جىلقىنىڭ دۇبىرىنەن ادامنىڭ ءۇنى ەستىلگەندە...

استاناداعى تەاتر ماۋسىمىن ءبىرىنشى بولىپ باستاعان مۋزىكالىق جاس كورەرمەن تەاترى بيىل شىمىلدىعىن بىردەن جاڭا قويىلىممەن اشتى. جەتىنشى ماۋسىمداعى العاشقى پرەمەرانىڭ 25, 26, 27 تامىز كۇندەرى قاتارىنان انشلاگپەن ءوتۋىنىڭ ءوزى كورەرمەننىڭ تەاترعا دەگەن ساعىنىشىن اڭعارتقانداي. ال قويىلىم تاقىرىبىنا قازاق حالقى جەتى قازىنانىڭ ءبىرى ساناعان جىلقى تاعدىرىنىڭ ارقاۋعا الىنۋى جاي سايكەستىك ەمەس، جاقسىلىقتىڭ نىشانىنداي قابىلداندى.

بۇل جولى تەاتر ساحناسىندا باۋىرلاس قىرعىز حالقىنىڭ زاڭعار جازۋشىسى شىڭعىس ايتماتوۆتىڭ قالامىنان تۋعان، قازاق وقىرمانىنا شەرحان مۇرتازانىڭ كوركەم اۋدارماسى ارقىلى كەڭىنەن تانىلعان ايگىلى «قوش بول، گۇلسارى!» پوۆەسىن جاس رەجيسسەر ەرالحان مىرزاحمەت جاڭاشا پايىمدادى. شىعارمانى ساحنا تىلىنە بەيىمدەگەن دە رەجيسسەردىڭ ءوزى.

تۇپنۇسقانىڭ نەگىزگى وزەگىن ساقتاي وتىرىپ، رەجيسسەر ونى ساحنا زاڭدىلىعىنا باعىندىرىپ قانا قويماي، شىعارماعا وزىندىك كوزقاراسىن ۇسىنۋعا تالپىنعان.

ايتماتوۆ شىعارماسىنىڭ وزەگىندە – ادام مەن جىلقىنىڭ تاعدىرى عانا ەمەس، ادام مەن قوعامنىڭ، ەركىندىك پەن تاۋەلدىلىكتىڭ، ادالدىق پەن بيلىكتىڭ اراقاتىناسى جاتىر. تانابايدىڭ ءومىر جولى مەن گۇلسارىنىڭ تاعدىرى ءبىر-بىرىنە پاراللەل ءورىلىپ، اقىرىندا ءبىر ارناعا توعىسادى. وسى بايلانىستى رەجيسسەر ساحنالىق نۇسقادا ايقىن كورسەتە العان.

پوۆەستە وقيعا تانابايدىڭ قارتايعان شاعىنان باستالىپ، وتكەن كۇندەردى ەسكە ءتۇسىرۋ ارقىلى ءوربيدى. ال قويىلىمدا بۇل قۇرىلىم وزگەرتىلگەن. رەجيسسەر وقيعانى حرونولوگيالىق جۇيەگە ءتۇسىرىپ، وتكەندى ەسكە الۋ تاسىلىنەن باس تارتادى. وسى ارقىلى سپەكتاكل ۋاقىت جاعىنان ءبىرىزدى، قابىلداۋعا جەڭىل قۇرىلىمعا يە بولعان.

بۇل – رەجيسسەردىڭ ۇتىمدى شەشىمدەرىنىڭ ءبىرى. ويتكەنى ايتماتوۆ شىعارماسىن وقىماعان كورەرمەننىڭ ءوزى وقيعا جەلىسىن ەركىن قابىلداي الادى. قويىلىم كورەرمەندى ۋاقىتتىڭ اۋىسۋىمەن نەمەسە كۇردەلى كومپوزيتسيالىق قۇرىلىممەن اۋرەگە سالماي، تاناباي مەن گۇلسارىنىڭ ءومىر جولىن ءبىرىزدى كورسەتەدى. الايدا رەجيسسەردىڭ نەگىزگى ماقساتى شىعارمانى تەك جەڭىلدەتىپ كورسەتۋ ەمەس. كەرىسىنشە، تۇپنۇسقاداعى فيلوسوفيالىق استاردى ساحنالىق ارەكەت ارقىلى تەرەڭدەتۋگە ۇمتىلىس بايقالادى.

