جەتىسۋ وبلىسى 2023-2024 جىلدارى جالپى وڭىرلىك ءونىم كولەمىنىڭ ءوسىمى بويىنشا  رەسپۋبليكادا ۇزدىك شىقتى. وتكەن جىلدىڭ قورىتىندىسى بويىنشا ءونىم كولەمى 2,2 ترلن. تەڭگەگە جەتىپ، 14,8% ۇلعايدى. بيىلعى جىلدىڭ سوڭىندا جالپى وڭىرلىك ءونىم 2,7 ترلن. تەڭگە بولادى. بۇل تۋرالى وبلىس اكىمى بەيبىت يساباەۆ قر پرەزيدەنتى جانىنداعى ورتالىق كوممۋنيكاتسيالار قىزمەتى الاڭىندا وتكەن بريفينگ بارىسىندا ايتتى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

- جەتىسۋ وبلىسىندا بيىلعى ون ايدىڭ قورىتىندىسى بويىنشا بارلىق سالالاردا تۇراقتى ءوسىم بايقالادى. جىلدى جاقسى كورسەتكىشتەرمەن اياقتاۋعا تولىق مۇمكىندىك بار. نەگىزگى كاپيتالعا سالىنعان ينۆەستيتسيا كولەمى 2023-2024 جىلدارى 894 ملرد. تەڭگەنى قۇرادى، ونىڭ ىشىندە جەكە ينۆەستيتسيالاردىڭ ۇلەسى – 71,3% نەمەسە 637 ملرد. تەڭگە. جىل باسىنان وبلىس ەكونوميكاسىنا 17,5% وسىممەن 397 ملرد. تەڭگە ينۆەستيتسيا تارتىلدى، - دەدى ب. يساباەۆ.

ءوڭىر باسشىسىنىڭ ايتۋىنشا، سوڭعى ءۇش جىلدا 27 جاڭا كاسىپورىن ىسكە قوسىلىپ، جۇمىس ىستەپ تۇرعان 7 كاسىپورىن كەڭەيتىلدى. ولاردىڭ ىرىلەرىنىڭ قاتارىندا «قاينار اكب» زاۋىتىنىڭ قۋاتىن جىلىنا 100 مىڭ ونەركاسىپتىك اككۋمۋلياتور شىعاراتىن قۋاتتىلىققا جەتكىزۋ ارقىلى جاڭىرتىلۋى، جىلدىق قۋاتى 210 مىڭ وندىرىستىك ستاتسينارلىق اككۋمۋلياتور شىعاراتىن «ASMA Industrial» جاڭا زاۋىتى، الاكول، سارقان اۋداندارىندا سالىنعان ارقايسىسى 50 مۆت قۋاتتىلىققا يە ەكى جەل ەلەكتر ستانتسياسى بار.

اتاپ وتسەك، وبلىستا جالپى قۋاتى 251 مۆت بولاتىن 18 جاڭارتىلعان ەنەرگەتيكا نىسانى جۇمىس ىستەيدى.

وبلىس اكىمىنىڭ مالىمەتىنە قاراعاندا، سوڭعى ءۇش جىلدا وڭىردە 2023-2025 جىلدارى 108,5 مىڭ جۇمىس ورنى قۇرىلدى، ونىڭ ىشىندە 70 مىڭنان استام ادام تۇراقتى جۇمىسقا ورنالاستىرىلدى.

Abai.kz