اقمولا وبلىسىندا جەرگىلىكتى ماڭىزى بار اۆتوجولداردى دامىتۋ جۇمىستارى بيىل دا جوعارى قارقىنمەن جالعاسۋدا. ايماقتا جولداردى سالۋ مەن جوندەۋگە 65 ملرد تەڭگە ءبولىنىپ، 150-گە جۋىق جوبا ىسكە اسىرىلدى. ونىڭ ىشىندە 60-قا جۋىق ەلدى مەكەننىڭ كوشە-جول جەلىسى جوندەلىپ، ءبىرىنشى كەزەكتە بۇرىن باستالعان جوبالاردى اياقتاۋعا باسىمدىق بەرىلدى.

جەرگىلىكتى ماڭىزى بار جولداردىڭ ىشىندە بيىل بىرقاتار اۋقىمدى جوبالار جۇزەگە اسۋدا. ولاردىڭ قاتارىندا «ششۋچە–ستەپنياك»، «باباتاي–ۆولگودونوۆكا–بەرەكە–بۇلاقساي»، «اقكول–ازات–نوۆورىبينكا»، «ششۋچە–نيكولاەۆكا»، «ەلەنوۆكا–چيستوپولە–ەسىل»، «بۇزىلىق–الماتى» باعىتتارى بار.

«قىسقى كەزەڭدە باس مەردىگەر «سەرۆيس نس» جشس ءوزىنىڭ جاۋاپكەرشىلىگىنە بەكىتىلگەن ۋچاسكەدە قىزمەت كورسەتۋدى جۇزەگە اسىرادى. بۇل ۋچاسكە – «جاقسى – ەسىل – بۇزىلىق» رەسپۋبليكالىق ماڭىزى بار اۆتوموبيل جولىنىڭ 80–82 شاقىرىمىنداعى ەسىل وزەنى ارقىلى وتەتىن كوپىردى سالۋمەن قوسا جۇرگىزىلەتىن كۇردەلى جوندەۋ نىسانى»،-دەپ قوستى «قازاۆتوجول» ۇك» اق اقمولا فيليالى ديرەكتورىنىڭ ورىنباسارى رۇستەم ءابىلوۆ.

سونىمەن قاتار، جول جوندەۋ جۇمىستارى تەك كوكشەتاۋ قالاسىندا عانا ەمەس، قوسشى، تالاپكەر، قوياندى، قاراوتكەل، زەرەندى، اتباسار، دەرجاۆينسك، قورعالجىن جانە باسقا دا ەلدى مەكەندەردە قارقىندى جۇرگىزىلىپ جاتىر.

جول قۇرىلىسىنىڭ ساپاسىن باقىلاۋ ماقساتىندا جول اكتيۆتەرىنىڭ ۇلتتىق ساپا ورتالىعىمەن 250 ملن تەڭگەلىك كەلىسىمشارت جاسالعان.

«وبلىستاعى بارلىق جولداردى ءبىر جىل ىشىندە جوندەۋ مۇمكىن ەمەس. ساراپشىلاردىڭ ەسەپتەۋىنشە، وڭىردەگى بارلىق جەرگىلىكتى جولداردى نورماتيۆكە كەلتىرۋ ءۇشىن كەمىندە 300 ملرد تەڭگە قاجەت. سوندىقتان باسىمدىق الدىمەن حالىق تىعىز ورنالاسقان اۋىلدار، وندىرىستىك نىساندارعا باراتىن جولدار، بىرنەشە ەلدى مەكەندى قوساتىن باعىتتار بويىنشا بەرىلەدى»،-دەدى باسشى.

ۇكىمەت بەكىتكەن نەگىزگى ماقسات 2029 جىلعا دەيىن جەرگىلىكتى جولداردىڭ 95%-ىن نورماتيۆتىك دەڭگەيگە جەتكىزۋ. سوڭعى ءۇش جىلدا وڭىردە 2,7 مىڭ كم جول جوندەلىپ، جاڭارتىلعان.

سونىمەن قاتار، اقمولا وبلىسىنىڭ جولدارى قىسقى كەزەڭگە جان-جاقتى دايىندالۋدا. قىسقى تەحنيكالىق قىزمەت كورسەتۋ 12 مىڭ كم جولدى قامتيدى.

2025 جىلدىڭ قاراشا–جەلتوقسان ايلارىنا 1021 بىرلىك تەحنيكا مەن 5,4 مىڭ توننا جانارماي، جانە 8 مىڭ توننا تايعاققا قارسى ماتەريال قاراستىرىلعان.

وبلىستىق، اۋداندىق جانە ەلدى مەكەندەر دەڭگەيىندە ارنايى تەحنيكا دايىندالىپ، مەردىگەر ۇيىمدارمەن كەلىسىمشارتتار جاسالدى. قاردان تازالاۋ، قۇم-تۇز سەبۋ، پاترۋلدەۋ جۇمىستارى تاۋلىك بويى جۇرگىزىلەدى.

وڭىردە جول ساپاسىن جاقسارتۋ جانە قىسقى قاۋىپسىزدىكتى قامتاماسىز ەتۋ باعىتىندا جۇيەلى جۇمىس جۇرگىزىلۋدە. قابىلدانعان شارالار اۆتوجولداردىڭ قولجەتىمدىلىگىن ارتتىرىپ، تۇرعىنداردىڭ قاۋىپسىز جانە جايلى قوزعالىسىن قامتاماسىز ەتەدى.

Abai.kz