قازاقستان كولىك مينيسترلىگىنىڭ ازاماتتىق اۆياتسيا كوميتەتىنىڭ توراعاسى سالتانات تومپيەۆا حالىقارالىق ازاماتتىق اۆياتسيا ۇيىمىنىڭ (يكاو) باس حاتشىسى حۋان كارلوس سالازاردىڭ شەشىمىمەن يكاو-نىڭ عالامدىق ەلشىلەر باعدارلاماسى اياسىندا ەلشى بولىپ تاعايىندالدى.

بۇل تاعايىنداۋ يكاو تاراپىنان قازاقستان رەسپۋبليكاسىنا كورسەتىلگەن جوعارى سەنىمدى بىلدىرەدى ءارى ەلدىڭ حالىقارالىق ازاماتتىق اۆياتسيا كۇن ءتارتىبىن ىلگەرىلەتۋگە قوسقان ۇلەسىنىڭ مويىندالۋى بولىپ سانالادى.

قازاقستان وكىلى يكاو-نىڭ 56 مەملەكەتتى بىرىكتىرەتىن ەۋروپالىق جانە سولتۇستىك اتلانتيكالىق وڭىرلىك بيۋروسى (EUR/NAT) شەڭبەرىندە ىرىكتەلدى. قازاقستاننىڭ تاڭدالۋى ەلدىڭ يكاو-نىڭ 2026–2050 جىلدارعا ارنالعان ستراتەگيالىق جوسپارىندا ايقىندالعان باسىمدىقتاردى ىسكە اسىرۋداعى بەلسەندى ءارى ءتيىمدى ءرولىن كورسەتەدى.

يكاو ەلشىسى رەتىندەگى قىزمەتىندە سالتانات تومپيەۆا ازاماتتىق اۆياتسيانى دامىتۋدىڭ نەگىزگى باعىتتارى بويىنشا، اتاپ ايتقاندا اۆياتسيا سالاسىنىڭ ورنىقتى ءوسۋىن قامتاماسىز ەتۋ، بىلىكتى اۆياتسيا ماماندارىن دايارلاۋ جانە تارتۋ، سونداي-اق سالاداعى ايەلدەر مەن جاستاردىڭ قاتىسۋىن كەڭەيتۋ ماسەلەلەرى بويىنشا حاباردارلىقتى ارتتىرۋعا ۇلەس قوساتىن بولادى.

ازاماتتىق اۆياتسيا كوميتەتى مالىمەتىنشە، اتالعان قىزمەت ەرىكتى نەگىزدە جانە بىرىككەن ۇلتتار ۇيىمى مەن يكاو-نىڭ تاۋەلسىزدىك، بەيتاراپتىق جانە ەتيكا قاعيداتتارىن قاتاڭ ساقتاي وتىرىپ جۇزەگە اسىرىلادى.

قازاقستان رەسپۋبليكاسىنىڭ كولىك مينيسترلىگى بۇل تاعايىنداۋ قازاقستاننىڭ جاھاندىق ازاماتتىق اۆياتسيا جۇيەسىندەگى بەلسەندى ءرولىن، سونداي-اق ورنىقتى دامۋ، ينكليۋزيۆتىلىك جانە ادامي كاپيتالدى دامىتۋ سالاسىنداعى حالىقارالىق باستامالارعا بەرىك ۇستانىمىن راستايتىنىن اتاپ وتەدى.

Abai.kz