الماتى قالاسىندا «تازا قازاقستان» رەسپۋبليكالىق اكتسياسى اياسىندا ەرەكشە ەكولوگيالىق-شىعارماشىلىق باستاما – «ەكو-شىرشا الماتى» اتتى اشىق بايقاۋ جاريالاندى. جوبا الماتى قالاسى اكىمدىگىنىڭ قولداۋىمەن ىسكە اسىرىلىپ وتىر. بۇل بايقاۋ قالالىق ورتادا ەكولوگيالىق سانانى كوتەرۋدى، شىعارماشىلىق الەۋەتتى ارتتىرۋدى جانە جاڭا جىلدىق مەرەكەلەردى جاۋاپكەرشىلىكپەن اتاپ وتۋگە باعىتتالعان جاڭا مادەني ءداستۇر قالىپتاستىرۋدى كوزدەيدى.

بايقاۋ ەكوديزاين باعىتىنداعى شىعارماشىلىقتى قولداپ، مەگاپوليستىڭ ەكولوگيالىق مادەنيەتىن ارتتىرۋدى جانە تۇرمىستىق قالدىقتاردى قايتا قولدانۋ يدەياسىن كەڭىنەن ناسيحاتتاۋدى ماقسات ەتەدى. بۇل باستامانىڭ تۇپكى ءمانى – تۇتىنۋشىلىق مادەنيەتىن قايتا قاراستىرىپ، تۇرمىستىق قالدىقتارعا جاڭا ءومىر سىيلاۋ ارقىلى قوعامداعى ەكولوگيالىق ويلاۋدى دامىتۋ. وسى ماقساتتا قاتىسۋشىلارعا قايتا وڭدەلەتىن ماتەريالدار مەن تۇرمىستىق قالدىقتاردى پايدالانا وتىرىپ، الماتىنىڭ رۋحىن، ديناميكاسىن جانە زاماناۋي كەلبەتىن بەينەلەيتىن ەرەكشە ارت-شىرشا جاساۋ ۇسىنىلادى.

ۇيىمداستىرۋشىلاردىڭ ايتۋىنشا، قالا اكىمدىگىنىڭ جوبالىق كەڭسەسىنىڭ قولداۋىمەن جۇزەگە اسىرىلىپ جاتقان بۇل جاڭا باستاما الماتىدا ەكولوگيالىق تۇرعىدان تازا ءارى شىعارماشىلىققا نەگىزدەلگەن جاڭا جىلدىق مەرەكەلىك ءداستۇر قالىپتاستىرۋعا باعىتتالعان. اتالعان باستاما سۋرەتشىلەردى، ديزاينەرلەردى جانە قالانىڭ بولاشاعىنا بەيجاي قارامايتىن بارلىق قالا تۇرعىندارىن بىرىكتىرۋدى كوزدەيدى. ولاردىڭ پىكىرىنشە، ۇسىنىلاتىن ەكو-شىرشالار – جاي عانا ونەر تۋىندىسى ەمەس، زاماناۋي تۇراقتى قالانىڭ قانداي بولۋى كەرەكتىگىن ايقىندايتىن ماڭىزدى مانيفەست.

بايقاۋعا شىعارماشىلىق پەن ەكوبەلسەندىلىككە بەيىم بارلىق ازاماتتار قاتىسا الادى. اتاپ ايتقاندا، سۋرەتشىلەر، ديزاينەرلەر، ساۋلەتشىلەر، قولونەرشىلەر، شىعارماشىلىق توپتار، ەكولوگيالىق قاۋىمداستىقتار.

ءاربىر قاتىسۋشى بيىكتىگى 2-2,5 مەتر ارالىعىنداعى، تەك تۇرمىستىق قالدىقتار، قايتا وڭدەلەتىن ماتەريالدار، ەكىنشى رەتتىك شيكىزات قولدانىلعان ارت-شىرشا جوباسىن دايىنداۋى ءتيىس. ماتەريالدى تاڭداۋدا ەركىندىك بەرىلگەنىمەن، ەكولوگيالىق قاۋىپسىزدىك جانە قايتا پايدالانۋعا جارامدىلىق باستى كريتەريلەر بولىپ ەسەپتەلەدى.

قاتىسۋشىلاردى ىنتالاندىرۋ ماقساتىندا بايقاۋ اياسىندا قارجىلاي قولداۋ قاراستىرىلعان:

• العاشقى ىرىكتەۋدەن وتكەن 15 فيناليستكە ءوز جوباسىن جۇزەگە اسىرۋ ءۇشىن 100 000 تەڭگە كولەمىندە گرانت بەرىلەدى;
• فينالدىق كەزەڭدە ۇزدىك دەپ تانىلعان اۆتورلار

✔          I ورىن – 400 000 تەڭگە

✔          II ورىن – 300 000 تەڭگە

✔          III ورىن – 200 000 تەڭگە كولەمىندە اقشالاي سىيلىقتارعا يە بولادى.

سونىمەن قاتار، 6 اۆتورعا ارقايسىسىنا 100 000 تەڭگە كولەمىندە ارنايى ىنتالاندىرۋ سىيلىعى بولادى.

بۇل سىيلىقتار جاس تالانتتاردى قولداۋعا، ەكوديزاين سالاسىندا جاڭا يدەيالاردىڭ پايدا بولۋىنا جانە شىعارماشىلىق باسەكەلەستىكتى ارتتىرۋعا باعىتتالعان.

بايقاۋ قورىتىندىسى بويىنشا ەڭ ۇزدىك ەكو-شىرشالار قالالىق فەستيۆالدىڭ ارت-اللەياسىندا كوپشىلىك نازارىنا ۇسىنىلادى. فەستيۆال كەزىندە قالا تۇرعىندارى مەن قوناقتارى ەرەكشە ونەر تۋىندىلارىمەن تانىسىپ قانا قويماي، ەكولوگيالىق مادەنيەتكە قاتىستى پايدالى اقپارات الىپ، تۇراقتى دامۋ يدەيالارىنا جاقىنداي تۇسەدى.

شىعارمالاردى باعالاۋمەن ارنايى شىعارماشىلىق يندۋستريا وكىلدەرىنەن، ەكوديزاين سالاسىنىڭ ماماندارىنان، ەكولوگتاردان، سەرىكتەس ۇيىمداردىڭ وكىلدەرىنەن جانە تانىمال ديزاينەرلەردەن قۇرىلعان كاسىبي قازىلار القاسى اينالىسادى.

ولار جۇمىستاردى كومپوزيتسيا، يدەيانىڭ جاڭاشىلدىعى، قولدانىلعان ماتەريالداردىڭ ەكولوگيالىق سيپاتى، كوركەمدىك شەشىمى جانە قالالىق كەڭىستىككە سايكەستىگى بويىنشا باعالايدى.

بۇل باستاما قالانىڭ شىعارماشىلىق الەۋەتىن اشۋعا، جاس تالانتتاردى قولداۋعا، سونداي-اق الماتىنى قازاقستانداعى جاسىل يننوۆاتسيالار ورتالىعىنا اينالدىرۋعا باعىتتالعان قادامداردىڭ ءبىرى.

بايقاۋعا وتىنىمدەر 18 جەلتوقسانعا دەيىن قابىلدانادى. تولىق اقپارات پەن بايقاۋعا قاتىسۋ ەرەجەلەرىمەن تومەندە كورسەتىلگەن سىلتەمە ارقىلى تانىسۋعا بولادى.

Abai.kz