استانادا ناۋرىز مەرەكەسى قارساڭىندا «Nauryz Sale» اتتى اۋقىمدى ازىق-تۇلىك جارمەڭكەسى ءوتىپ جاتىر. قالا تۇرعىندارى مەن قوناقتارى قازاقستاننىڭ ءتۇرلى وڭىرلەرىنەن جەتكىزىلگەن تابيعي ءارى ساپالى ونىمدەردى ءتيىمدى باعامەن ساتىپ الۋعا مۇمكىندىك الۋدا. جارمەڭكە وتاندىق اۋىل شارۋاشىلىعى وندىرۋشىلەرىن قولداۋعا جانە تۇرعىنداردى قولجەتىمدى ازىق-تۇلىكپەن قامتاماسىز ەتۋگە باعىتتالعان. مۇندا ەت، ءسۇت ونىمدەرى، كوكونىس، بال، ۇن جانە باسقا دا ازىق-تۇلىك تاۋارلارى ۇسىنىلعان.

سۋرەت: شارا ۇيىمداستىرۋشىلارىنان الىندى.

جارمەڭكە اتموسفەراسى: حالىق كوپ، ساۋدا قىزۋ

تاڭ اتقاننان جارمەڭكە الاڭىندا ادام قاراسى كوبەيدى. قالا تۇرعىندارى ازىق-تۇلىك سالىنعان سومكەلەرىن ۇستاپ، سورەلەردى ارالاپ ءجۇر. ءبىر جەردە جاڭا پىسكەن ەت ونىمدەرى ساتىلىپ جاتسا، ەندى ءبىر جەردە اۋىلدان جەتكىزىلگەن ءسۇت، قايماق، ىرىمشىك، قۇرت سياقتى تاعامدار ۇسىنىلعان. ال كوكونىس پەن جەمىس-جيدەك تولى جاشىكتەردىڭ جانىندا ساتىپ الۋشىلار كەزەككە تۇرعانىن كورۋگە بولادى.

ۇيىمداستىرۋشىلاردىڭ مالىمەتىنشە، «Nauryz Sale» بيىل العاش رەت وتكىزىلىپ وتىر. وعان 70-تەن استام فەرمەرلىك شارۋاشىلىق پەن جەرگىلىكتى وندىرۋشىلەر قاتىسۋدا. ساۋدا سورەلەرىنە ونداعان توننا  اۋىل شارۋاشىلىعى ءونىمى شىعارىلعان.

  ۇيىمداستىرۋشىلاردىڭ ايتۋىنشا، مۇنداي جارمەڭكەلەردىڭ نەگىزگى ماقساتى - حالىققا الەۋمەتتىك ماڭىزى بار ازىق-تۇلىك ونىمدەرىن قولجەتىمدى باعامەن ۇسىنۋ جانە فەرمەرلەرگە ونىمدەرىن دەلدالسىز وتكىزۋگە مۇمكىندىك بەرۋ.

"فەرمەرلەر ونىمدەرىنە -70% دەيىن جەڭىلدىك ۇسىنادى"

«ناۋرىز - جاڭارۋ مەن بەرەكەنىڭ مەرەكەسى. وسى كۇندەرى قالا تۇرعىندارى داستارقانىن مولىنان جايعىسى كەلەدى. سوندىقتان ءبىز جارمەڭكەدە ساپالى ءارى تابيعي ونىمدەردى قولجەتىمدى باعامەن ۇسىنۋدى كوزدەدىك. سونىمەن قاتار بۇل - فەرمەرلەرگە ءوز ءونىمىن تىكەلەي تۇتىنۋشىعا ساتۋعا مۇمكىندىك بەرەتىن الاڭ»، - دەيدى جارمەڭكەنىڭ الەۋمەتتىك ماڭىزى تۋرالى استانا قالاسى اكىمدىگىنىڭ ينۆەستيتسيالار جانە كاسىپكەرلىكتى دامىتۋ باسقارماسى باسشىسىنىڭ ورىنباسارى ماقسات جاڭاباەۆ.  ونىڭ ايتۋىنشا، جارمەڭكە اياسىندا تۇرعىندار اۋىل شارۋاشىلىعى ونىمدەرىن نارىقتاعى باعادان 70 پايىزعا دەيىن جەڭىلدىكپەن ساتىپ الا الادى.

مۇنداي شارالار، اسىرەسە، مەرەكە قارساڭىندا حالىقتىڭ ازىق-تۇلىككە دەگەن سۇرانىسىن قامتاماسىز ەتۋگە باعىتتالعان. "سونىمەن قاتار جارمەڭكە جەرگىلىكتى وندىرۋشىلەرگە ءوز ونىمدەرىن تىكەلەي ساتۋعا مۇمكىندىك بەرەدى. جالپى قالا بويىنشا مۇنداي جارمەڭكەلەر تۇراقتى وتكىزىلەدى. بىراق، «Nauryz Sale» اۋقىمى جاعىنان ءىرى جارمەڭكەلەردىڭ ءبىرى بولادى دەپ كۇتىلۋدە. سەبەبى ناۋرىز مەرەكەسىنە ورايلاستىرىلعاندىقتان، حالىق تاراپىنان اسىرەسە، اۋىلشارۋاشىلىق ونىمدەرىنە دەگەن سۇرانىس كوپ ەكەنىن بايقادىق" دەيدى ۇيىمداستىرۋشىلار.

جارمەڭكە وتەتىن الاڭدى ۇسىنعان «كەرۋەن جولى» ساۋدا ورتالىعىنىڭ وكىلدەرى دە بۇل باستامانىڭ ماڭىزىن اتاپ ءوتتى. ساۋدا ورتالىعىنىڭ كوممەرتسيالىق ديرەكتورى ايتۋعان تۇزەلباەۆتىڭ ايتۋىنشا، مۇنداي شارالار فەرمەرلەر ءۇشىن دە، تۇرعىندار ءۇشىن دە ءتيىمدى. ونىڭ سوزىنشە، ورتالىقتا بىلتىرعى جىلدىڭ قاراشا ايىنان باستاپ اي سايىن ەت جارمەڭكەلەرى ۇيىمداستىرىلىپ كەلەدى.

"بۇل جارمەڭكەلەرگە ەلىمىزدىڭ 7-8 وڭىرىنەن فەرمەرلەر تۇراقتى تۇردە قاتىسادى. ناتيجەسىندە تۇرعىندار ەت ونىمدەرىن تىكەلەي وندىرۋشىدەن ساتىپ الىپ، نارىقتاعى باعامەن سالىستىرعاندا كەلىسىنە 700–800 تەڭگەگە دەيىن ارزان الا الادى. مۇنداي جارمەڭكەلەرگە دەگەن سۇرانىس جوعارى. بۇگىن مىنە، وزدەرىڭىز كورىپ وتىرعانداي، تاڭەرتەڭنەن حالىق قاراسى قالىڭ. ادەتتە ورتالىققا كۇنىنە 1000-1500 ادام كەلىپ، ساۋدا جاساسا، جارمەڭكەلەردە ول كورسەتكىش ءتىپتى 10 مىڭ كەلۋشىدەن اسىپ جىعىلادى. بۇل ءبىزدىڭ ساۋدا ورنىنىڭ اشىلعانىنا كوپ ۋاقىت بولا قويماعانىنا قاراماستان بولىپ وتىرعان جاعداي" دەيدى ساۋدا ورنىنىڭ باسشىلىعى.

Abai.kz