ماسەلەن، تانابايدىڭ جىلقىنى باپتاۋ تۋرالى ويلارى ارقىلى ادام مەن جانۋار اراسىنداعى بايلانىستىڭ تابيعاتى اشىلادى. ونىڭ «اتتى باپتاعاندا  تەك جۇرىسىنە، جۇيرىكتىگىنە عانا ەمەس، يەسىن تىڭداۋىنا، تۇسىنۋىنە دە كوڭىل بولگەن ءجون! ال جىلقىنى باپتاعاندا كۇشپەن ەمەس، پەيىلىڭمەن باپتاۋ كەرەك. سوندا عانا ات يەسىنىڭ مىنەزىن بىلەدى، قايعىسىن دا، قۋانىشىن دا سەزەدى» دەگەن سوزدەرى قويىلىمنىڭ فيلوسوفيالىق قاباتىن قالىڭداتا تۇسەدى. ال گۇلسارىنىڭ «بۇگىن مەن العاش رەت ادامنىڭ ءۇنىن تانىدىم. مەنى باپتاپ جاتقان ادام تىزگىندى قاتتى تارتسا دا، قولىندا قاتىگەزدىك جوق ەدى. مەنىڭ بۇل ادامنان بايقاعانىم، مەنى كوندىرۋدى ەمەس، ءتۇسىنىسۋدى قاجەت ەتىپ تۇرعانداي. قانشا اۋىرلىقتى سەزگەنىممەن، جەككورۋشىلىكتى سەزبەدىم» دەپ ءتىل قاتۋى  پوۆەستىڭ تۇپنۇسقاسىندا جوق، رەجيسسەرلىك قيالدان تۋعان شەشىم. ءارى وسىنداي تىڭ رەجيسسەرلىك ىزدەنىستەر قويىلىم بارىسىندا ءجيى كەزدەسەدى.

بۇل جەردە جىلقى جاي عانا ساحناداعى كەيىپكەر ەمەس، ءوز تاعدىرى مەن ءوز تۇيسىگى بار تىرشىلىك يەسىنە اينالادى. دەمەك، رەجيسسەر گۇلسارىنى وقيعانىڭ وبەكتىسى ەمەس، ونىڭ سۋبەكتىسىنە اينالدىرۋعا ۇمتىلعان.

تاناباي – قاراپايىم ەڭبەك ادامى. بىراق ونىڭ قاراپايىمدىلىعى السىزدىك ەمەس. ول – قايراتتى، وجەت، ادىلەتكە سەنەتىن، ءوز ۇستانىمىنان وڭايلىقپەن اينىمايتىن ادام.

بۇل وبرازدى قازىبەك ەسقارا تابيعي بولمىسىن بۇزباي، نانىمدى سومدايدى. اكتەردىڭ ويىنىندا ارتىق پافوس جوق. تانابايدىڭ گۇلسارىعا دەگەن ىقىلاسى مەن جاقىندىعى جاساندى مەيىرىم رەتىندە ەمەس، ادامنىڭ ءوز سەرىگىنە دەگەن شىنايى سەزىمى رەتىندە قابىلدانادى. اسىرەسە تانابايدىڭ گۇلسارىنىڭ قىزعان دەنەسىن قالشىلداعان قولىمەن سيپاۋى، جاناشىرلىقپەن جۇگەندەۋى سەكىلدى قاراپايىم ارەكەتتەردىڭ وزىندە كەيىپكەردىڭ ىشكى الەمى كورىنەدى. بۇل كورىنىستەردە اكتەر سوزدەن گورى ارەكەتكە سۇيەنەدى. ال تەاترداعى شىنايىلىق كوبىنە ءدال وسىنداي قاراپايىم ارەكەتتەردەن سەزىلەدى.

تانابايدىڭ تاعدىرى گۇلسارىنىڭ تاعدىرىمەن قاتار داميدى. ءبىرى – ادام، ءبىرى – جانۋار بولعانىمەن، ەكەۋىنىڭ دە ومىرىندە ەركىندىككە دەگەن ۇمتىلىس بار. ەكەۋى دە ءبىر ساتتە ءوز ەركىندىگىنەن ايىرىلىپ، ادامنىڭ جانە قوعامنىڭ قويعان تالابىنا تاۋەلدى بولادى. سوندىقتان قويىلىمداعى گۇلسارىنىڭ تاعدىرىنا قاراپ وتىرىپ، شىن مانىندە تانابايدىڭ تاعدىرىن دا كورەمىز.

