ايبار ولجاي: ينفلياتسيانى جەڭۋ ءۇشىن مەملەكەتتىڭ ەكونوميكاداعى ۇلەسىن ازايتۋ قاجەت!

دەمالىس ماۋسىمى جاقىنداعاندىقتان، حالىق اراسىندا دوللارعا سۇرانىس ارتۋدا. ەكونوميست ايبار ولجايدىڭ پىكىرىنشە، وسىعان دەيىن ينفلياتسيامەن كۇرەستە يمپورت باعاسىنىڭ قىمباتتاماۋىنا ءبىرشاما ءۇمىت ارتىلعان ەدى. تەڭگە كۇشەيسە نەمەسە ونىڭ باعامى بەلگىلى ءبىر دارەجەدە تۇراقتانسا، ەلىمىزگە كەلەتىن يمپورتتىڭ دا باعاسى تىنىشتالادى دەگەن كۇتۋلەر بولدى. دەگەنمەن ەكونوميست "15 مينۋتتىق ەكونوميكا" جوباسىندا تالقىلاپ، كەز كەلگەن ۋاقىتتا بۇل جاعدايدىڭ وزگەرىپ كەتۋى مۇمكىن ەكەنىن ايتتى، دەپ حابارلايدى BAQ.KZ ءتىلشىسى.

ەلىمىزدىڭ ەكونوميكالىق جاعدايىن تەكسەرگەن حالىقارالىق ۆاليۋتا قورى بيىلعى ەكونوميكالىق ءوسىمدى مۇناي ءوندىرۋدىڭ ۇلعايۋىمەن جانە ىشكى سۇرانىستىڭ جوعارى بولۋىمەن بايلانىستىرادى، - دەيدى ول.

ءبىر سوزبەن ايتقاندا، ساراپشى پىكىرىنشە، ەكونوميكالىق ءوسىم كورسەتەمىز دەپ ەلىمىز سىرتتان دا، ىشتەن دە ءبىرشاما قارىز العان. ىشكى سۇرانىستى مەملەكەت ەسەبىنەن ىنتالاندىرۋ جوعارى ينفلياتسياعا، بيۋدجەتتىڭ مۇنايلىق ەمەس تاپشىلىعىنىڭ ۇلعايۋىنا جانە ەلدەگى تولەم بالانسىنىڭ اعىمداعى شوتى دەفيتسيتىنىڭ وسۋىنە الىپ كەلدى.

ساراپشى اتاپ وتكەندەي، بىلتىر كوكتەمدە مەملەكەت باسشىسى ەكونوميكانى ليبەرالداندىرۋ تۋرالى ارنايى جارلىق قابىلدادى. وندا كورسەتىلگەن شارالار ازىرگە اياقسىز قالىپ وتىر.

«ءبىز قايتادان قولمەن باسقارۋ، مەملەكەتتىك «گايكالاردى» قاتاڭداتۋ رەجيمىنە اقىرىنداپ ويىسىپ بارا جاتقان سياقتىمىز», - دەيدى ايبار ولجاي.

سونداي-اق ەكونوميست پىكىرىنشە، ينفلياتسيانى ورنىنا قويۋ ءۇشىن ۇلكەن ءبىر جۇيەلى جۇمىستار ىستەلۋى كەرەك.

«ول ءۇشىن كۆازيمەملەكەتتىك كومپانيالاردىڭ كوبىسىن جابۋ نەمەسە بارلىعىن جەكەگە بەرۋ كەرەك», - دەيدى ول.

سەبەبىن جەكەمەنشىك سەكتور بۇل تاراپتا ءوز پوزيتسياسىن جوعالتقان دەپ تۇسىندىرەدى.

«ءبىزدىڭ بيزنەس كوپ سالادا ءوزىنىڭ بىلىكتىلىگىن جوعالتىپ العان، ويتكەنى سول سالالارعا مەملەكەت كىرىپ، بارلىق ويىنشىلاردى ىعىستىرىپ تاستاعان. نەگىزگى پروبلەمامىز وسىندا», - دەپ ءتۇسىندىردى ەكونوميست.

سوندىقتان ول مەملەكەتتىڭ ەكونوميكاداعى ۇلەسىن قىسقارتقاندا عانا ينفلياتسيانى جەڭە الاتىنىمىزدى ايتادى.

«بارلىق جەردە باسەكەلەستىك بولسا، جەكەمەنشىك كومپانيالار جۇمىس ىستەسە، مونوپوليا جويىلسا، حالىق ءوزى تاڭداۋ جاساي الاتىن دەڭگەيگە جەتسە - باسەكەلەستىك باعانى ءتۇسىرىپ، تەڭگە باعامى دا تۇراقتانار ەدى», - دەيدى ايبار ولجاي.

بۇعان دەيىن ەكونوميست 2025 جىلى ينفلياتسيا 12-13% بولسا، 2026 جىلى 9,5-12,5% شەگىندە كۇتىلەدى. كەلەسى جىلى ينفلياتسيا قاتتى تۇسە قويمايدى دەپ بولجاعان بولاتىن.

Abai.kz