قوستاناي قالاسىنىڭ №2 سوتىندا 44 جاستاعى جەرگىلىكتى تۇرعىن يۋليا حونعا قاتىستى ۇكىم جاريالاندى. وعان ۇلتارالىق ارازدىقتى قوزدىردى دەگەن ايىپ تاعىلعان، دەپ حابارلايدى Ulysmedia.kz.

تولىعىراق

توبولينفو مالىمەتىنشە، ءىس ماتەريالدارىنا سايكەس، 2024 جىلعى قاراشا ايىنىڭ باسىندا (ناقتى كۇنى كورسەتىلمەگەن), تۇنگى شامامەن ساعات 3:45-تە، ماس كۇيدە يۋليا حون TikTok جەلىسىنە كىرىپ، ءوز اككاۋنتىنان تىكەلەي ەفيردە وتىرعان. كەيىن ونىڭ ادۆوكاتى ۆيتالي ءليدىڭ ايتۋىنشا، ەفير بارىسىندا رەسەي مەن ۋكراينا اراسىنداعى سوعىس تاقىرىبى تالقىلانعان.

قورلاۋ

تىكەلەي ەفير كەزىندە ايىپتالۋشى بالاعات سوزدەر ايتىپ، پىكىرتالاسقا قاتىسۋشىلاردى، سونىڭ ىشىندە قازاقتاردى ۇلتتىق بەلگىسى بويىنشا قورلايتىن سوزدەر قولدانعان. سوت مۇنى ۇلتتىق ارازدىقتى قوزدىرۋعا باعىتتالعان ارەكەت دەپ باعالادى.

دالەلدەر

ءىستى قاراعان سۋديا ولگا كۋزنەتسوۆا يۋليا حوننىڭ كىناسى تىكەلەي ەفير جازباسى، ساراپتامالىق قورىتىندىلار جانە كۋاگەرلەردىڭ ايعاقتارىمەن دالەلدەنگەنىن اتاپ ءوتتى.

ۇكىم

سوت يۋليا حوندى ەكى جىلعا باس بوستاندىعىنان ايىرىپ، ەڭ تومەنگى قاۋىپسىزدىك دەڭگەيىندەگى كولونيادا جازاسىن وتەۋگە ۇكىم شىعاردى. بۇعان دەيىن ول ەلدەن شىقپاۋ تۋرالى قولحاتپەن جۇرگەندىكتەن، سوت زالىندا قاماۋعا الىندى.

سوت جازا تاعايىنداۋدا ونىڭ اسىراۋىندا جول-كولىك اپاتىنان كەيىن كورۋ قابىلەتىن جوعالتقان ۇلى بارىن ەسكەرىپ، جازانى جەڭىلدەتكەن. ايەل بالاسىنىڭ ەمىن ءوزى تولەپ جۇرگەنى دە نازارعا الىنعان.

ايىپتالۋشى تۇرمىستا ەكەنى، جۇمىس ىستەيتىنى جانە بۇرىن سوتتالماعانى دا ايتىلدى.

سونىمەن قاتار، ول 826 تەڭگە كولەمىندە پروتسەسسۋالدىق شىعىنداردى وتەۋگە مىندەتتەلدى.

ادۆوكاتى نە دەيدى

يۋليا حوننىڭ ادۆوكاتى ۆالەري لي تىكەلەي ەفير بارىسىندا ونىڭ قورعاۋىنداعى ادام دا قورلانعانىن، ال ول بۇكىل ۇلتتى ەمەس، ناقتى ءبىر ادامدى بالاعاتتاعانىن اتاپ ءوتتى. قورعاۋ تاراپى ۇكىمگە شاعىمداناتىنىن مالىمدەدى.

 Abai.kz