قويىلىمنىڭ ەڭ كۇردەلى اكتەرلىك مىندەتتەرىنىڭ ءبىرى – گۇلسارى بەينەسىن جاساۋ. جانۋار وبرازىن جاي عانا سىرتقى قيمىلىن قايتالاۋ ارقىلى ەمەس، ونىڭ تابيعاتىن پلاستيكامەن جەتكىزۋ – اكتەردەن ەرەكشە فيزيكالىق دايىندىق پەن ىشكى كونتسەنتراتسيانى تالاپ ەتەدى.

گۇلسارىنى ەكى قۇرامدا ەرماحان ايماحان مەن اققانات قۋاندىقوۆ سومدايدى. ەكى اكتەر دە بۇل بەينەگە ءارتۇرلى جولمەن كەلەدى. ءبىرى جىلقى مىنەزىن دەنەنىڭ ءدىرىلى، كوزقاراسى، تۇرىسى ارقىلى جەتكىزۋگە تىرىسسا، ەكىنشىسى جۇرىسىنە، دىبىسىنا، تىنىسىنا، دەنە پلاستيكاسىنا كوبىرەك سۇيەنەدى. ەكەۋىنىڭ دە سىرتقى دەنە ءبىتىمى جىلقى بەينەسىنە ساحنالىق تۇرعىدان ءساتتى سايكەس كەلەدى.

دەگەنمەن گۇلسارى وبرازىندا ءالى دە تەرەڭدەتۋدى قاجەت ەتەتىن تۇستار بار. اكتەرلەر كەي ساتتەردە جىلقىنى «ويناپ» تۇرعانىن سەزدىرىپ قويادى. ال مۇنداي وبرازدا كورەرمەن اكتەردى ەمەس، تىرشىلىك يەسىنىڭ ءوزىن سەزىنۋى كەرەك. ياعني پلاستيكالىق ارەكەت بىرتىندەپ سانالى اكتەرلىك قيمىلدان تابيعي ينستينكت دەڭگەيىنە ءوتۋى قاجەت. ويتكەنى قويىلىمدا بار نازار گۇلسارىعا تۇسەتىن ساتتەر از ەمەس. سوندىقتان بۇل وبرازدىڭ ساحنالىق تابيعاتىن ودان ءارى تەرەڭدەتۋ سپەكتاكلدىڭ ەموتسيونالدىق قۋاتىن دا ارتتىرا تۇسەرى انىق.

سوعان قاراماستان گۇلسارى مەن تانابايدىڭ العاشقى كەزدەسۋى، ءبىر-ءبىرىن تانۋى جانە گۇلسارىنى قۇرىقتاۋ ءساتى قويىلىمداعى ەڭ كوركەم ءارى اسەرلى كورىنىستەردىڭ ءبىرى. بۇل جەردە جارىقتىڭ ءرولىن ەرەكشە اتاپ وتكەن دۇرىس. جارىق رەجيسسەرلىك ويدى تولىقتىرىپ قانا قويماي، كوپ كورىنىستەردىڭ ەموتسيونالدىق قۋاتىن ارتتىرا تۇسكەن. جارىق ارقىلى ادام مەن جىلقى اراسىنداعى ارپالىس، گۇلسارىنىڭ اساۋ تابيعاتى مەن ەركىندىككە ۇمتىلىسى ايقىن سەزىلەدى. ال تانابايدىڭ بۇبىجانمەن بىرگە وتكىزگەن تۇنىندەگى كورىنىسى جارىق پەن دىبىستىڭ ۇيلەسىمى ارقىلى وتە ءساتتى بەرىلگەن. سول تۇنگى نايزاعايدىڭ جارقىلى مەن كۇننىڭ كۇركىرەگەن دىبىسى ساحناداعى اتموسفەرانى كۇشەيتىپ، كورىنىستىڭ ىشكى شيرىعۋىن اسەرلى جەتكىزەدى. قويىلىمداعى جارىق جاي عانا ساحنانى بەزەندىرۋ قۇرالى ەمەس، وقيعانىڭ ەموتسيالىق احۋالىن، كەيىپكەرلەردىڭ ىشكى كۇيىن تولىقتىراتىن ماڭىزدى كوركەمدىك قۇرال رەتىندە قولدانىلعان.

