ءماجىلىس دەپۋتاتى ءابۋتالىپ ءمۇتالى پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارينگە مەملەكەتتىك قارجىنىڭ ناقتى ناتيجە بەرمەيتىن باعدارلامالارعا جۇمسالۋ سەبەبى، وعان كىم جاۋاپ بەرەتىنى، سونداي-اق قاراجاتتى شىن مانىندە مۇقتاج كاسىپكەرلەرگە باعىتتاۋ شارالارى تۋرالى دەپۋتاتتىق ساۋال جولدادى.

ءبىز اتالعان دەپۋتاتتىق ساۋالدى وقىرمان نازارىنا ۇسىنامىز...

دەپۋتاتتىق ساۋال

قۇرمەتتى ارىپتەستەر، جوعارى اۋديتورلىق پالاتانىڭ جۇرگىزگەن ءاۋديتى مىنا ءبىر ماڭىزدى جۇيەلىك ماسەلەنى انىق كورسەتتى: بيزنەستى قولداۋعا ارنالعان مەملەكەتتىك شارالاردىڭ قوماقتى بولىگى ناقتى ەكونوميكالىق ناتيجە بەرمەي وتىر، سوعان قاراماستان ولار ىسكە اسىرىلۋىن جالعاستىرۋدا.

2019–2024 جىلدار ارالىعىندا كاسىپكەرلىكتى قولداۋعا شامامەن 4,5 ترلن تەڭگە بولىنگەن. الايدا كاسىپكەرلەردىڭ 80 پايىزدان استامى بۇل قولداۋدىڭ ناقتى جاقسارۋ اكەلگەنىن بايقاماعان، 66 پايىزى قارجىلىق ەمەس قولداۋ شارالارى تۋرالى مۇلدە حابارسىز بولعان. ال ەكونوميكانىڭ قۇرىلىمىنداعى ورتا بيزنەستىڭ ۇلەسى ءالى دە 6–7 پايىز دەڭگەيىندە قالىپ وتىر.

ۇلتتىق ەكونوميكا مينيسترلىگى مەن «اتامەكەن» ۇلتتىق كاسىپكەرلەر پالاتاسى اراسىنداعى ءوزارا جۇمىس ءتيىمءسىز بولىپ وتىر. سونىڭ سالدارىنان ميللياردتاعان بيۋدجەت قاراجاتى كاسىپكەرلەرگە ناقتى پايدا اكەلمەي، قاعاز جۇزىندەگى ەسەپپەن عانا شەكتەلۋدە.

2024 جىلعا ارنالعان «ىسكەر ايماق» باعدارلاماسى بويىنشا 93,5 ملرد تەڭگە بولىنگەنىمەن، ونىڭ 60 پايىزدان استامى بەس ءىرى قالاعا باعىتتالىپ، شاعىن جانە شالعاي اۋداندار قولداۋسىز قالدى.

قالىپتاسقان جاعداي جۇيەدەگى تەڭسىزدىكتى ايقىن كورسەتىپ وتىر: نەگىزگى قولداۋ ءىرى قالالارعا باعىتتالىپ، شاعىن قالالار مەن ەلدى مەكەندەر ءىس جۇزىندە نازاردان تىس قالىپ وتىر. قوماقتى بيۋدجەت قاراجاتى بولىنگەنىنە قاراماستان، كاسىپكەرلەر قولداۋ شارالارىنىڭ قولجەتىمدىلىگى مەن تيىمدىلىگى تومەن ەكەنىن ايتىپ وتىر.

سۇراق: ۇلتتىق ەكونوميكا مينيسترلىگى مەن «اتامەكەن» نەگە ميللياردتاعان قارجىنى ناقتى ناتيجە بەرمەيتىن فورمالدى باعدارلامالارعا جۇمساپ وتىر؟ بۇل ءۇشىن كىم جاۋاپ بەرەدى جانە مەملەكەتتىك قولداۋ ەلدىڭ بارلىق وڭىرىندەگى كاسىپكەرلەرگە شىن مانىندە جەتۋى ءۇشىن قانداي ناقتى شارالار قابىلدانادى؟

ءابۋتالىپ ءمۇتالى

Abai.kz