2022 جىلعا دەيىن رەسەيلىك ەليتا ءپۋتيندى راتسيونالدى باسشى دەپ ساناپ، ونى «بوسس - باستىق» دەپ اتادى. بىراق «ارناۋلى اسكەري وپەراتسيادان» كەيىن بۇل كوزقاراس كۇرت وزگەردى – ول ەندى شىندىقتان اداسقان، قارتايعان اۆتوكرات رەتىندە قابىلداندى.

رەسەي ەليتاسىنىڭ ىشىندە پۋتينگە (73 جاستا) دەگەن قارسىلىق كۇشەيىپ كەلەدى. رەسەي ەليتاسى مەن ءىرى بيزنەسى وعان دەگەن قۇرمەتىن جوعالتىپ، ونى «دەد - اتا» دەگەن لاقاپ اتپەن اتاي باستادى.

رەسەيلىك ەكونوميست الەكساندرا پروكوپەنكو بۇل تۋرالى نەمىس Frankfurter Allgemeine Zeitung گازەتىنە بەرگەن سۇحباتىندا رەسەيدىڭ ازاماتتىق قوعام وكىلدەرى مەن باسقارۋشى ەليتاسىمەن بولعان اڭگىمەلەرگە سىلتەمە جاساي وتىرىپ مالىمدەدى.

پروكوپەنكونىڭ ايتۋىنشا، رەسەيلىك ەليتانىڭ پۋتينگە دەگەن كوزقاراسى 2022 جىلدىڭ اقپانىنا دەيىن باسقاشا بولعان. ونىڭ تاريحقا ەرەكشە دەن قويىپ، ەكونوميكالىق كۇن تارتىبىنەن الشاقتاپ بارا جاتقانىنا قاراماستان، سوعان دەيىن «بوسس» دەپ اتالىپ، قۇرمەتكە يە بولدى.

ۋكرايناعا باسىپ كىرۋ تۋرالى بۇيرىقتان كەيىن جاعداي وزگەردى. رەسەيلىك ەليتا ءپۋتيننىڭ تولىق اۋقىمدى سوعىسقا باراتىنىنا مۇلدە سەنبەدى، ونى تاۋەكەلدەردى تارازىلاي الاتىن اقىلدى ادام دەپ سانادى.

ونىڭ ءبارى بولماعان جەردە قۇرمەت – كوڭىلسىزدىك پەن كەلەكەگە جول بەردى. پروكوپەنكو اتاپ وتكەندەي، جەكە اڭگىمەلەردە پۋتين «دەد» دەگەن لاقاپ اتقا يە بولدى. ونىمەن سۇقباتتاسقان ءبىر ەليتا وكىلى رەسەي پرەزيدەنتىن: « “دەد” ويىنشىق ساربازداردى جاقسى كورەدى» دەپ سيپاتتاعان.

رەسەيلىك ەكونوميستتىڭ ايتۋىنشا، بۇل ءسوز تىركەسى ءپۋتيننىڭ سوعىس قۇمار، بىراق شەشىمدەرىنىڭ سالدارىنان الشاق ادام ەكەنىن ءدال جەتكىزەدى. بۇل لاقاپ ات تەك رەسەيلىك  پرەزيدەنتتىڭ جاسىن عانا ەمەس (پۋتين 73 جاستا), سونىمەن قاتار ونىڭ ءوز شىندىعىندا ءومىر سۇرەتىنىن، وندا سوعىس ەل ءۇشىن اپات ەمەس، ابستراكتىلى ويىن رەتىندە قابىلداناتىنىن كورسەتەدى.

پروكوپەنكو سونىمەن قاتار رەسەيلىك ەليتانىڭ ءپۋتيندى ناقتى جاعدايدان بارعان سايىن وقشاۋلانعان دەپ سانايتىنىن اتاپ وتەدى. ونىڭ ايتۋىنشا، ەكونوميكالىق جانە اسكەري اقپارات رەسەي پرەزيدەنتىنە بۇرمالىپ، اشەكەيلەنگەن تۇردە جەتەدى. رەسەيلىك باسقارۋ جۇيەسى شىندىقتى ايتاتىنداردى ەمەس، جاعىمدى جاڭالىقتاردى عانا جەتكىزەتىندەردى ماراپاتتايدى.

كەرىمسال جۇباتقانوۆ

Abai.kz