قۇرمەتتى كونستيتۋتسيالىق رەفورما
بويىنشا كوميسسيانىڭ ءتورايىمى
ەلۆيرا ءازىموۆا حانىم!

مەملەكەت باسشىسى كونستيتۋتسيالىق رەفورمانى ازىرلەۋ جانە ىسكە اسىرۋ ۇدەرىسى قوعامدا اشىق تالقىلانۋى ءتيىس ەكەنىن ناقتى اتاپ وتكەن بولاتىن. وسىعان وراي، سوڭعى ۋاقىتتا قازاق قوعامىندا بۇل رەفورماعا قاتىستى پىكىرلەر بەلسەندى تۇردە ايتىلىپ كەلەدى: قولدايتىندار دا بار، قولدامايتىندار دا بار. سونىمەن قاتار رەفورمانىڭ مازمۇنى مەن باعىت-باعدارىن تولىق تۇسىنبەي وتىرعان ازاماتتار دا از ەمەس.

قوعامداعى وسىنداي سۇراقتار مەن الاڭداۋشىلىقتار اياسىندا بۇقارالىق اقپارات قۇرالدارى كونستيتۋتسيالىق رەفورما بويىنشا كوميسسيا مۇشەلەرىنەن اشىق ءارى ناقتى پىكىر الۋعا مۇددەلى. بۇل – قوعام الدىنداعى زاڭدى ءارى ورىندى تالاپ.

الايدا، وكىنىشكە قاراي، Abai.kz اقپاراتتىق پورتالى وسى ماقساتتا كوميسسيا مۇشەلەرىنەن پىكىر الۋ ءۇشىن بىرنەشە مارتە بايلانىس ورناتۋعا تىرىسقانىمەن، ناقتى جاۋاپ الا المادى. مۇنداي جاعداي قوعامدا رەفورمانىڭ اشىقتىعىنا قاتىستى كۇمان تۋدىرۋى مۇمكىن.

ءسىز، كونستيتۋتسيالىق رەفورما بويىنشا كوميسسيانىڭ ءتورايىمى رەتىندە، كوميسسيا جۇمىسىنىڭ اشىقتىعىن قامتاماسىز ەتە الاتىن، سونداي-اق قوعام مەن بيلىك اراسىنداعى ديالوگقا جول اشاتىن نەگىزگى تۇلعالاردىڭ ءبىرىسىز. سوندىقتان باق تاراپىنان قويىلىپ وتىرعان قوعامدىق ساۋالدارعا كوميسسيا مۇشەلەرىنىڭ اشىق جاۋاپ بەرۋىنە جاعداي جاسالادى دەپ سەنەمىز.

ءبىز، Abai.kz اقپاراتتىق پورتالى، كونستيتۋتسيالىق رەفورما بويىنشا كوميسسيا قىزمەتىنىڭ بۇقارالىق اقپارات قۇرالدارى ءۇشىن دە، قوعام ءۇشىن دە اشىق بولۋىن تالاپ ەتەمىز. اشىق پىكىرتالاس پەن ءتۇسىندىرۋ جۇمىستارى رەفورمانىڭ ءمانىن كۇشەيتىپ، وعان دەگەن قوعامدىق سەنىمدى ارتتىرارى ءسوزسىز.

قوعاممەن اشىق ديالوگ – تابىستى رەفورمانىڭ باستى كەپىلى.

قۇرمەتپەن،

Abai.kz اقپاراتتىق پورتالى

Abai.kz