اتوم ەنەرگياسى جونىندەگى اگەنتتىكتىڭ جەتەكشىسى الماسادام ساتقاليەۆ اەس قۇرىلىسى 2029 جىلى باستالاتىنىن ايتتى.

«روساتوم» جۇمىسىن وتە ءساتتى باستادى. شامامەن 50 شاقتى ۇڭعىما قازىلدى. توپىراق ۇلگىسى الىنىپ، ساراپتالىپ جاتىر. راديونۋكليدتەردىڭ بار-جوعىنا قاتىستى شامامەن 2000 ورىن تەكسەرىلدى. گيدرولوگيالىق، گيدروتەحنيكالىق، ينجەنەرلىك تالداۋ، ورىنعا توپوگرافيالىق اناليز جۇرگىزىلدى. ەكى گيدروبەكەت انىقتالدى. جالپى جۇمىس كەستەگە ساي ءجۇرىپ جاتىر. اتوم سالاسى ماماندارى اراسىندا «العاشقى بەتون» دەپ اتالادى... سول 2029 جىلعا قاراي باستالا ما دەپ وتىرمىز»، - دەدى اقوردادا جۋرناليستەردىڭ سۇراقتارىنا جاۋاپ بەرگەن اتوم ەنەرگياسى جونىندەگى اگەنتتىكتىڭ جەتەكشىسى الماسادام ساتقاليەۆ. ونىڭ سوزىنەن قازتاگ ءۇزىندى كەلتىرەدى.

ونىڭ سوزىنشە، جۇمىس باستالعاننان كەيىن 18 ايدا جوبالىق-زەرتتەۋ جۇمىستارى اياقتالادى. بۇدان بولەك، بولاشاق اتوم ەلەكتر ستانتسياسىنا مامانداردى دا دايىنداۋ جۇمىسى قاتار ءجۇرىپ جاتىر. ال قازاقستانعا ەكىنشى اتوم ەلەكتر ستانتسياسىن سالىپ بەرەدى دەگەن قىتاي بولاشاق اەس ماماندارى ءۇشىن 200 گرانت بولگەن.

«قازىرگى كەزدە فرانتسيا، قىتاي، رەسەي، ۆەنگريا سياقتى ەلدەردىڭ ەنەرگەتيكالىق نىساندارىندا تاجىريبەدەن وتكىسى كەلەتىن، اتوم ەنەرگەتيكالىق ستانتسيالارىندا ىستەگىسى كەلەتىن جاس مامانداردان ءوتىنىش قابىلداپ جاتىرمىز»، - دەدى مينيستر.

بيىل اقپاندا قازاقستان ۇكىمەتى ەلدەگى العاشقى اتوم ەلەكتر ستانتسياسىن سالاتىن ورىندى رەسمي تۇردە بەكىتتى – ول الماتى وبلىسى جامبىل اۋدانىندا، بالقاش كولىنىڭ جاعاسىنداعى ۇلكەن اۋىلىنىڭ ماڭىندا تۇرعىزىلماق. ماۋسىمدا قازاقستان ۇكىمەتى العاشقى اەس-ءتى رەسەي سالىپ بەرەدى دەپ مالىمدەگەن.

Abai.kz