قويىلىمداعى نەگىزگى درامالىق جۇكتى كوتەرگەن وبرازداردىڭ ءبىرى – تانابايدىڭ جارى جايدار. بۇل ءرولدى اقنيەت زامزات سومدايدى. اكتريسانىڭ ساحنالىق جۇمىسىنداعى باستى ەرەكشەلىك – ىشكى قاسىرەتتى سىرتقى ايقايعا اينالدىرماي جەتكىزۋى. جايداردىڭ ىشكى تولعانىسى كوزقاراسىنان، داۋىس ىرعاعىنان، ۇنسىزدىگىنىڭ وزىنەن بايقالادى. بۇل جەردە اكتريسا كەيىپكەردىڭ ەموتسياسىن كورەرمەنگە كۇشتەپ تاڭبايدى. كەرىسىنشە، ونىڭ ىشكى كۇيىن كورەرمەننىڭ وزىنە سەزىنۋگە مۇمكىندىك بەرەدى. تەاترداعى ۇستامدىلىقتىڭ ءوزى كەيدە ۇلكەن ەموتسيالىق اسەر تۋعىزاتىنىن ءدال وسى جايدار بەينەسى دالەلدەيدى.

سپەكتاكلدىڭ كوركەمدىك دەڭگەيىن انىق كورسەتەتىن، نازار اۋدارۋعا تۇرارلىق تۇسى - بايگە ساحناسى. كوپشىلىك ساحنا وتە ادەمى قۇرىلعان. بىرىنەن-ءبىرى وتكەن سايگۇلىكتەر، الامانعا جيىلعان جۇرتتىڭ «شاپ! شاپ!» دەگەن ايقايى، مارەگە ۇمتىلعان جىلقىلاردىڭ قيمىل - قوزعالىسى ەرەكشە اسەر قالدىرادى. جالپى اتموسفەراسى مەن كەيبىر پلاستيكالىق شەشىمدەرى باسقا ءبىر قويىلىمدى ەسكە تۇسىرگەنىمەن، مۇندا دايىن كوشىرمە ەمەس، وزىندىك رەجيسسەرلىك ىزدەنىستەر ۇسىنىلعانى بايقالادى.

اكتەرلەردىڭ ساحنانى اينالا شاۋىپ، بىردە العا، بىردە ارتقا، بىردە قاپتالعا قيسايا قوزعالىپ، مارەگە ءبىرىنشى بولىپ جەتكەن گۇلسارىنىڭ الدىنا تارتىلعان ارقاننان اتتاپ وتەتىن ءساتى – حورەوگرافيالىق تۇرعىدان جاقسى ويلاستىرىلعان كورىنىس. سول ساتتە كورەرمەن بايگەنىڭ شىنايى اتموسفەراسىن سەزىنگەندەي بولادى. بۇل كورىنىستىڭ قۇندىلىعى جىلقىنىڭ سىرتقى قوزعالىسىن كورسەتۋىندە عانا ەمەس. مۇندا قوزعالىستىڭ وزىنە ەركىندىك ۇعىمى سىيعان. گۇلسارى ءۇشىن جۇيرىكتىك – تابيعي بولمىس. ال ادام ءۇشىن سول تابيعي بولمىستى مويىنداتۋ، يەمدەنۋ، باسقارۋ ارەكەتى باستالادى. وسى قايشىلىق كەيىن سپەكتاكلدىڭ نەگىزگى فيلوسوفيالىق جەلىسىنە اينالادى.

الايدا قويىلىمنىڭ كوركەمدىك تۇتاستىعىنا قاتىستى سىن ايتۋعا بولاتىن تۇستار دا بار. سولاردىڭ ءبىرى – تاناباي مەن ءبۇبىجاننىڭ ماحاببات ساحناسى. بۇل كورىنىس تىم ۇزاققا سوزىلىپ، سپەكتاكلدىڭ جالپى ەستەتيكالىق تابيعاتىمەن تولىق ۇيلەسە قويمايدى. كەيبىر ارەكەتتەردىڭ ساحنادا تىم اشىق بەرىلۋى كوركەمدىك استاردى كۇشەيتۋدىڭ ورنىنا، كەرىسىنشە، ونىڭ اسەرىن السىرەتىپ جىبەرەدى. تەاتردىڭ باستى قۇدىرەتى – ءبارىن تۋرا كورسەتۋىندە ەمەس، كورەرمەننىڭ قيالىنا ورىن قالدىرۋىندا. سوندىقتان بۇل قارىم-قاتىناستى كوزقاراس، ءۇن، قاشىقتىق، يشارا نەمەسە قىسقا پلاستيكالىق ارەكەت ارقىلى استارلاپ تا جەتكىزۋگە بولاتىن ەدى.

