مەملەكەت باسشىسى رەفەرەندۋم ۋچاسكەسىندە داۋىس بەرگەننەن كەيىن جۋرناليستەردىڭ سۇراقتارىنا جاۋاپ بەرە وتىرىپ، قازاقستاننىڭ يران ەلىنە قاتىستى ۇساتىنمىن اتادى.

ونىڭ ايتۋىنشا، كەز كەلگەن كيكىلجىڭ بەيبىت جانە ديپلوماتيالىق جولمەن شەشىلۋى قاجەت.

«قازاقستان الەمگە بەيبىت ەل رەتىندە بەلگىلى. كەز كەلگەن قاقتىعىستى ديپلوماتيالىق جولمەن شەشۋدى جاقتايمىز. بۇل –اينىماس ۇستانىمىمىز. تاياۋ شىعىستا ورىن العان جاعدايدىڭ ءتۇرلى سەبەبى بار. مەن مۇنى جاقىندا وتكەن القالى جيىندا دا ايتقانمىن. راسىندا، شىعاناقتاعى اراب ەلدەرىنىڭ باسشىلارىمەن تەلەفون ارقىلى سويلەستىم، تىلەكتەس ەكەنىمدى جەتكىزدىم. ال يران پرەزيدەنتى پەزەشكياننىڭ جاقىندا ەلىمىزگە رەسمي ساپارمەن كەلگەنىن بىلەسىزدەر. سول كەزدە جاقسى اسەر قالدىردى. ول – زايىرلى كوزقاراستاعى ادام، ءوزى كارديوحيرۋرگ. مەن ونىڭ يران شىعاناق ەلدەرىنە شابۋىل جاسامايدى دەگەن مالىمدەمەسىن قۇپتادىم» – دەدى پرەزيدەنت.

سونداي-اق، ول يران حالقى تۋرالى جىلى لەبىز ءبىلدىردى: «ءبىز يران حالقىنا، ونىڭ مادەنيەتى مەن تاريحىنا قۇرمەتپەن قارايمىز. سوندىقتان ءوز ۇستانىمىمىزدان اينىعان جوقپىز، ءاردايىم بەيبىتسۇيگىش ەل بولىپ قالا بەرەمىز».

Abai.kz