الگىندە ۋكراينا پرەزيدەنتى ۆلاديمير زەلەنسكي بريۋسسەلگە بارعان كۇنى ەۋروپانىڭ جۇرەگىندە داۋىل تۇردى. ەۋروپالىق كەڭەس جيىنى ۇزاق ۋاقىت بويى تالقىلانىپ كەلگەن، بىراق ەشكىم باتىل ايتا الماعان ءبىر ماسەلەنى كۇن تارتىبىنە شىعاردى. ول — ەۋروپادا بۇعاتتالعان رەسەي اكتيۆتەرىن ۋكرايناعا بەرۋ ماسەلەسى.

بۇل اقشا – رەسەيدىڭ بۇعاتتالعان اكتيۆى عانا ەمەس، ادىلەتتىلىكتىڭ، سوعىستىڭ، قۇرباندىقتىڭ قۇنى. زەلەنسكي ءسوزىن قىسقا قايىردى: «ەسىرتكى ساۋداگەرلەرىنەن اقشا قالاي تاركىلەنسە جانە تەرروريستەردەن قارۋ قالاي الىنسا، رەسەي اكتيۆتەرىن دە سولاي تاركىلەپ، اگرەسسيادان قورعاۋ ءۇشىن پايدالانۋ كەرەك»، - دەدى. ونىڭ ايتۋىنشا، بۇل شەشىم ادامگەرشىلىككە دە، زاڭعا دا سايكەس كەلەدى.

گاپ: رەسەيدىڭ ەۋروپادا بۇعاتتالىپ جاتقان 200 ميلليارد ەۋرودان استام قارجىسى تۋرالى بولىپ وتىر. ونى ۋكرايناعا ءبولىپ-ءبولىپ بەرۋ بويىنشا ەۋروپادا بىراۋىزدىلىق جوق.

قارسى شىعىپ وتىرعاندار - بەلگيا. رەسەي اكتيۆتەرىنىڭ ەڭ كوپ بولىگى (190 ملرد ەۋرو) سوندا ساقتاۋلى. سوسىن ۆەنگريا مەن سلوۆاكيا (بۇلار و باستان پرو-رەسەيشىل ۇستانىمدا). ەندى بۇل قاتارعا يتاليا قوسىلدى (اقش-تىڭ بۇرمالاۋىمەن پوزيتسياسىن وزگەرتتى).

ەگەر ەۋروپا بۇگىن شەشىم قابىلداماسا، ەرتەڭ رەسەيدە ءۇمىت تۋادى: تاعى سوعىسادى، تاعى كۇيرەتەدى، تاعى دا كۇتەدى — سوسىن اقشاسىن قايتىپ الادى. زەلەنسكي وسىلاي دەدى.

فاكتى: رەسەي ۋكراينا مەن ەۋروپانى كۇيرەتەمىن دەدى — كۇيرەتە المادى. ەۋروپا رەسەيلىك گاز بوپساسىن ەڭسەردى، قورعانىس ونەركاسىبىن جانداندىردى، اسكەري قولداۋدى توقتاتپادى. رەسەي ەۋروپا اقش-پەن بايلانىسى ۇزىلەدى دەپ سەندى — بايلانىس كۇشەيدى.

ەۋروپا رەسەيدەن قورقىپ وتىرماۋى كەرەك. رەسەيدىڭ سوت پروتسەستەرى، ديپلوماتيالىق قىسىمدارى، ساياسي ارانداتۋلارى كوپ. بىراق زەلەنسكي: «ۋكراينا ەۋروپانى قورعاپ تۇرعان كەزدە، وعان كومەكتەسۋ كەرەك»، - دەپ كەسىپ ايتتى. بۇل — ءوتىنىش ەمەس، ەسكەرتۋ. ەگەر ۋكراينا السىرەسە، رەسەي ەش ويلانباستان ەو شەكاراسىنا كوز تىگەدى. ءبىرىنشى نىسان - پولشا بولۋى مۇمكىن.

زەلەنسكيدىڭ ايتقاندارى:

ءبىرىنشى - ۋكراينا ارمياسى تۋرالى: ۋكرايناعا ساپالى، تولىق جاساقتالعان، زاماناۋي قارۋلى كۇش قاجەت!

ەكىنشى - قاۋىپسىزدىك كەپىلدىگى تۋرالى: امەريكالىق قاۋىپسىزدىك كەپىلدىكتەرى تۋرالى كەلىسسوزدەر ءجۇرىپ جاتىر. بىراق اقش-تان ەڭ ماڭىزدى سۇراققا — «ەگەر رەسەي تاعى شابۋىل جاساسا نە ىستەيسىزدەر؟» — ناقتى جاۋاپ جوق. اقش ناتو-نىڭ 5-ءشى بابىنا ۇقساس كەپىلدىكتى كونگرەسس ارقىلى زاڭداستىرىپ بەرۋگە ماقۇل. بىراق، تۇپكىلىكتى شەشىم ءالى جوق!

ءۇشىنشى - ەۋروپا بىتىمگەرلەرى تۋرالى: بۇل ۋكراينا بەرىلەتىن ەۋروپانىڭ قاۋىپسىزدىك كەپىلدىگى. بۇل - ەۋروپا ۋكراينانىڭ ورنىنا سوعىسادى دەگەندى بىلدىرمەيدى، كەرىسىنشە جاڭا اگرەسسياعا جول بەرمەۋدىڭ ەڭ ءتيىمدى فاكتورى. ەگەر ءبىر عانا ەۋروپالىق تۋدىڭ ءوزى ۋكراينادا تۇرسا — رەسەي ەكى رەت ويلانۋعا ءماجبۇر بولادى!

ءتورتىنشى - قارجىلاي قولداۋ تۋرالى: ەگەر ەو قازىر شەشىم قابىلداماسا، ۋكراينادا درون ءوندىرىسى بىرنەشە ەسە قىسقارادى. بۇل — مايداندا تەحنولوگيالىق ارتىقشىلىق جوعالادى دەگەن ءسوز.

قارجىلاي قولداۋ ماسەلەسى – ۋكراينا ءۇشىن تاعدىرشەشتى ماسەلەلەردىڭ ءبىرى. ەگەر قولداۋ بولماسا، ەل بيۋدجەتى 45–50 ملرد ەۋرو تاپشىلىققا تاپ بولادى. بۇل — تولىق كۇيرەۋگە جاقىن سىزىق. شەشىم قابىلدانسا — ۋكراينا قورعانادى، ەۋروپا تىنىشتالادى، ءپۋتيننىڭ ءۇمىتى ۇزىلەدى. شەشىم كەشەۋىلدەسە — ەۋروپانىڭ ءوزى سوعىس شەگىنە جاقىندايدى. ويتكەنى بۇل سوعىستا ۋكراينا عانا ەمەس، ەۋروپا دا ءوز بولاشاعىن قورعاپ جاتىر.

ءتۇيىن: ەندى ءسوز — ەۋروپادا. ۋكراينا ءوز ءسوزىن ايتتى. ەندى تاڭداۋ جاسالۋى ءتيىس. سايكەسىنشە ەۋروپا تاڭداۋىن جاسادى. ەو ۋكرايناعا 90 ملرد ەۋرو كومەك بەرەتىن بولدى. بىراق ول ءۇشىن رەسەيدىڭ بۇعاتتالعان اكتيۆتەرى قولدانىلمايدى. بۇل قاراجات ەو بيۋدجەتىمەن قامتاماسىز ەتىلگەن قارىز رەتىندە بەرىلەدى.

Abai.kz