بۇعان قوسا تاناباي مەن ءبۇبىجان اراسىنداعى جەلىگە قويىلىمدا ەداۋىر كوپ ورىن بەرىلگەندەي كورىندى. بۇل ءوز كەزەگىندە نەگىزگى درامالىق ارقاۋ تاناباي مەن گۇلسارى تاعدىرىنىڭ پاراللەل ورىلۋىنەن كورەرمەن نازارىن ءسال الىستاتىپ جىبەرەدى. ونىڭ ورنىنا شىعارمانىڭ قىسقارىپ قالعان كەيبىر ماڭىزدى جەلىلەرىن قوسۋعا بولار ەدى.

ماسەلەن، ايتماتوۆتىڭ تۇپنۇسقاسىنداعى تانابايدىڭ دوسى شورا سپەكتاكلدە مۇلدە جوق. ارينە، بۇل – رەجيسسەرلىك ينتەرپرەتاتسيانىڭ ناتيجەسى. ساحنالىق نۇسقادا كەيىپكەرلەردى قىسقارتۋ زاڭدى. بىراق شورا بەينەسىنىڭ بولماۋى تانابايدىڭ الەۋمەتتىك ورتاسىن، ادامدىق قارىم-قاتىناس كەڭىستىگىن ءبىرشاما تارىلتقانىن دا ايتا كەتۋ كەرەك.

جالپى قويىلىمنىڭ دراماتۋرگيالىق قۇرىلىمى جۇيەلى، ىشكى قۋاتى وتە مىقتى. اكتەرلىك انسامبل دە قويىلىمنىڭ تۇتاستىعىن ساقتاۋعا قىزمەت ەتەدى. سپەكتاكلدىڭ ستسەنوگرافيالىق شەشىمى دە ءوزىن اقتايدى. ساحنادا ارتىق دەتال جوق. دەكوراتسيا كورەرمەن نازارىن ارتىق دۇنيەلەرگە بولمەيدى، وقيعا ءوتىپ جاتقان قاجەتتى كەڭىستىكتى عانا بەلگىلەيدى.

ساحنانىڭ قاق ورتاسىندا تۇرعان جالعىز اعاشتىڭ ورنى بولەك. شىعارمادا قايتا-قايتا اتالاتىن، گۇلسارى بايلاناتىن بۇل اعاش سپەكتاكلدە جاي عانا دەكوراتسيالىق ەلەمەنت بولىپ قالمايدى. ول وقيعانىڭ تۇراقتى نۇكتەسىنە اينالادى. ادام مەن جىلقى تاعدىرىنىڭ ءتۇرلى كەزەڭدەرى سول ءبىر كەڭىستىكتىڭ اينالاسىندا ءوربيدى.

اعاشتىڭ ءوزى دە بەلگىلى ءبىر ماعىنادا ەركىندىك پەن تاۋەلدىلىكتىڭ اراسىنداعى شەكارانى كورسەتەدى. گۇلسارى تابيعاتتىڭ ەركىن تىرشىلىگىنەن ادام قولىنا وتكەن سايىن سول اعاشقا بايلانادى.

مۋزىكالىق شەشىم دە قويىلىمنىڭ جالپى اتموسفەراسىمەن قابىسىپ جاتىر. مۋزىكا وقيعانى سىرتتاي سۇيەمەلدەۋشى عانا ەمەس، قويىلىمنىڭ ەموتسيالىق كەڭىستىگىن قالىپتاستىراتىن ەلەمەنت رەتىندە قىزمەت ەتەدى.

حور ورىندايتىن «جىلقىشىنىڭ ءانى» سپەكتاكلدىڭ تاقىرىبىمەن ۇيلەسىم تاۋىپ، شىعارمانىڭ ۇلتتىق بوياۋىن تەرەڭدەتە تۇسەدى.

قويىلىمداعى ەڭ ماڭىزدى ءارى كوركەمدىك سالماعى باسىم رەجيسسەرلىك شەشىم – فينال.

