكا الەۋەتىن دامىتۋعا قوسقان زور ۇلەسى ءۇشىن» ءى دارەجەلى «بارىس» وردەنىمەن ماراپاتتاعان ەدى.

Abai.kz