تاناباي ۇكىمەتتىڭ مالىن مەنشىكتەدى دەگەن ايىپپەن اۋىلشارۋاشىلىق كەڭەسىنىڭ جينالىسىنا تۇسەدى. رەجيسسەر بۇل جيىندى كادىمگى سوت وتىرىسىنا ۇقساس جاعدايدا قۇرادى. تانابايعا ءتۇرلى ايىپتار تاعىلىپ، موينىنا تەمىر كىسەن سالىنعان ساتتە ساحنانىڭ ارتقى پلانىندا گۇلسارىنىڭ قامشى استىنداعى كورىنىسى قاتار جۇرەدى. يەسى قينالىپ، رۋحى جانشىلىپ جاتقاندا، جورعانىڭ دا جان داۋسىن شىعارارداي كۇي كەشۋى – ادام مەن جانۋار تاعدىرىن ءبىر نۇكتەدە تۇيىستىرەتىن وتە كۇشتى ساحنالىق شەشىم.

مۇندا رەجيسسەر پاراللەل مونتاج ءتاسىلىن تەاتر تىلىنە اينالدىرادى: ءبىر ساحنادا ادام جازالانادى، ەكىنشى كەڭىستىكتە جىلقى ازاپ شەگەدى. بىراق كورەرمەن ءۇشىن ەكەۋىنىڭ دە جازاسى ءبىر جۇيەدەن شىعىپ تۇرعانى انىق.

ودان كەيىن اۋىل تۇرعىندارىنىڭ تانابايدى قوي تەرىلەرىمەن ۇرىپ، «حالىق سەنىمىن اقتاماعان» ادام رەتىندە كومىپ كەتۋى دە سيمۆوليكالىق تۇرعىدان اسا سالماقتى ساحنالاردىڭ ءبىرى.

بۇل ءبىر ادامنىڭ عانا جازالانۋى ەمەس. بۇل جۇيەگە سىيماعان ادامنىڭ قوعام تاراپىنان جەرلەنۋى. ال گۇلسارىنىڭ تاعدىرى وسى ۇكىمنىڭ ەكىنشى قىرى ىسپەتتى. ءبىرى – ادام بولعانى ءۇشىن، ەكىنشىسى – تابيعاتىنا ادال بولعانى ءۇشىن جاپا شەگەدى. فينالدىڭ ايتار ويى ءدال وسى ساحنامەن استاسىپ جەتەدى.

قورىتا ايتساق، «قوش بول، گۇلسارى!» ايتماتوۆ شىعارماسىن ساحناعا جاي عانا كوشىرىپ اكەلۋگە تىرىسپاي، ونىمەن شىعارماشىلىق ديالوگ ورناتقان قويىلىم. رەجيسسەر ەرالحان مىرزاحمەت تۇپنۇسقانىڭ نەگىزگى يدەياسىنان الشاقتاماي، ءوز ساحنالىق ءتىلىن ىزدەگەن. ونىڭ حرونولوگيالىق قۇرىلىمعا كوشۋى، گۇلسارىنىڭ ىشكى داۋىسىن ەنگىزۋى، تاناباي مەن جىلقى تاعدىرىن پاراللەل جۇرگىزۋى، بايگە كورىنىسىندەگى پلاستيكالىق شەشىمدەرى جانە فينالداعى سوت كورىنىسى مەن قامشى استىنداعى گۇلسارى تاعدىرىن قاتار كورسەتۋى – رەجيسسەردىڭ وزىندىك قولتاڭباسىن تانىتاتىن ىزدەنىستەر.

قويىلىمنىڭ ەڭ باستى جەتىستىگى – گۇلسارىنىڭ تاعدىرىن تانابايدان بولەك قاراستىرماي، ەكەۋىنىڭ ءومىرىن ءبىر-ءبىرىنىڭ ايناسىنا اينالدىرا ءبىلۋى. جىلقىنىڭ ەركىندىگى شەكتەلگەن سايىن ادامنىڭ دا ەركىندىگى تارىلىپ بارا جاتقانىن سەزىنەمىز.

قويىلىم ادام مەن تابيعاتتىڭ اراسىنداعى بايلانىستى عانا ەمەس، ادامدى ادامنىڭ وزىنە جات قىلاتىن قوعام تۋرالى دا ويلانتادى.

سپەكتاكل وسى ويدى بۇگىنگى كورەرمەنگە قايتا ۇسىنۋعا تالپىنادى.

گۇلسارى ساحنادان كەتكەندە، ونىڭ ءدۇبىرى بىرازعا دەيىن قۇلاقتا قالادى. بىراق سول ءدۇبىردىڭ ار جاعىنان جىلقىنىڭ عانا ەمەس، ءوز ەركىندىگىنەن ايىرىلعان ادامنىڭ ءۇنى ەستىلگەندەي بولادى.

جۇلدىز كاپەزوۆا، تەاترتانۋشى

Abai.kz